Crea sito

Christianismo reformate


 Car visitator,

iste sito desidera presentar, in le lingua international neutral Interlingua, le contento del fide christian secundo le perspectiva del Reformation del 16me seculo, in le persuasion que illo es le forma optimal de christianismo, le plus fedel al hereditage lassate nos del prophetas e del apostolos inspirate que scribeva le Biblia.

Multes hodie cultiva prejudicios e opposition al christianismo, sovente proque illes esseva personalmente vulnerate e mesmo scandalisate per formas de christianismo que de facto non correspondeva al inseniamento original. Nos es persuadite, tamen, que le fide christian pote esser de enthusiasmante vitalitate solmente quando, liberate per le scorias de traditiones human alienante, de seductiones sectari, e del subjection a ideologias extranee, antique e moderne, corresponde vermente al inseniamento del Biblia, sol norma possibile pro ille fide e ille conducta que esseva inseniate per le Senior e Salvator Jesus Christo.

Iste conformitate e retorno al inseniamento biblic, esseva le principio operative del Reformation europee del 16me seculo, cuje protagonistas esseva, inter alteres, Martin Luther, Johannes Calvin, e Huldrich Zwingli (le plus cognoscite). Nos pone nos in continuitate ideal con le obra que illes comenciava e que esseva particularmente developpate per le tradition reformate.

Nos non intende "inventar" nihil de novo, ni nos assere, como alcunes face hodie, que ante illes o ante lor "prophetas" e "apostolos" nulle ver christianismo existeva. Isto esserea un intolerabile arrogantia. Nos regratia Deo e multo apprecia tote illes que, durante le historia del Ecclesia universal, esseva testes fidel del inseniamentos biblic, inter le quales le antique "patres" del Ecclesia e le martyres de omne seculo, le quales sacrificava tote lor vita pro le causa de Christo, tanto como le concilios ecumenic, cuje permanente validitate nos supporta. Deo nunquam esseva prive, durante le seculos, mesmo le plus obscur, de homines e feminas fidel. Le populo de Deo nunquam se extingueva e se extinguera, mesmo durante periodos de corruption e infidelitate: Deo es fidel a Su promissas. Le facula del fide christian nunquam se extingueva.

Nostre sito, ergo, vole esser un fonte de information, un testimonio, e un appello a omnes: rediscoperir le vitalitate del fide biblic e haber le corage de reformas, secundo ille inseniamento, nostre ideas e traditiones. Ancora hodie nos necessita, sia a nivello personal que comunitari, un reforma del spiritualitate e del religiositate, un reforma del ecclesia e del culto, un reforma del pensamento politic e social. Iste reforma, con vigor comenciate in le 16me seculo, con tote su principios de inspiration, permane hodie un necessitate e de grande actualitate.

Paolo Castellina, pastor evangelic reformate

renascentia wiki
Wikispaces

This site is a member of WebRing.
To browse visit Here.