Dominica 12-9-2021 – Lecturas biblic in Interlingua

Dominica, le 12 de septembre 2021 – le dece-sexte dominica post Pentecoste

Lecturas biblic: Psalmo 19; Proverbios 1:20-33; Jacobo 3:1-12; Marco 8:27-38 – con le voces de Paolo Castellina, Simona Cantarella, Carmelo Serraino,  Péter Kovács

Introduction al lecturas biblic

Quomodo se revela Deo? Per le medio del leges que Ille establiva pro regular le universo create. Illos es le leges que le scientia studia. Deo se revela alsi per le medio de Su Lege moral, radicate in nos, que sovente nos supprime o distorque. Iste lege moral es proclamate in le Sacre Scripturas hebraic e christian. Le creato e le Lege de Deo es le duo fontes de revelation celebrate per le Psalmo 19, nostre prime lectura de hodie. Honorar e sequer lo que Deo establiva pro nostre vita es synonimo de sapientia (o sagessa), representate in le secunde lectura, ex le libro del Proverbios, como un femina sage que voca “per le vias e le placias” a conformar nos a illo e non esser personas stulte. Il ha, tamen, multe personas in iste mundo qui pretende al rolo de maestro e illes es multo loquace. Ex lor bucca proveni “le dulce e le amar”, dice nos le apostolo Jacobo in nostre tertie lectura. Pro isso, il es necesse que nos exerce discernimento diligente. Un tal discernimento non lo habeva le opinion public al tempores de Jesus, que miscomprendeva Su Persona, Parola e obras. Solmente un “aure de discipulo” (Isaia 40:5-5) pote conducer nos discoperir le veritate re Jesus, Parola vivente de Deo, e confessar nostre fide in Ille. Isto es lo que presenta nos le quarte lectura, trahite ex le evangelio secundo Marco. Vamos, ergo, ascoltar.

Prime lectura: Psalmo 19

Le celos declara le gloria de Deo, e le firmamento annuncia le obra de su manos. Die post die illos continua parlar; nocte post nocte illos face cognoscer lor creator. Illos parla, mesmo sin sonos o parolas; lor voces jammais se audi. Tamen, lor message echoa in omne partes del Terra; lor parolas se diffunde usque al horizonte le plus lontan. In le celos Deo poneva un habitation pro le Sol. De illo illo sorti gloriose sicut un sponso de su lecto nuptial. Illo exulta sicut un athleta qui vince su cursa. Le sol surge ab un confinio del celos e procede in su curso usque al altere confinio. Nemo pote occultar se de su calor. Le lege del Senior es immaculate, illo revivisce le anima; le testimonio del Senior es digne de fiducia, illo rende sapiente personas naive. Le commandamentos del Senior es juste, illos illumina le oculos. 9Le respecto pro le Senior imparti puritate, illo es un valor permanente. Le leges del Senior es ver, cata un de illos es juste. Illos es multo plus desirabile del auro, multo plus del petras preciose. Illos es plus dulce que le melle, del melle que stilla ab le favos. Illos servi de admonition pro me, tu servitor, e da grande recompensas a illes qui los obedi. Como poterea io deteger tote le peccatos que se occulta in mi corde? Munda me de iste celate faltas! Preserva me, tu servitor, del peccatos de superbia, que illos non me domina! Alora io essera immaculate e innocente de grave peccatos. Que le parolas de mi bucca e le meditation de mi corde te sia agradate, oh Senior, mi adjutor e mi redemptor!

Secunde lectura: Proverbios 1:20-33 – Le appello del sapientia

Le sapientia advoca per le stratas; illa crita a alte voce in le placias. In capite de vias ruitose illa clama; al entrata del portas del citate illa proclama: “Quanto longemente ancora vos naive amara le naivitate? Quanto longemente ancora vos, irrisores delectara vos in le irrision, e le imbecilles odiara le cognoscentia? Si solmente vos responde a mi correction, alora io effundera in vos mi pensamentos e io facera vos comprender mi parolas. Tamen, quia io vos vocava, ma vos declinava de audir, e io extendeva mi mano pro facer vos approximar, ma vos non prestava attention; quia vos negligeva tote mi consilios e non obsequeva a mi correction, un die il essera io a rider quando le disgratia venira super vos, il essera io a burlar me de vos quando le terror que vos time colpara vos como un tempesta devastante, quando tribulation e calamitate vos advenira. Tunc illes invocara me, ma io non respondera; illes querera de me, ma non me trovara: isto evenira proque illes odiava le cognoscentia moral, e non seligeva le timor del Senior; illes non obsequeva mi consilio, illes repelleva mi exhortationes. Igitur illes mangiara del fructo amar de lor conducta e essera stipate plenmente de lor proprie consilios. De facto a occider le insensates essera lor obstination ipse; il essera lor indolentia a destruer le imbecilles. Tamen, qui me presta attention vivera in securitate, in pace e sin pavor de esser damnificate.

