Dominica 10-10-2021 – Lecturas biblic in Interlingua

Dominica le 10 de octobre 2021 – vintesime dominica post Pentecoste

Lecturas biblic: Psalmo 22:1-15; Job 23Hebreos 4:12-16; Marco 10:17-31 con le voces de Paolo Castellina, Carmelo Serraino,  Bob McCartyPéter Kovács

Introduction al lecturas

Ille non parla e da consilios ab le alto de un confortabile situation de privilegio, ma ille veniva in nostre medio suffrente personalmente nostre infirmitates e tentationes. Ille pote assi plenmente haber compassion de nostre debilitates, reinfortiar nos e traher nos foras de illos. Qui es ille? Ille es le Senior e Salvator Jesus Christo, le unic, cuje suffrentia e obra salvific esseva amplemente predicite in le Scripturas hebraic, e del quales nos trova un impressionante exemplo in le Psalmo 22, e un prefiguration in le expressiones del libro de Job, al capitulo 23. Iste veritate es evidentiate in le littera al Hebreos, quando illo dice: “Proque nos non ha un sacerdote incapace de compatir nostre infirmitates, quia ille esseva tentate in omne maniera justo como nos, ma sin committer peccatos”. Iste ultime texto pone alsi in evidentia quanto il es “taliante” e efficace le Parola de Deo, quando illo denuncia e colpa attitudes a reprochar, del quales sovente non mesmo nos ha conscientia. Isto faceva le Senior Jesus, como nos lo vide in le lectura del evangelio secundo Marco, ubi Ille provoca un persona religiose de bon intentiones con un requesta embarassose que revela quid ille celava in su corde. Iste homine esseva de facto religiose propter motivationes egoista e ille non poneva vermente Deo al prime placia in su vita, como ille haberea debite facer.

Prime lectura: Psalmos 22:1-15

Deo, Deo mie, quare tu me derelinqueva? Quare tu es assi longe de me e de mi gemitos? Deo mie, io clama omne dies, e tu non me ascolta. Cata nocte io leva mi voce, ma io non trova ulle relevamento. Tamen, tu es sancte, inthronate in le laudes de Israel. Nostre ancestres sperava in te e tu les liberava. Illes clamava a te, e tu les salvava. Illes confideva in te e illes esseva nunquam deludite. Ma io es un verme e non un homine; pro le plebe io deveniva un objecto de reproches e de abjection! Omnes qui me vide me irride. Illes surride sarcasticamente e succute lor capites, dicente: “Ille sperava in le Senior: que ille le salva nunc! Si le Senior tanto le ama, que ille veni a su auxilio!”. Quia tu es le qui me extraheva del ventre de mi matre, e me duceva a confider in te quando mi matre me atettava. Io esseva projectate in tu bracios a mi nascentia. Tu esseva mi Deo desde le tempore quando io esseva in le ventre de mi matre. Non remane assi longe de me, quia mi tribulation es proxime e il ha necun altere qui pote adjuvar me! Mi inimicos me circumfere sicut un grege de tauros; fer tauros de Bashan me assediava. Sicut leones, illes aperi lor mandibulas contra me, rugiente e preste a facer de me lor preda. Sicut aqua io es effundite e tote mi ossos es dislocate. Mi corde es como cera que se liqueface intra me. Mi fortias se siccava como argilla cocite sub le Sol. Mi lingua adhere al palato. Tu me faceva jacer in le pulvere como si io haberea essite jam morte.

Secunde lectura: Job 23

“Alora Job respondeva: “Mi querela hodie es ancora amar: su mano se aggravava sur me nonobstante mi gemitos. Si solmente io sapeva ubi io poterea trovar le, io venirea usque al limine de su habitation. Alora io ponerea coram ille mi caso e le presentarea abundante argumentos in mi favor. Tunc io audirea quod ille me responderea e comprenderea lo que ille me dicerea. Esque ille emplearea su grande poter pro contender con me? No! Ille me prestarea attention eque. Ibi gente juste pote certo discuter con ille e assi io esserea pro semper absolvite per mi judice.  Io vade a oriente, ma ille non es ibi. Io vade a occidente, ma io non pote trovar le. Io non le vide in le nord, quia ille se cela. Ille tamen, sape a ubi io vade, e quando ille me pone a proba, io sortira pur como auro. Mi pedes sequeva de facto su vestigios; io semper ambulava sur su via, sin unquam deviar de illo. Io non me retraheva de su commandamentos. Io thesaurisava su parolas plus que omne altere benes.  Ille tamen, quando ille prende un decision, qui poterea unquam facer lo cambiar? Quecunque ille vole facer, ille lo face. Assi ille facera de me quecunque ille planava facer. Ille controla mi destino. Nulle meravilia ergo, que io es terrificate in su presentia. Quando io pensa a isto, le terror me sasi. Deo debilitava mi corde; le Omnipotente me turbava. Tenebras me circumfere; spisse e impenetrabile obscuritate es ubicunque”.

