2 Samuel, cap. 6

6

Le transferimento del Arca a in Jerusalem

1Alora David congregava itero ex Israel omne su truppas melior: illos esseva trenta milles homines in toto. 2Inde, David les conduceva a Baalah de Juda ut reportar le Arca de Deo, super le qual es invocate le nomine de Deo, inthronate inter le cherubines. 3Illes placiava le Arca de Deo sur un carro nove e lo portava ab le domo de Abinadab, que esseva super un colle. Uzza e Ahio, le filios de Abinadab, guidava le carro nove. 4Illes lo portava con le Arca de Deo ab le domo de Abinadab, que esseva sur un colle. Ahio marchava ante le Arca, 5durante que David e tote le populo de Israel celebrava con grande enthusiasmo coram le Senior, cantante e sonante varie instrumentos a corda, tamburinos, castaniettas e cymbales.

6Quando, tamen, illes perveniva a in le area de disgranamento de Nacon, le boves que trainava le carro faceva un passo false, e Uzza extendeva su mano pro sustener le Arca de Deo e impedir lo de cader a terra. 7A causa de isto, propter su temeritate, le indignation irate del Senior se piccava contra Uzza, le percuteva e ille moriva ibi juxta le arca de Deo.

8David esseva multo contristate proque le ira del Senior habeva talmente erumpite contra Uzza; assi ille nominava ille placia Perez Uzza (que significa “erumper contra Uzza”) e iste nomine remaneva usque hodie. 9David comenciava nunc haber pavor del Senior e diceva: “Como poterea io unquam portar le Arca del Senior sub mi custodia?”. 10Assi, David decideva de non plus transportar le Arca del senior in le Citadella de David. Al contrario, ille lo relinqueva in le domo de Obed-Edom, le gittita. 611Le Arca del Senior remaneva in le domo de Obed-edom le gittita per tres menses e le Senior benediceva Obed-edom e su familia integre. 12Deinde a Rege David esseva dicite: “Le Senior benediceva le familia de Obed-Edom e tote lo que ille possede propter le Arca de Deo. Assi David vadeva ibi e faceva transportar le Arca de Deo ab le domo de Obed-Edom al Citadella de David con grande celebration. 13Postquam illes qui portava le Arca de Deo habeva progredite sex passos, David immolava in sacrificio a Deo un bove e un vitello ingrassiate. 14E David dansava con grande enthusiasmo coram le Senior portante solmente un vestimento sacerdotal de lino. 15Assi David e tote le populo de Israel portava le Arca de Deo con critos de gaudio e sonante cornos de ariete.

Michal contemne David

16Quando, tamen, le Arca del Senior entrava in le Citadella de David, Michal, le filia de Saul reguardava ab un fenestra del palatio. In vider Rege David qui saltava e dansava coram le Senior, illa esseva implite de contempto pro ille.

17Illes introduceva le Arca de Deo e lo poneva in le medio del tenta special que David habeva preparate pro illo. E David sacrificava holocaustos e offertas de pace al Senior. 18Quando ille terminava offerer holocaustos e offertas de pace, David benediceva le populo in le nomine del Senior del universo. 19Pois ille dava a cata un homine e un femina israelita in le turba un pan, un torta de dattilos, e un torta de uva. Deinde tote le populo retornava a lor proprie domos.

20Quando David retornava a domo pro benedicer su proprie familia, Michal, le filia de Saul, sortiva pro incontrar le. Illa diceva disgustate: “Quanto gloriose esseva hodie le rege de Israel, discoperiente se sin vergonia al vista de su pueras serviente sicut facerea un qualcunque persona del vulgo!”. 21David, tamen, la retorqueva: “Io dansava ante le Senior, qui me eligeva super tu patre e super tote su familia! Ille me appunctava qua conductor de Israel, le populo del Senior. Pro isto io celebra coram le Senior! 22Si, e io es preste a mesmo a vilificar me de plus que isto a mi oculos. Sed apud le pueras serviente que tu mentionava, io parera ancora plus gloriose!”. 23Igitur, Michal, le filia de Saul, remaneva sin plus poter parer infantes pro su vita integre.

https://wikisource.org/wiki/Biblia/Vetule_Testamento/Samuel/2_Samuel_6