Tertie lectura: Dominar le lingua

Mi car fratres, non multes de vos deberea devenir magistros [in le ecclesia], quia nos qui insenia va esser judicate con major rigor. Vero, nos omnes face multe errores e si nos solmente poteva tener a freno nostre lingua, nos esserea perfecte e poterea alsi dominar tote le resto de nostre corpores. De facto, quando nos pone le brida al bucca del cavallos a fin que illos nos obedi, nos pote governar lor corpores. Pensa anque al naves: mesmo si illos es grande e le ventos es forte, con un parve governaculo le pilota pote diriger lo ubicunque ille vole. In le mesme maniera, benque le lingua es un parve membro del corpore, illo se gloria de grande cosas! Ma un parve scintilla pote incendiar un grande foresta! E le lingua es un foco! Il es le lingua que, inter le membros de nostre corpores representa un mundo de malitia que pote corrumper vostre corpores integre e incender le curso del existentia human, proque illo es inflammate per le inferno ipse. Quia le specie human doma e domava omne sorta de animales, ave, reptile e creatura del mar, ma nemo pote subjugar le lingua: illo es un mal febril, plen de veneno mortifere. Con illo nos benedice le Senior e Patre, e con illo nos maledice homines, que es facite ad similitude de Deo. Ex le mesme bucca proveni le benediction e le malediction. Certo illo non debe esser assi, fratres mie! Un fonte non pote emanar, sia aqua dulce que aqua amar ex le mesme foramine. Fratres mie, un fichiero non pote producer olivas, o un vinia producer ficos, nonne? E non mesmo un fonte de aqua salate pote facer aqua dulce.

Quarte lectura: Marco 8:27-38

Deinde Jesus e su discipulos quitava Galilea e ascendeva verso le villages apud Cesarea Philippi. Dum illes camminava, ille les demandava: “Quem dice le gente que io es?”. Illes respondeva: “Johannes Baptista, alteres dice Elia, e ancora alteres, un del cetere prophetas”. Jesus les demandava ancora: “Ma vos, quem dice vos que io es?”. Petro replicava: “Tu es le Christo”. Alora ille les preveniva severmente de non parlar re isto a alicuno.

Alora Jesus incipeva docer les que le Filio del Homine debera patir multo e esser reprobate per le seniores, le summe sacerdotes e le expertos del Lege, esser occidite e, post tres dies, resurger. Ille parlava francamente re isto. Assi Petro le prendeva a parte e incipeva reprochar le. Jesus tamen se verteva e, reguardante su discipulos, reprochava Petro e le diceva: “Vade retro, Satan, quia tu vide le cosas simplemente del puncto de vista human e non del puncto de vista de Deo!”.

Deinde Jesus, habente convocate le turba con su discipulos, les diceva: “Si alcuno vole sequer me, que ille denega se ipse, prende su cruce e seque me! De facto, quicunque vole salvar su vita lo perdera, ma quicunque perde su vita propter me e le evangelio, lo salvara. Qual beneficio poterea unquam haber un homine si ille lucra le mundo integre ipse a detrimento de su anima? Quid poterea un homine dar in excambio pro su anima? Si alcuno se vergonia de me e de mi parolas in iste generation plen de adulterios e de peccatos, anque le Filio del homine se vergoniara de ille quando ille retornara in le gloria de su Patre con le angelos sancte”.

Oration

Oh Deo, quia sin te nos non pote placer te, concede nos, in tu misericordia que tu Spirito Sancte dirige e governa nostre cordes! Per Jesus Christo, nostre Senior, qui vive e regna con te e con le Spirito Sancte – un sol Deo, nunc e semper. Amen.

Musicas empleate in iste programma

  • Prelude and fugue in D Major (J. S. Bach, BWV 850) Vikingur Olafsson
  • Psalm 19 a capella, Genevan Psalter (Anglese)
  • Christ is Made a Sure Foundation (Henry Purcell)
  • Immortal, Invisible, God Only Wise (Gloucester Cathedral Choir)
  • Jesus, Joy of Man’s Desiring (J. S. Bach) – Andrei Krilov
  • Stad Van Goud (Rianne Von Roon)
  • Voluntary for organ and Trumpet (Purcell)