Dominica 14-11-2021 – Lecturas biblic in Interlingua

Dominica, le 14 de novembre 2021, le vinti-quinte dominica post Pentecoste

Lecturas biblic: 1 Samuel 2:1-10; 1 Samuel 1:4-20; Hebreos 10:11-25; Marco 13:1- 8 con le voces de Paolo Castellina, Simona Cantarella, Carmelo Serraino,  Bob McCarty, Péter Kovács

Introduction al lecturas

Il ha un differentia substantial inter le libros de historia que on nos face studiar in scholas e le Biblia. Le primes parla nos re le interprisas del potentes de iste mundo, de lor cortes e del grande edificios que illes faceva construer a lor gloria. Al contrario, le Biblia nos parla del vicissitudes del personas commun qui, al oculos del mundo, ha nulle importantia – excepte pro esser exploitate al servicio del primes. De facto, le parves, le debiles, le miseres, pro le contos biblic, surge al importantia le plus grande. Illes es le protagonistas qui determina le historia que ha le importantia major, illo del propositos de Deo. Durante que le orgolio e le arrogantia es frangite e humiliate per le judicio de Deo, le Biblia exalta personas como Anna, un femina “sin signification” e “provincial”, e mesmo sterile e opprimite, cuje cantico de laude e recognoscentia es le objecto de nostre prime lectura. Illa regratia al Senior quia le Senior la eligeva pro generar, justo illa qui esseva sterile, un homine qui haberea essite significative pro le developpamento del historia de Deo, le propheta Samuel. In iste cantico, Anna pone in evidentia le obra de Deo, qui humilia le potentes e exalta le humiles. Le secunde lectura parla de su affliction, de su precaria appassionate e de como Deo non solmente exaudi su rogation, ma como illa consecra su filio al servicio de Deo e a su futur rolo in le historia del salvation. Il se tracta del mesme historia que culminara, a su tempore, con le vicissitudes de Jesus de Nazareth, qui esseva extranee al castas del poter civil e religiose, ma qui, nonobstante, devenira le sol e unic Summe Sacerdote per le medio del qual nos pote acceder a Deo. Per iste maniera, le pretentiones del religiones de iste mundo es avergoniate. Isto es demonstrate per nostre quarte e ultime lectura, trahite ex le evangelios. Quando Jesus exi con su discipulos del templo de Jerusalem e de toto lo que illo representa, e pro semper, ille lo derelinque a su destino tragic, prophetisante su destruction. In le mesme tempore ille admonesta su discipulos a non lassar se fascinar del magnificentia de edificios imponente e liturgias, quia le historia de Deo, illo que ha importantia major, seque vias multo differente de lo que iste mundo, in su vanitate tanto apprecia. Isto es un utile admonition etiam pro nos: le perspectiva vincente es illo de Deo. Qual nos seligera?

Prime lectura: 1 Samuel 2:1-10 – Cantico de Anna

Alora Anna assi orava: “Mi corde exulta in le Senior. Mi Deo me ha fortificate. Nunc io ha un responsa a dar a mi inimicos, quia io me allegra de tu salvation. Nemo es sancte como le Senior, ni il ha un altere extra te. Il ha nulle rocca tanto forte, quanto nostre Deo. Cessa vostre discursos grandiloquente e superbe! Que nunquam plus se audi de vostre ores discursos arrogante, quia le Senior es un Deo qui sape lo que vos faceva: ille judicara vostre actiones! Le arco del guerrero forte es frangite, e illes qui faceva passos false nunc es forte. Illes qui esseva ben nutrite, nunc quere laborar pro ganiar lor pan, ma le famelicos es nunc satiate. Le femina sterile nunc ha septe infantes, e le femina qui habeva multe filios nunc deperi. Le Senior mortifica e vivifica; ille jecta alcunes in le inferno e alteres les resuscita. Le Senior rende paupere alcunes e alteres ille rende ric; ille humilia alcunes e exalta alteres. Ille realtia le pauperes ab le pulvere; ille eleva le pauperes ab le stercore e les face seder con le princes, placiante les sur le sedes de honor. Le fundamentos del Terra pertine al Senior – ille poneva le mundo sur illos. Ille protege su sanctos, ma le impios disparera in le tenebras, quia il non es propter nostre fortia que nos prevalera. Le Senior fracassa su adversarios; del Celo ille tonitrua contra illes. Le Senior exeque su judicio per tote le Terra. Ille da poter a su rege; ille exalta le poter de su Uncto”.

