Dominica 11-7-2021 – Lecturas biblic in Interlingua

Dominica le 11 de julio 2021 – al septime dominica post pentecoste

Lecturas biblic: Psalmo 24; 2 Samuel 6:1-19; Ephesios 1:3-14; Marco 6:14-29 – con le voces de Paolo Castellina, Simona Cantarella, Carmelo Serraino, Bob McCarthyPéter Kovács.

Le populo de Deo ha multe rationes pro laudar e regratiar Deo, le Senior, propter le gratia que le esseva accordate de esser a Su servicio in iste mundo. Sin dubita, il se tracta de un grande responsabilitate, e le cargas que lo es fidite es timibile, a causa del fortia de su adversarios. Omne effortios e sacrificios facite pro Deo, tamen, non essera unquam inutile, quia le propositos de Deo essera semper complite. Le Psalmo 24, que aperi le lecturas de hodie, celebra le soveranitate, splendor e potentia de Deo. In le secunde lectura nos vide le populo de Deo que celebra con cantos e dansas le ingresso del Arca del Alliantia, signo del presentia de Deo in lor medio, in le citate de Jerusalem, centro de irradiation del Regno de Deo. Le grande benedictiones que le gratia de Deo nos accordava in Christo es celebrate in le tertie lectura. In le vicissitudes, finalmente, de Johannes le baptisator, terminate tragicamente, nos vide un eminente servitor de Deo qui compli fidelmente su carga prophetic sin timer le menacias del potentes de iste mundo, secur que su martyrio non essera inutile. Si, le populo de Deo ha multe rationes pro laudar e regratiar Deo, le Senior, propter le gratia que le esseva accordate de esser a Su servicio in iste mundo. 

Prime lectura: Psalmo 24

Iste mundo esseva create per Deo e lo sustene. Toto pertine a Ille e Ille es soveran super omne cosas. Nos, esseres human, ha essite create qua administratores e developpatores de iste mundo, secundo Su regulas, e nos debera render conto a Ille de nostre administration. Le scriptor de iste Psalmo affirma e celebra le regalitate universal del soveran Creator, e rememora a Su populo que solmente personas moralmente pur es qualificate pro servir Le. Finalmente Ille celebra Su splendor e potentia.

“Al Senior pertine le terra e tote lo que illo contine, le mundo e toto lo que lo habita. Pois que ille poneva le fundamentos del terra in le mares e lo edificava ab le profunditates del oceanos. Qui pote ascender al monte del Senior? Qui pote star in su loco sancte? Solmente illes, cuje manos e cordes es pur; illes qui non adora idolos e qui compli fidelmente lor promissas. Solmente tal personas recipera le benediction del Senior e essera declarate juste per Deo, lor salvator. Le generation de illes qui quere su favor es characterisate de tal puressa e te adora in tu presentia ipse, oh Deo de Jacobo. Aperi vos, portas antique! Aperi vos, ostios eterne! Face entrar le Rege gloriose! Qui es iste Rege gloriose? Ille es le Senior, forte e potente, le Senior, invincibile in guerras. Aperi vos, portas antique! Aperi vos, ostios eterne! Face entrar le Rege gloriose! Qui es iste Rege gloriose? Le Senior del armeas celeste: ille es le Rege gloriose.”.

Secunde lectura: 2 Samuel 6:1-19 – Le transferimento del Arca a in Jerusalem

Le Arca del Alliantia esseva le symbolo sacre del presentia de Deo in le medio de Su populo e del terminos del pacto ab le qual dependeva lor identitate e mission. Depost le inthronisation del magne rege David, illo debeva esser transportate con grande respecto in le citate capital, Jerusalem. Le sequente conto parla del vicissitudes concernente su transferimento inter cantos de gaudio e le dansas del populo. Iste gaudio es participate per Rege David ipse, qui non se vergonia de unir se al dansas. Su uxor Michal, tamen, propter isto, critica severmente David. Que poterea unquam haltar, tamen, le gaudio del credente qui exulta in su Senior?

