Dominica 24-10-2021 – Lecturas biblic in Interlingua

20 October 2021 reformation 0

“Io parlava re cosas que excedeva mi cognoscentia, cosas troppo meraviliose pro me a saper … Antea io habeva solmente audite de te, ma nunc io te ha vidite con mi oculos. Ergo, io ipse retrahe lo que io diceva”. Istos es le parolas del antique Job, ex nostre secunde lectura de hodie. Durante que il ha personas qui se declara agnostic, qui dice de non saper e mesmo que on non poterea cognoscer alco con certitude (e propter isto illes non se exprime a iste reguardo), multe alteres ostende arrogantia futile, asserente que illes sape e comprende… Gratias a Deo, tamen, alicunes perveni – super toto post haber suffrite dur probas, al repententia e a retraher lo que illes habeva antea credite e dicite. Assi illes perveni recognoscer, con humilitate sincer, le veracitate de quid le Parola de Deo affirma. De tote corde illes perveni appropriar se con persuasion profunde del expressiones de laude e de adoration que nos trova in le psalmo 34. Illes dice: “tote illes qui quere un refugio in ille non essera condemnate”. Con recognoscentia e fiducia, illes recipe, ergo, le veritates exprimite per nostre tertie lectura. Illos reguarda le Senior e Salvator Jesus Christo, qui es proclamate “le summe sacerdote que nos necessita, quia ille es sancte, innocente, non maculate de peccato … al qual esseva date le plus alte placia de honor in celo”. Justo assi! Il es multo importante facer le experientia salutar de esser sanate del cecitate spiritual que nos tene lontan ab facer experientia del presentia de Deo. Nos vide un illustration de isto in nostre quarte lectura de hodie, ex le evangelio secundo Marco: le sanation del homine cec de Jerico. Vamos invocar, ergo, le intervention de Deo in nos, que porta nos al repententia e al fide in le Senior e Salvator Jesus Christo.