Secunde lectura: 1 Samuel 1:4-20

Quandocunque veniva pro Elkana le die de offerer sacrificios, ille habeva le costume de dar a su sposa Peninna e a su filios e filias un portion del carne del sacrificios. Ma a Anna, su altere uxor ille reservava de illo le partes melior, proque Anna esseva su favorite e voleva consolar la del facto que le Senior la habeva lassate sterile. Su rival Peninna velle facer la sovente observationes sarcastic e la affligeva proque le Senior la habeva lassate sin filios. Peninna se comportava assi anno post anno. Quandocunque Anna montava al sanctuario del Senior, Peninna mortificava Anna. Alora Anna plorava e refusava mangiar. Elkana, su marito, la diceva: “Anna, proque plora tu e non mangia? Proque es tu tanto triste? Esque io, pro te, non es forsan melior que dece filios?”. Un vice a Shilo, depost le repasto sacre, Anna se levava e se dirigeva al sanctuario del Senior. Le sacerdote Eli sedeva sur un tabouret al entrata del sanctuario. Anna, plen de amaritude, plorava desolatemente e precava al Senior. Illa faceva un promissa al Senior: “Senior del universo, si tu reguardara con compassion le suffrentia de tu serviente e me da un filio, ille essera consecrate a te pro tote le dies de su vita – io te le offere. Como signo de su consecration a te, su capillos non essera jammais taliate ”. Durante que illa precava al Senior de maniera insistente, Eli reguardava le bucca de Anna. Anna parlava interiormente, in su corde; illa moveva su labios, ma nemo poteva audir su parolas. Eli, dunque, pensante que Anna esseva avinate, se approchava a illa e la diceva: “Quanto longemente pensa tu de remaner hic, ebrie como tu es? Jecta via tu vino!”. Anna le respondeva: “Oh no, mi senior! Io es un femina multo tribulate. Io bibeva ni vino, ni alcun altere biberage alcoholic. Io solo effundeva mi anima coram le Senior. Non considera tu serviente un femina insensate! Io me exprimeva assi proque io es multo triste e abattite”. Eli alora la diceva: “In ille caso, vade in pace, e que le Deo de Israel te concede lo que tu peteva de ille!”. Illa respondeva: “Mi senior, que io semper remane in tu favor!”. Anna assi, prendeva congedo e, plus tarde mangiava de novo. Su facie non pareva plus le mesme de antea: su tristessa era disparite”. Le matino sequente illes se levava mane e, depost haber adorate le Senior retornava a su casa, a Rama. Quando Elkana se conjungeva con Anna, le Senior exaudiva su supplica. Depost un certe tempore Anna deveniva pregnante e parturiva un filio e le nominava Samuel, proque illa diceva: “Io le peteva al Senior” .

Tertie lectura: Hebreos 10:11-25

Sub le vetere pacto le sacerdote sta e ministra die post die ante le altar, offerente semper de novo le mesme sacrificios que nunquam pote eliminar le peccatos. Ma nostre Summe Sacerdote ha offerite se ipse como un singule sacrificio pro le peccato, un sacrificio que ha eterne validitate. Deinde ille se assideva in le placia de honor, al dextera de Deo. Ibi ille expecta que su inimicos sia humiliate e rendite un scabello pro su pedes. Quia per ille unic sacrificio ille rendeva perfecte illes que es sanctificate. Le Spirito Sancte alsi testifica que il es assi, quia ille dice: “Isto es le nove pacto que io establira con mi populo post ille dies, dice le Senior: Io ponera mi leges in lor cordes, e in lor mentes io los superscribera”. Inde ille dice: “Io non plus me recordara de lor peccatos e iniquitates”. E quando le peccatos ha essite remittite, il non ha plus un necessitate de offerer altere oblationes pro le peccato.

Assi, car mi fratres e sorores, nunc nos pote hardir entrar in le Loco Sanctissime propter le sanguine de Jesus. Per le medio de su morte Jesus aperiva pro nos un via nove e vivente trans le cortina, illo es su corpore, a in le Loco Sanctissime. Nam nunc nos ha un tal magne Summe Sacerdote super le Domo del Senior, vamos acceder al presentia de Deo con cordes sincer, confidente plenmente in ille! Quia, pro purificar nos, nostre culpabile conscientias ha essite aspergite del sanguine del Christo e nostre corpores esseva lavate con aqua munde. Vamos tener nos strictemente, sin vacillar, al sperantia que nos confessa, quia nos pote haber fiducia que ille remane fidel a su promissas! Vamos considerar manieras de motivar le unes le alteres a actos de amor e bon obras! Vamos non negliger nostre congregationes, sicut il es le consuetude de alicunos, specialmente nunc que le die de su retorno es proxime!

Quarte lectura: Marco 13:1-8

Ora, durante que Jesus quitava ille die le Templo, un de su discipulos le diceva: “Magistro, respice que lapides e que structuras!”. Jesus replicava: “Si, sin dubita illos es edificios magnific, ma non mesmo un de iste lapides essera lassate sur le altere! Un die, toto essera destruite!”. Plus tarde, Jesus sedeva sur le Monte del Olivos contra le Templo. Petro, Jacobo, Johannes e Andreas le questionava separatemente e le demandava: “Dice nos: quando evenira iste cosas? Qual signos nos videra que indicara que tal cosas es sur le puncto de complir se? Jesus incipeva dicer les: “Sia alerte a fin que nemo vos seduce! Multes venira in mi nomine, dicente: “Io es le Messia” e illes seducera multes. Vos audira de guerras e de menacias de guerra, ma non time! Iste cosas debera evenir, ma le fin non consequera immediatemente. Un nation surgera guerrear contra un altere, e regno pugnara contra un altere regno. Il habera tremores de terra in multe locos e fames. Istos, tamen essera solmente le initio del dolores de parto: multe alteres venira.

Oration

Senior benedicte, qui faceva que tote le Scripturas Sancte esseva scribite pro nostre instruction: Concede nos de audir los, leger los, marcar los, apprender los e diligentemente digerer los, ut nos imbracia e serva firme le beate sperantia del vita eterne, que tu nos dava in nostre Salvator Jesus Christo; qui vive e regna con te e con le Spirito Sancte, un sol Deo, in le seculos del seculos! Amen.

Musicas empleate in iste programma

  • Exultate Deo (Palestrina) – Canadian Brass
  • Hanna’s Song (Michael Silverman)
  • Cantico di Anna (Giulia Parisi)
  • Amazing Grace (Canadian Brass)
  • Jubilate Deo (Simply Taizé)
  • Nada te turbe (Taizé)
  • Laudate omne gentes (Taizé)