“Alora David congregava itero ex Israel omne su truppas melior: illos esseva trenta milles homines in toto. Inde, David les conduceva a Baala de Juda ut reportar le Arca de Deo, super le qual es invocate le nomine de Deo, inthronate inter le cherubines. Illes placiava le Arca de Deo sur un carro nove e lo portava ab le domo de Abinadab, que esseva super un colle. Uzza e Ahio, le filios de Abinadab, guidava le carro nove. Illes lo portava con le Arca de Deo ab le domo de Abinadab, que esseva sur un colle. Ahio marchava ante le Arca, durante que David e tote le populo de Israel celebrava con grande enthusiasmo coram le Senior, cantante e sonante varie instrumentos de corda, tamburinos, castaniettas e cymbalos. Quando, tamen, illes perveniva a in le area de disgranamento de Nacon, le boves que trainava le carro faceva un passo false, e Uzza extendeva su mano pro sustener le Arca de Deo e impedir lo de cader sur le terra. A causa de isto, propter su temeritate, le indignation irate del Senior se piccava contra Uzza, le percuteva e ille moriva ibi juxta le Arca de Deo. David esseva multo contristate proque le ira del Senior habeva talmente erumpite contra Uzza; assi ille nominava ille placia Perez Uzza (que significa “erumper contra Uzza”) e iste nomine remaneva usque hodie. David comenciava nunc haber pavor del Senior e diceva: “Como poterea io unquam portar le Arca del Senior sub mi custodia?”. Assi, David decideva de non plus transportar le Arca del senior in le Citadella de David. Al contrario, ille lo relinqueva in le domo de Obed-Edom de Gath. Le Arca del Senior remaneva in le domo de Obed-Edom de Gath pro tres menses e le Senior benediceva Obed-Edom e su familia integre. Deinde a Rege David esseva dicite: “Le Senior benediceva le familia de Obed-Edom e tote lo que ille possede propter le Arca de Deo. Assi David vadeva ibi e faceva transportar le Arca de Deo ab le domo de Obed-Edom al Citadella de David con grande celebration. Postquam illes qui portava le Arca de Deo habeva progredite sex passos, David immolava in sacrificio a Deo un bove e un vitello ingrassiate. E David dansava con grande enthusiasmo coram le Senior portante solmente un vestimento sacerdotal de lino. Assi David e tote le populo de Israel portava le Arca de Deo con critos de gaudio e sonante cornos de ariete.

Quando tamen le Arca del Senior entrava in le Citadella de David, Michal, le filia de Saul reguardava ab un fenestra del palatio. In vider Rege David qui saltava e dansava coram le Senior, illa esseva implite de contempto pro ille. Illes introduceva le Arca de Deo e lo poneva in le medio del tenta special que David habeva preparate pro illo. E David sacrificava holocaustos e offertas de pace al Senior. Quando ille terminava offerer holocaustos e offertas de pace, David benediceva le populo in le nomine del Senior del universo. Pois ille dava a cata un homine e un femina israelita in le turba un pan, un torta de dattilos, e un torta de uva. Deinde tote le populo retornava a lor proprie domos”.

Tertie lectura: Benedictiones spiritual in Christo

Le benedictiones spiritual de pertiner al populo de Deo es innumerabile. Iste texto los pone in evidentia pro suscitar feritate e determination in complir su responsabilitates. Le credente discoperi haber essite predestinate per Deo, in Su gratia, a iste privilegios extraordinari. Ille discoperi haber essite adoptate qua filio e rendite coherede de Christo. Ille discoperi, super toto, esser amate per Deo, le qual nihil sparniava pro haber le con Se. Le sigillo del Spirito Sancte, finalmente, confirma iste benedictiones, que nemo e nihil potera plus remover los de ille.

“Benedicite sia le Deo e Patre de nostre Senior Jesus Christo, qui nos benediceva con omne

benedictiones spiritual in le sphera celeste in Christo, sicut ille nos eligeva in Christo ante le fundation del mundo, a fin que nos sia sancte e immaculate coram ille in amor. Ille lo faceva per predestinar nos al adoption qua su filios per Jesus Christo, secundo le consentimento de su voluntate – a laude del gloria de su gratia, que ille gratuitemente nos confereva in su amatissime Filio. In ille nos ha le redemption per su sanguine, le remission de nostre peccatos secundo le ricchessas de su gratia – gratia que ille nos dava a profusion in omne sapientia e intelligentia. Ille lo faceva quando ille revelava le mysterio de su voluntate, le consentimento de lo que ille se proponeva e publicamente manifestava in Christo, illo es que, in le completion del tempores, ille haberea recapitulate omne cosas in Christo – tanto lo que es in celo quanto lo que es sur le terra. In Christo nos alsi esseva reclamate qua possession de Deo ipse, habente essite predestinate secundo le proposito de ille qui opera omne cosas secundo le consilio de su voluntate, a fin que nos, qui esseva le primes a poner nostre sperantia in Christo, sia pro laude de su gloria. Quando pois vos audiva le parola del veritate (le Evangelio de vostre salvation) – quando vos credeva in Christo – esseva ponite sur vos le sigillo promittite, le qual es le pignore de nostre hereditage, usque al redemption de lo que a Deo pertine, a laude de su gloria”.

