Dominica 13 Decembre 2020 – Lecturas biblic

Dominica, le 13 de Decembre 2020 – Tertie dominica de Advento

Lecturas biblic: Psalmo 126; Isaia 61:1-4, 8-11; 1 Tessalonicenses 5:16-24; Johannes 1:6-8,19-28 con le voces de Paolo Castellina, Simona Cantarella, Bob McCarthy, Carmelo Serraino.

Le causa del gaudio e del recognoscentia pro le advenimento del Senior e Salvator Jesus Christo, echoa in le lecturas biblic de iste tertie dominica de Advento. Se tracta de un gaudio que a pena pote comprender qui nunquam faceva le experientia del obra del Christo in lor vita. Tamen, isto es un invitation a aperir le corde al meravilia exprimite per le Psalmo 126, le meravilia que habeva qui habeva vidite con lor proprie oculos le retorno del exiliatos hebree in le terra del promissa. Isto se connecte al promissa de authentic consolation e resanamento per le medio del obra del Salvator, sicut es testificate in le prophetia de Isaia 61. Isto es alsi le invitation que echoa, finalmente, in le parolas del ultime propheta, Johannes Baptista, qui nos parla in le lectura del Evangelio secundo Johannes. Vamos reciper lo, nos alsi, con gaudio.

I. Psalmo 126

In iste Psalmo, le autor lauda Deo, qui es fidel a Su promissas, pro le grande cosas que Ille faceva pro Israel, Su populo, in facer lo retornar in le terra que Ille les habeva promittite. Isto les pareva un facto impossibile, ma illo se realisava. Isto es le mesme meravilia que prende le christiano quando ille vide pervenir al conversion a Christo personas que ille nunquam credeva que un die les haberea occurrite. E isto es alsi le meravilia de qui vide le successo de su fatigas al servicio de  Deo.

“Quando le Senior reportava a Sion le exiliatos, il nos pareva un sonio! Tunc nostre ores se replenava de critos de gaudio e nostre linguas cantava de exultation. Tunc le altere nationes diceva: ‘Le Senior compliva grande cosas pro illes!’. Si, le Senior compliva cosas impressionante pro nos! Qual gaudio! Restabli nostre ben-esser, oh Senior, sicut torrentes da vita al deserto. Qui planta con lacrimas recoltara con exultation. Qui plora portante su sacco de semines a disperger, certo retornara portante fasces de frumento”.

II. Isaia 61:1-4, 8-11

Iste texto antique del propheta Isaia, vide in perspectiva historic, le obra del Messia, quam Ille qui salva, resana e consola. Le advenimento del Messia in le Persona de Jesus Christo compliva iste prophetia. Ille rendera complete lo que ille comenciava facer, in Su secunde advenimento. Su populo pote, hodie e ancora deman, laudar Deo con le gaudiose parola que conclude iste texto.

“Le Spirito del Senior Deo es super me, quia le Senior me commissionava pro annunciar bon novas al mansuetes, pro curar le plagas del contrite de corde, pro decretar le liberation del captivos e le apertura del carcere al reclusos. Ille me appunctava pro annunciar le tempore in le qual le Senior va manifestar les su favor, va consolar omne lugentes e, conjunctemente, su vengiantia contra lor inimicos. A omne lugentes in Sion, ille dara le corona del jubilo pro le cineres del affliction, le oleo del allegressa pro le lucto, le roba del festa pro un spirito de amaritude. Illes essera appellate quercos de justitia, arbores plantate pro manifestar le gloria del Senior. Illes reedificara le antique ruinas, reparante citates destruite pridem. Illes reviviscera los, quanquam illos remaneva deserte per multe generationes. […]. Quia io, le Senior, ama le justitia. Io odia le rapina e le iniquitate. Fidelmente io recompensara mi populo pro lor suffrentias e establira con illes un pacto permanente. Lor descendentes recipera recognoscimento e honor inter le nationes. Omnes comprendera que illes es le populo que le Senior ha benedicite. Me sasi un grande gaudio in le Senior! Mi anima exulta in mi Deo! Quia ille me vestiva con le roba del salvation e me drappava con le vestimento del justitia. Io es simile a un sponso in su vestimentos de nuptias o a un sponsa ornate con su joieles. Le Senior Deo va monstrar su justitia al gentes del mundo. Omnes le laudara! Su justitia essera como un jardin in primavera, con plantas que germina ubique”.

