Lecturas bìblic in interlingua pro Dominica, le 1 de novembre 2020 – Festa de Tote le Sanctos

Lecturas biblic: Psalmo 34; Revelation 7:9-17; 1 Johannes 3:1-3; Mattheo 5:1-12 con le voces de Paolo Castellina, Bob McCarthy, Simona Cantarella, Péter Kovacs

Il ha personas, nunc jam decedite desde plure annos, que nos prefererea oblidar e que nos volerea vider applicate pro illes lo que in le antique Roma on appellava le damnatio memoriae. Audi lo que scribeva Commodo in le secunde seculo in re un perverse imperator roman: “Que le memoria del assassino e del gladiator sia del toto delite (…) Lassa que le memoria del obscede gladiator sia completemente delite (…) Plus feroce que Domitiano, plus ignobile que Neron. Quid ille faceva a alteres, sia facite a ille mesme. Sia a salvar solmente le memoria de qui es sin culpa. Sia restablite le honor del innocentes” (Historia augusta, Commodo 19:1). Qualcosa de simile a isto es scribite in le Psalmo 34: “Le visage del Senior (…) es volvite contra illes qui face le mal; ille delera lor memoria ab le facie del terra”. Le memoria, tamen, del justos, del martyres e del sanctos del populo de Deo debe esser honorate semper. Cognoscer lor vicissitudes e exemplo debe semper esser importante pro nos. Le grande turba de illes qui esseva redimite per Jesus Christo e que jam se trova coram Deo, es presentate a nos in le secunde lectura biblic de hodie, illo es le vision que Deo concedeva al evangelista Johannes registrate in le libro del Revelation. Deo nunquam se oblidara de illes, quia loro nomine es scribite in le Libro del vita. Poterea nos ignorar lor memoria? Illes es lo que etiam nos essera si nos es filios de Deo. Isto es le subjecto del tertie lectura, trahite del prime epistola de Johannes. Le quarte e ultime lectura es trahite ab le sermon sur le Monte, illo in le qual Jesus proclama le beatitude de illes qui es persecutate e perde lor vita pro amor del Christo. “Beate es vos, quando vos essera maledicite e persecutate, e on dicera falsemente contra vos omne sortas de mal propter me. Gaude e exulta, quia vostre recompensa va esser grande in celo. Rememora que le antique prophetas esseva persecutate in le mesme maniera”.

I.

Prime lectura. Psalmo 34. Iste canto de laude e adoration verso Deo es alsi un magnific confession de fide que exalta le fidelitate de Deo a tote su promissas e exalta le summe justitia de Su voluntate revelate. Conformar se a illo es un puncto de honor de omne filio de Deo qui, propter isto, essera abundantemente recompensate, hic e in le eternitate. Durante que le memoria del impios essera delite, illo del justos permanera in eterno.

“Io benedicera le Senior in omne tempores, mi bucca le laudara semper. Io me vantara solmente in le Senior: que lo audi tote illes qui es mansuete e se allegra. Magnifica le Senior con me, vamos exaltar su nomine insimul. Io quereva le adjuta del Senior e ille me exaudiva; ille me liberava ab toto lo que me terreva. Respice le e sia radiante de gaudio; non permitte que vostre facies sia avergoniate. Iste paupero clamava e le Senior le exaudiva; ille le salvava de omne tribulationes. Le angelo del Senior se campa circa illes qui le time e les libera. Gusta e vide quanto le Senior es suave; beate es le homine qui spera in ille. Time le Senior, vos su sanctos, quia illes qui lo time habera toto lo que illes necessita. Mesmo juvene leones sovente suffre le fame, ma illes qui confide in le Senior non carera de ulle bon cosa. Veni, filios, audi me: io vos docera le timor del Senior. Esque tu vole viver un vita plus longe? Te placerea viver un vita longe e prospere? Alora retene tu lingua a fin que illo non dice mal cosas, e tu labios a fin que illos non dice mentitas! Averte te ab le mal, quere le pace e perseque lo. Le oculos del Senior se complace vider illes que face lo que es juste; su aures es aperte a lor critos de adjuta. Le visage del Senior, tamen, es volvite contra illes qui face le mal; ille delera lor memoria ab le facie del terra. Le Senior audi su populo quando illes le clama adjuta; ille les libera de omne tribulationes. Le Senior es juxta illes qui ha cordes contrite; ille salva illes cuje spirito es opprimite. Le justos affronta multe tribulationes, ma le Senior veni in lor auxilio omne vices.  Quia le Senior protege le ossos del justos; non mesmo un de illos essera frangite! Le calamitate certemente destruera le peccatores, e qui odia le justos essera punite. Le Senior, tamen, redimera illes que le servi e tote illes qui quere un refugio in ille non essera condemnate”.

II.

