Lecturas dominical

Dominica, le 7 de Martio 2021 - Lecturas biblic in Interlingua

Nos vive in le era del communication. In poc secundas messages scripte, audio e video circula in le mundo e pote esser recipite de quicunque ha solmente un parve telephono cellular in su tasca. On pote responder a tal messages e de illos producer alteres. Le technologia del communication se developpava e se developpara ancora justo proque nos humanos esseva create a imagine de Deo, le Communicator per excellentia. Le Psalmo 19, con le qual incipe nostre lecturas biblic hodie, indica le duo modos per le quales Deo revela Se ipse e Su voluntate: le observation del natura e Su Parola-Lege, semper evidente a nos omnes. Illo es le Lege moral conteninte in le Decalogo, in observar le qual nostre vita es garantite. Isto nos lo trova in le secunde lectura. Nostre “apparato de reception” functiona, ma un grande parte del humanitate ignora Su messages e mesmo dice de non haber los recipite! Multe gente considera alsi insensate le message de gratia del Evangelio, e prefere religiones e philosophias que illo reputa plus convenibile. Isto es lo que le apostolo Paulo releva in nostre tertie lectura, e que nos vide alsi illustrate in le quarte lectura ab le evangelio secundo Johannes. In illo Jesus disembarassa le Templo del false religion, sicut lo habeva alsi denunciate le antique prophetas de Israel, messageros de Deo.

Dominica, le 28 de februario 2021 - Lecturas biblic in Interlingua

In le curso del historia multe homines potente habeva ambitiones dismensurate e creava imperios. Con lor systemas de poter e leges, illes aspirava gerer le mundo e mesmo se faceva adorar qua deos. Illes de facto voleva substituer se al Deo ver e vivente, Creator e Senior del universo e a Su leges de justitia. Lor projectos, tamen, semper falleva e lor imperios cadeva miseremente post haber facite disastros innumerabile. Il ha ancora hodie fortias que aspira a dominar le mundo integre, ma illos fallera alsi, implodente in lor contradictiones. In iste mundo condemnate e decadite, tamen, Deo, in su gratia, seligeva pro se un populo con le qual ille establiva un pacto, e per le qual se haberea realisate su projectos de redemption. Iste projectos se realisara e nemo potera impedir los. Intertanto su populo se oppone al tyrannos e testimonia de un stilo de vita secundo le voluntate de Deo. Iste populo es nunc componite de gente ab omne nationes, que reguarda al complimento del promissas de Deo e opera con fiducia. Iste realitate multi-national del populo de Deo es advocate e celebrate in le Psalmo que nos legera hodie. Un texto del libro del Genesis parlara nos del ancestre de tal populo. Un texto del Epistolas nos explicara le spirito de ille ancestre e le criterios de su election. Finalmente, in un texto del Evangelio, Jesus Christo presenta nos le difficultate del mente human a comprender le strategia salvific de Deo e lo que require sequer le como Su discipulos.

Dominica, le 21 de februario 2021 - Lecturas biblic in Interlingua

Un cordial prisa de mano, un imbraciamento sincer, un basio intense, es pro nos expression de amicitate, de amor, de recognoscentia. Ancora alteres poterea esser le signos que porta con illos un signification que, per lor medio, es confirmate o reinfortiate. Alicun signos nos los trova prescribite de Deo ipse in le Biblia, super toto illos que marca le establimento de un pacto o alliantia. Le iride, per exemplo, es le signo del pacto establite per Deo con Noe e su familia post haber les salvate del diluvio. Le Baptismo e le Cena del Senior es le signos e sigillos que le Senior Jesus institueva e que representa le obra complite de Ille pro le salvation del Sues ab le peccato e su consequentias. Tote isto nos lo trova in le lecturas biblic de iste septimana, sia ab le Vetule Testamento, sia ab le Nove Testamento, in perfecte harmonia.

Dominica, le 14 februario 2021 - Lecturas biblic in Interlingua

Le fidelitate al commission que Deo nos fideva essera premiate: il ha necun dubita a iste proposito! Il non ha dubitas mesmo a proposito que il habera un judicamento super nostre obras, quia nos esseva rendite creaturas responsabile. Iste principio es affirmate in le Psalmo 50, que aperi nostre lecturas biblic de hodie. Le mysteriose translation in celo del propheta Elia (reportate in le secunde lectura) illustra quomodo Deo honora qui le servi fidelmente. Le consecration al servicio de Deo es alsi illustrate per le exemplo del apostolo Paulo in le tertie lectura, in le qual ille explica le ration pro le qual il ha multes qui rejecta le salvation offerite in le Persona e obra del Christo. Gratias a Deo, tamen, il ha qui aperi su oculos e, in vider le gloria del Christo celate in Su humile humanitate e lo recipe con fide, recipera alsi le gratia del eterne communion con Ille, etiam ultra al morte. Isto es lo que pictura nostre quarte lectura ab le evangelio secundo Marco. Il ha multo hic super le qual reflecter!

