Dominica 3-10-2021 – Lecturas biblic in Interlingua

29 September 2021 reformation 0

Le termino “integritate” deriva ab le adjectivo “integre”, “intacte”, le condition de un cosa que possede tote su partes, su proprie elementos e attributos intangite. Integritate es le concepto ethic de fundar le proprie actiones sur un quadro consistente de principios, le accordo plus grande possibile inter le proprie ideales e valores e le application de illos in le vita real. Le quadro consistente de principios ethic e moral al qual nos es appellate qua christianos, ha essite fixate per Deo desde le principio del creation e illo garanti nostre vita. Iste principios exprime le attributos e le character ipse de Deo, a cuje imagine nos esseva create. Quando nos humanos nos averteva ab Deo e nos submitteva a leges que nos reputa melior que le sues, nos perdeva nostre integritate original. Deo provideva restablir ille integritate per le medio de Jesus Christo quando on le recipe qua nostre Senior e Salvator.

Psalmo 26

23 September 2021 reformation 0

Le autor invita le Senior a poner a proba su integritate, assere su innocentia e declara su loyalitate a Deo.

Dominica 26-9-2021 – Lecturas biblic in Interlingua

22 September 2021 reformation 0

Desde le tempores le plus antique illes essayava facer lo e continua facer lo in omne manieras imaginabile. Le fortias del mal non sparnia le ressources a lor disposition pro imponer e consolidar lor poter tyrannic: illes essaya nutralisar e eliminar le principal fortia de opposition a lor aspirationes totalitari: le populo fidel de Deo. Emarginate, submittite in servage e combattite sin scrupolos con le methodos le plus perverse, persecutate e massacrate, le populo fidel a Deo, tamen, resiste, vive e prospera. Imperios e aspirante dictatores non plus sape que excogitar, lor frustration es maxime: illes nunquam succedera destruer lo. Le superviventia del populo de Deo, trans seculos e millennios, es un miraculo del obra providential de Deo.

Dominica 19-9-2021 – Lecturas biblic Interlingua

13 September 2021 reformation 0

Le consilios de qui seque vos? Le plus sovente de nemo! Nos face tote lo que passa in nostre capites o, como se dice, “nos vade ubi nostre corde nos porta”. Altere vices nos seque le consilios de nostre amicos o nos nos conforma a lo que face “le majoritate”, le opinion public, o … de nostre psychanalista! Esque nos pote fider nos a iste consiliatores? Sovente no. Beate es illes, tamen, qui seque lo que autoritativemente le Parola de Deo doce nos. Isto es lo que recommenda nos nostre prime lectura biblic: Psalmo 1. Ibi se parla del homine sage o sapiente, ma il ha alsi in nostre lecturas, le exemplo de lo que face un femina sage, forte, laboriose e interprendente, le femina qui respecta Deo e cuje marito ha plen fiducia de illa. Illa es super toto un femina honeste, e omnes pote confider se a un femina assi. De isto le secunde lectura nos parla, illo ex le libro del Proverbios. Unde, de facto, proveni le ver sapientia pro viver secondo lo que objectivemente es ver, bon e juste? Certemente “ab alto”, illo es ab Deo. Certemente il existe un sapientia que proveni “del terra, del passiones carnal, e del demones”. Illo conduce al ruina. Poches ha le necessari discernimento pro distinguer un sapientia ab le altere. Pro isso, le apostolo Jacobo, in le tertie lectura, nos da utile indicationes. Aliquando le sapientia porta nos super vias difficile a percurrer, vias que non pare bon e utile pro nos. Isto eveniva como quando Jesus prospectava ante su discipulos que ille haberea debite esser consignate a su inimicos, multo patir e esser occidite. Illes non lo poteva comprender, ma illo esseva le via juste, que haberea portate al victoria del resurrection, le victoria sur le mal. In le quarte lectura nos trova le annuncio de isto, que termina in Su exhortation de reciper le parve infantes como le favorites in le Regno de Deo. Quare? Forsan proque illes sape de poter haber plen confidentia de Jesus. Iste sorta de confidentia debeva esser illo de Su discipulos, e debe esser alsi le nostre hodie.

Dominica 12-9-2021 – Lecturas biblic in Interlingua

7 September 2021 reformation 0

Quomodo se revela Deo? Per le medio del leges que Ille establiva pro regular le universo create. Illos es le leges que le scientia studia. Deo se revela alsi per le medio de Su Lege moral, radicate in nos, que sovente nos supprime o distorque. Iste lege moral es proclamate in le Sacre Scripturas hebraic e christian. Le creato e le Lege de Deo es le duo fontes de revelation celebrate per le Psalmo 19, nostre prime lectura de hodie. Honorar e sequer lo que Deo establiva pro nostre vita es synonimo de sapientia (o sagessa), representate in le secunde lectura, ex le libro del Proverbios, como un femina sage que voca “per le vias e le placias” a conformar nos a illo e non esser personas stulte. Il ha, tamen, multe personas in iste mundo qui pretende al rolo de maestro e illes es multo loquace. Ex lor bucca proveni “le dulce e le amar”, dice nos le apostolo Jacobo in nostre tertie lectura. Pro isso, il es necesse que nos exerce discernimento diligente. Un tal discernimento non lo habeva le opinion public al tempores de Jesus, que miscomprendeva Su Persona, Parola e obras. Solmente un “aure de discipulo” (Isaia 40:5-5) pote conducer nos discoperir le veritate re Jesus, Parola vivente de Deo, e confessar nostre fide in Ille. Isto es lo que presenta nos le quarte lectura, trahite ex le evangelio secundo Marco. Vamos, ergo, ascoltar.