Secunde lectura: Revelation 7:9-17. Al evangelista Johannes Deo concede de poter vider le gloria del personas redempte in celo, coram le throno de Deo. Vestite de robas albe, illes canta con recognoscentia le gloria de Deo qui les salvava, sovente de grande tribulationes. Le “Grande Tribulation”, de facto, non es un evenimento futur, como multes imagina, ma un dato constante de tote le periodo del ecclesia. Le mundo incredule odia e persecuta le filios de Deo quia illes non vole conformar se al impositiones de iste mundo impie. Dum le credentes in celo es consolate pro lor suffrentias, le suffrentias de illes qui es sur le terra cessara quando Christo, secundo su promissas, retornara e eliminara omne opposition contra ille.

Deinde io videva un grande turba, que nemo poteva numerar, ex omne gentes e tribos e populos e linguas, que stava ante le throno e coram le Agno. Illes esseva vestite de robas albe e in lor manos illes habeva brancas de palma. Illes clamava in alte voce dicente: “Le salvation pertine a nostre Deo, qui sede super le throno, e al Agno!”. E omne angelos stava circa le throno, circa le ancianos e le quatro creaturas vivente. Illes se prosterneva coram le throno con lor fronte a terra e adorava Deo. Illes cantava: “Amen! Benediction, gloria, sapientia, actiones de gratia, honor, potentia, e fortitude pertine a nostre Deo, per le seculos del seculos! Amen”.

Alora un del vinti-quatro ancianos me demandava: “Qui es istes qui es vestite in albe? Unde illes veniva?”. E io le diceva: “Mi senior, tu cognosce le responsa!”. E ille me diceva: “Istes es illes qui moriva durante le grande tribulation. Illes lavava lor robas in le sanguine del Agno e los rendeva albe. Isto es le ration quia illes sta coram le throno de Deo e le servi jorno e nocte in su Templo. Ille qui sede sur le throno les dara protection in su habitation ipse. Illes nunquam plus habera fame o sete; illes nunquam plus essera adurite per le calor del sol, quia le Agno, qui es sur le throno, essera lor Pastor. Ille les conducera ad fontes de aqua de vita. E Deo abstergera omne lacrimas ab lor oculos”.

III.

Tertie lectura 1 Johannes 3:1-3 – Esser filios de Deo. In iste lectura, le evangelista Johannes ipse parla re le gratia e le privilegio que Deo concede a su electos appellante les filios de Deo. Le mundo incredule les ignora e deride, le mundo “non les cognosce” quia illo non cognosce le Christo. Un die illes essera “simile a ille” in le gloria. Isto es le sperantia que les supporta.  

Vide quomodo le Patre nos ama: ille nos appella “su filios”, e nos les es! Ma illes qui pertine a iste mundo non nos recognosce, quia illes non le cognosce. Car amicos, filios de Deo nos les es nunc, ma como nos essera non es apparente, quia illo non ancora esseva revelate. Nos sape que quandocunque illo essera revelate, nos va esser simile a ille, proque nos le videra justo sicut ille es. E omnes qui ha iste sperantia in lor cordes, se preserva pur, justo como Jesus es pur.

IV.

Quarte lectura: Mattheo 5:1-12 – Le Beatitudes. Le expressiones del Sermon sur le Monte, in particular lo que nos appella  “le Beatitudes”, deveniva famose. Jesus declara le beatitude de personas que tales non esserea appellate per le mundo, illo es: povres, personas dolente, pacificatores, personas qui ha fame e sete de justitia, misericordiose, persecutate pro que illes quere justitia. Le mundo, tamen, non comprende que tote iste categorias de personas essera consolate e satisfacite non solmente quando Christo retornara, ma in le contexto del communitate christian, ubi se practica le stilo de vita de Jesus e conformemente al Lege bon e juste de Deo.

Quando ille videva le turba, Jesus ascendeva al monte e se assideva. Su discipulos se approximava a ille e ille incipeva docer les. Ille les diceva: “Beate es le pauperes in spirito, quia le Regno del Celos les pertine. Beate es qui luge, quia illes essera consolate. Beate es illes qui es mansuete, quia illes va posseder le terra. Beate es illes qui ha fame e sete de justitia, quia illes va esser satiate. Beate es illes qui es misericorde, quia illes ipse va esser objecto de misericordia. Beate es illes cuje cordes es pur, quia illes va vider Deo. Beate es le pacificatores, quia illes essera appellate filios de Deo. Beate es illes qui pati persecutiones propter justitia, quia le Regno del Celo les pertine. Beate es vos, quando vos essera maledicite e persecutate, e on dicera falsemente contra vos omne sortas de mal propter me. Gaude e exulta, quia vostre recompensa va esser grande in celo. Rememora que le antique prophetas esseva persecutate in le mesme maniera”.

Oration

Omnipotente Deo! Tu conjungeva tu Electos in un sol communion in le corpore mystic de tu Filio Jesus Christo, nostre Senior: dona a nos le gratia  necessari ut sequer le exemplo de tu sanctos e beatos in omne vita virtuose e pie, a fin que nos attinge ille gaudios indicibile que tu preparava pro illes que te ama vermente; per Jesus Christo nostre Senior, qui con te e con le Sprito Sancte vive e regna, un sol Deo, in le gloria eterne. Amen.