Dominica, le 7 de februario 2021 - Lecturas biblic in Interlingua

Per tote le Vetule e le Nove Testamento, il ha un substantial continuitate de revelation e de propositos in le obra del messageros que Deo seligeva pro promover Su obra de inseniamento e salvation. Lor dedication e abnegation esseva total. In lor relation con Deo, illes es nostre exemplos, sia pro lo que reguarda lor vita de precaria sia de servicio active. Le biblia parla de illes pro nostre instruction. Nos vide tote isto in le lecturas de hodie, primo in le Psalmo e in le texto que nos es proponite ab le propheta Isaia, pois in le exemplo del ministerio del apostolo Paulo in le tertie lectura, deinde culminante in le lectura extrahite ab le Evangelio secundo Marco. Iste lectura termina con le exhortation que Jesus face a su discipulos: “Vamos alibi, a in le vicos circumstante, a fin que io pote predicar ibi alsi, quia isto es le ration proque io veniva”. Il es nostre responsabilitate alsi de prosequer a diffunder le bon nova del Evangelio ubicunque on non cognosce le obra de Deo in Jesus Christo. Como dice le Psalmo 147: “ Ille manda su commandos per le terra, su parolas curre velocemente e attinge lor destination”. Nihil e nemo lo potera impedir.

Dominica, le 31 de Januario 2021 - Lecturas biblic in Interlingua

Le circumstantias in le quales nos vive hodie compelle nos al isolamento social. Il ha le risco, in alicun maniera, que nos accostuma nos al isolamento. Le poter exploita iste situation a proprie avantage pro melio controlar nostre vita. Pro nos christianos, reunir nos quam communitate es essential. Le surrogatos del incontros fraternal non es comparabile al ricchessa del incontro personal. Il es insimul a alteres que nos es instruite in le Parola de Deo e nos cresce in le fide. Il es in iste contexto que nos exerce le virtutes christian. Le lecturas biblic de hodie celebra e establi con autoritate le principios del dimension communitari del populo de Deo.

Dominica, le 24 de Januario 2021

Le Evangelio de Jesus Christo non es un religion consolatori que te face evader del realitate, ma un fortia de transformation del realitate que involve sacrificio e ingagiamento. Illo se funda sur le propositos revelate de Deo e le credente los imbracia con fiducia. Illo es un ingagiamento que nunquam essera frustrate. Le lecturas biblic de hodie establi in prime loco le fundamento secur sur le qual nos debe appoiar nos. Illos da le evidentia, in le secunde e quarte lectura, de como le message del Evangelio sia un appello al repententia, a quitar un stilo de vita illusori e auto-destructive. Le tertie lectura finalmente voca nos a investir nostre vita in lo que es permanente, relativisante lo que es transitori. Illo es vero un appello a un realismo constructive!

Dominica le 17 de Januario 2021 - Lecturas biblic in Interlingua

Incontrar se con altere personas es agradabile e importante, specialmente si il se tracta de un compania de personas con le quales tu te trova ben e con le quales tu ha interesses e aspirationes commun. Assi, tu desidera incontrar te con illes. Illes se cognosce le unes le alteres e le frequentation e le dialogo permitte de approfundar iste cognoscentia. De Deo, le Creator, le Scriptura dice que ille cognosce tote le stellas del celo per nomine. Non solmente isto: Ille cognosce cata un de nos per nomine e con nos Ille vole establir un relation personal. Isto es quid al qual nos accompania le Senior e Salvator Jesus Christo, e que nos vide ben in tote le lecturas biblic de hodie.

Dominica, le 10 de Januario 2021 – Lecturas biblic in Interlingua

Deo, le Deo ver e vivente qui se revelava trans tote le historia de Israel e suprememente in Jesus Christo, es un Deo “operante”. Deo realisa tote lo que ille se proponeva facer e ille lo face in modo maxime sapiente. Ille operava in crear le universo in le qual nos habita e, plus ancora de isto: nos lo vide in le lectura de hodie ab le Genesis. Deo opera soveranmente in lo que eveni in le mundo del natura: le Psalmo 29 lauda e exalta iste su activitates. Deo opera in le Persona e obra de Jesus Christo: isto es le annuncio prophetic de Johannes le baptisator. Deo continua operar con potentia per le medio de Su Sancte Spirito in renovar profundemente le vita de qui se confide in le Senior e Salvator Jesus Christo. Istos non es theorias, ma practica tangibile! Vamos audir le lecturas de hodie.

Dominica, le 3 de Januario 2021 - Lecturas biblic in Interlingua

Ubi es nostre casa? Illo es ubicunque il ha le personas que nos ama e con le quales viver in pace con tote lo que nos necessa. Il non importa ubi illo es. Certo, nos ama e honora nostre pais e gente, le loco unde proveni nostre familias e nostre ancestres es interrate. Per exemplo, Deo habeva concedite a su populo, Israel, un terra su proprie a habitar e ibi, a Jerusalem, sur le collina de Sion, il habeva le templo ubi Deo haberea se incontrate con illes. Illo es le terra de Israel e de necun altere. Depost multe vicissitudes, le gratia de Deo les concedeva de retornar in lor terra, ab ubi illes habeva essite expellite. Poter esser ibi es pro illes un grande gaudio: le terra de lor ancestres a habitar, curar e defender. Le prime e secunde lectura biblic de hodie exprime iste gaudio. Esque isto non reguarda nos, qui pertine a nationes differente? Isto certo nos reguarda alsi! Le mesme gaudio nos superveni quando spiritualmente nos incontra Jesis Christo, nostre templo vivente. Con ille, que nos ama quia ille nos amava primo, in comunion con ille, nos nos senti “a casa” ubicunque nos trova nos. Con ille e per ille, nos gaude del benedictiones de su gratia, le benedictiones explicate per nostre tertie lectura. Le mundo integre, tamen, debe esser restituite a Deo, qui es su legitime proprietario. Le plano de Deo es reconquirerlo in Christo e per Christo. Le dominatores de iste mundo, usurpatores, se oppone sovente con grande violentia a iste proposito, ma illes non prevalera. Le providentia de Deo que arrangia le protection del infante Jesus es lo que nos trova in le conto del evangelio de hodie. Vamos audir lo.