Quarte lectura: Marco 6:14-29 – Le morte de Johannes le baptisator

Le vicissitudes de Jesus es ligate a illos de Johannes le baptisator, ultime e le plus eminente inter le prophetas. Iste texto conta re su fin tragic, victima del poter politic que ille nunquam cessava condemnar propter su abusos e injustitias. Herode, regnante corrupte e sin scrupulos, serviva solmente se ipse e su interesses private, ma le voce del propheta nunquam cessa succuter su conscientia, mesmo quando Herode se disface de ille.

“Ora, Rege Herode audiva re Jesus, quia omnes parlava de ille. Alcunos diceva: “Iste homine debe esser Johannes le baptisator qui resurgeva ab le mortos. Isto es le ration proque ille pote facer tal miraculos”. Alteres diceva: “Ille es le propheta Elia”. Ancora alteres diceva: “Ille es un propheta simile a altere magne prophetas del passato”. Quando, tamen, Herode audiva isto, ille diceva: “Johannes, qui io ha facite decapitar, ha retornate ab le mortos!”. De facto, Herode mesme habeva mandate milites pro arrestar e imprisionar Johannes qua un favor rendite a Herodiade. Illa habeva essite le uxor de su fratre Philippo, ma Herode se habeva maritate con illa. Johannes habeva repetitemente dicite a Herode: “Il es un infraction del lege de Deo prender pro te le uxor de tu fratre”. Il es pro iste ration que Herodiade habeva multe despecto contra Johannes e le voleva occider. Sin le approbation de Herode, tamen illa non poteva facer alco, quia Herode habeva timor de Johannes e le protegeva, durante que ille sapeva que Johannes esseva un homine juste e sancte. Quando de facto Herode le audiva parlar ille esseva multo disconcertate, ma, nonobstante ille esseva fascinate in audir su discursos. Le opportunitate veniva pro Herodiade in occasion del die natal de Herode, quando esseva organisate un banchetto pro ille e su officieros de corte, commandantes militar e personas eminente de Galilea. Alora su filia, cuje nomine esseva alsi Herodiade, entrava e faceva un dansa que grandemente placeva a Herode e a su convitatos. Le rege diceva al puera: “Pete me quecunque tu amarea haber e io te lo dara”. Ille mesmo faceva un juramento: “Quecunque tu petera io te lo dara, mesmo le medietate de mi regno!”. Assi illa exiva e demandava a su matre: “Que deberea io peter?”. Su matre la respondeva: “Pete le capite de Johannes le baptisator!”. Subito illa se hastava retornar al rege e le faceva iste requesta: “Io vole le capite de Johannes le baptisator hic e nunc sur un platto!”. Le rege esseva multo contristate de un tal requesta, ma ille non voleva refusar lo propter su juramento e su convitatos. Assi le rege immediatemente mandava un carnifice al prision pro taliar le capite de Johannes e portar lo a ille. Le milite decapitava Johannes in le prision, portava su capite sur un platto, lo dava al puera, e le puera lo portava a su matre. Quando le discipulos de Johannes audiva re lo que il habeva occurrite, illes veniva prender su corpore e lo inhumava in un tumba”.

Oration

Oh Senior, recipe misericordiosemente le precarias de tu populo qui te invoca, e face que illes sape e comprende lo que illes debe facer! E habe le gratia e le poter de complir los fidelmente! Per Jesus Christo, nostre Senior, qui vive e regna con te e con le Spirito Sancte; un sol Deo; nunc e semper. Amen.

Musicas empleate in iste programma

  • Brookfield (Celtic Hymns), Our Daily Bread
  • Salmo 24 (Melodia ginevrina) Ernst Stolz, strumentale
  • Praise the Lord, the Almighty (Phil Keveren, A. Lamarchina)
  • Jesus, Keep me Near the Cross (Chun Jiyoun, Park Sanghyun)
  • Alleluia, alleluia, alleluia (Instrumental Christian Songs, Christian Piano Music)
  • Blessings (David Tolk)