III. 1 Tessalonicenses 5:16-24

Al christianos de Thessalonica, qui expectava con anxietate le imminente retorno de Christo, le apostolo Paulo parla re le necessitate de un conducta inspirate a sanctitate de vita. Illes esseva appellate esser un testimonio vivente del character ipse del Senior que illes expectava. in iste epistola, le Apostolo revela detalios concernente como essera le ultime tempores de iste mundo corrupte e destinate al perdition. In le mesme tempore, tamen, ille indica los que debe esser, in omne circumstantia, le characteristicas del christiano, tunc e hodie alsi.

“Gaude semper. Preca sin intermission. In toto rende gratias. Isto es le voluntate de Deo pro vos in Jesus Christo. Non extingue le Spirito. Non tracta le prophetias con disprecio, ma examina toto e retene lo que es bon. Abstine vos de omne specie de mal. Ora, que le Deo del pace sanctifica vos completemente, e que vostre spirito, anima e corpore sia conservate integremente irreprehensibile pro le advenimento del Senior nostre Jesus Christo. Completemente digne de fide es le qui vos voca e ille de facto lo facera”.

IV. Johannes 1:6-8,19-28

Iste portion del Evangelio decundo Johannes presenta le persona e le message de Johannes Baptista, le precursor del Christo, le ultime propheta. Johannes Baptista es le teste qui, distrahente le attention de su audientia ab se ipse, adressa nos al Persona e obra del Salvator e Lumine de iste mundo. Johannes Baptista es le modello e exemplo de qui, ancora hodie, annuncia al mundo que non lo cognosce (o que lo cognosce incorrectemente), le Evangelio christian.

“Il habeva un homine, mandate de Deo, cuje nomine esseva Johannes. Ille veniva pro render un testimonio, pro testificar al Lumine, a que omnes haberea credite per ille. Ille mesme non esseva ille Lumine, ma ille esseva mandate a testificar de ille Lumine […] Ora isto esseva le testimonio de Johannes, quando le autoritates judaic inviava sacerdotes e levitas ab Jerusalem a demandar le: “Qui es tu?”. Ille confessava – ille non lo denegava, ma lo confessava – “Io non es le Christo!”. E illes le demandava: “Qui es tu, alora? Es tu Elia?”. Ille diceva: “Io non le es”. “Es tu le Propheta?”. Ille respondeva: “No”. Alora illes le diceva: “Qui es tu? A que nos pote dar un responsa a les que inviava nos. Que dice tu de te ipse?”. Johannes diceva: “Io es un voce critante in le deserto: ‘Rectifica le via del Senior’ como diceva Isaia le propheta”. (Ora illes esseva inviate per le Phariseos). Assi illes demandava a Johannes: “Proque alora tu baptisa si tu es ni le Christo, ni Elia, ni le Propheta?”. Johannes les respondeva: “Io baptisa con aqua: ma inter vos sta uno que vos non recognosce e qui veni post me. Io non es digne mesmo de disligar le lacios de su calceaturas!”. Iste cosas eveniva in Bethabara, trans le Jordan, ubi Johannes baptisava”.

Oration

Evelia tu potentia, oh Senior, e veni inter nos con grande fortia; e justo proque nos es gravemente obstaculate propter nostre peccatos, que tu gratia generose e misericordia veni rapidemente a adjutar e liberar nos; per Jesus Christo, nostre Senior, al qual, con te e con le Spirito sancte, sia omne honor e gloria, nunc e pro semper. Amen.