Tertie lectura: Hebreos 4:12-16

Sin dubita, le Parola de Deo es vivente e efficace. Illo es plus acute de omne gladio a duple talia; illo penetra usque a divider le anima ab le spirito, le juncturas ab le medulla. Illo pote judicar le cogitationes e le intentiones del corde. De facto, nulle creatura pote occultar se de Deo, ma toto es nude e aperte al oculos de ille al qual nos debe dar conto. Ergo, nam nos ha un Summe Sacerdote que penetrava le celos, Jesus, le Filio de Deo, vamos tener nos firmemente a nostre confession de fide! Proque nos non ha un sacerdote incapace de compatir nostre infirmitates, quia ille esseva tentate in omne maniera justo como nos, ma sin committer peccatos. Igitur, vamos approchar nos con fiducia al throno del gratia pro reciper misericordia e trovar auxilio quandocunque nos lo necessita!

Quarte lectura: Marco 10:17-31

Ora, quando Jesus comenciava diriger se verso Jerusalem, alicuno accurreva a ille e prosternente se, le diceva: “Bon magistro, que debe io facer pro attinger le vita eterne?”. Jesus le respondeva assi: “Quare tu me appella bon? Nemo es bon si non Deo solmente. Ma, pro responder a tu question: tu cognosce le preceptos: ‘Non occide, non committe adulterio, non fura, non rende testimonio false, non frauda, honora tu patre e tu matre!’”. Le homine replicava: “Magistro, io observava tote isto desde mi juventute”. Fixante su oculos sur celle homine, Jesus sentiva amor genuin pro ille e diceva: “Tu care de un cosa solmente: vade, vende tote lo que tu possede e da le moneta percipite al pauperes, e tu habera un thesauro in le Celo. Deinde veni e seque me!”. In audir isto, celle homine se contristava e se allontanava amarisate, quia ille habeva multe possessiones. Alora Jesus spectava circa se e diceva a su discipulos: “Quanto difficile es pro illes qui ha multe pecunia entrar in le regno de Deo!”. A iste parolas le discipulos esseva multo surprendite, ma Jesus de novo les diceva: “Car filios, quanto difficile es entrar in le regno de Deo! Il esserea plus facile que un camelo transi per le foramine de un aco que un homine opulente entra in le regno de Deo”. Le discipulos esseva mesmo magis surprendite e diceva le unes al alteres: “Alora qui unquam poterea esser salvate?”. Jesus les reguardava e diceva: “Si on considera solmente le aspecto human del question, isto es impossibile, ma non a Deo. Toto es possibile a Deo”. Alora Petro replicava: “Ecce, nos relinqueva toto e te sequeva”. Jesus replicava: “io te dice le veritate: il ha nemo qui relinqueva domo, o fratres, o sorores, o matre, o patre, o filios, o agros propter me e propter le evangelio, qui non recipe nunc in excambio, centos vices de plus quanto a domos, fratres, sorores, matres, filios, e agros – insimul a persecutiones, e in le etate futur le vita eterne. Multes tamen, qui nunc es le plus eminente essera le minus importante tunc, e celles qui pare le minus importante nunc, essera tunc le plus eminente”.

Oration

Oh Deo! Nos roga que semper tu gratia precede e seque nos, e que nos continuemente sia ingagiate in bon obras! Per Jesus Christo, nostre Senior, qui vive e regna con te e con le Spirito Sancte, un sol Deo, nunc e semper. Amen.

Musicas empleate in le programma

  • Prelude in D, BWV 925 (J.S. Bach) – Ramiro Schiavoni
  • Jubilee Octet – Psalm 22 Genevan Psalter (Unison & Four-Part Harmony)
  • Where You There – Jon Bryant
  • Kyrie Eleison – Chris Tomlin
  • I Know that My Redeemer Lives – Scott Soper
  • Cantate Domino Canticum Novum (Hans Leo Hassler) – Voices of Ascension Chorus
  • Amen (Gen Verde, Gen Rosso)