Dominica, le 14 februario 2021 – Lecturas biblic in Interlingua

Dominica, le 14 de februario 2021 – le ultime dominica post Epiphania

Lecturas biblic: Psalmo 50:1-6; 2 Reges 2:1-12; 2 Corinthios 4:1-6; Marco 9:2-9 con le voces de Paolo Castellina, Alison Bailey Castellina, Carmelo Serraino, Péter Kovács, Bob McCarthy.

Le fidelitate al commission que Deo nos fideva essera premiate: il ha necun dubita a iste proposito! Il non ha dubitas mesmo a proposito que il habera un judicamento super nostre obras, quia nos esseva rendite creaturas responsabile. Iste principio es affirmate in le Psalmo 50, que aperi nostre lecturas biblic de hodie. Le mysteriose translation in celo del propheta Elia (reportate in le secunde lectura) illustra quomodo Deo honora qui le servi fidelmente. Le consecration al servicio de Deo es alsi illustrate per le exemplo del apostolo Paulo in le tertie lectura, in le qual ille explica le ration pro le qual il ha multes qui rejecta le salvation offerite in le Persona e obra del Christo. Gratias a Deo, tamen, il ha qui aperi su oculos e, in vider le gloria del Christo celate in Su humile humanitate e lo recipe con fide, recipera alsi le gratia del eterne communion con Ille, etiam ultra al morte. Isto es lo que pictura nostre quarte lectura ab le evangelio secundo Marco. Il ha multo hic super le qual reflecter!

I. Psalmo 50:1-6

Le esser human es un creatura special de Deo, qui es differente ab omne alteres. Al esser human esseva confidite le administration de iste mundo e de isto ille debera dar conto a Deo, qui es su proprietario. Il venira le die in le qual le mundo integre (cata uno de nos) essera advocate coram Ille e essera subjectate al judicamento de Deo. Pro multes Deo se manifestara qua “igne devorator”, como se exprime iste Psalmo – e nos cognosce le ration de isto! Mesmo su populo electe, appellate esser fidel “sacerdote” de Deo in iste mundo, debera dar conto de su obras. “Celo e Terra” essera testes de isto. Que “contara” illos al Judice de nos omnes? Hodie nos legera le prime sex versos de iste Psalmo que confirma que certo il habera un judicamento. Nemo debe intertener illusiones a iste reguardo.

“El, Deo, le Senior ha parlate e ha advocate tote le humanitate a convenir ab le occidente e ab le oriente. Ex le Monte Sion, le perfection del beltate, Deo resplende in tote su fulgor. Nostre Deo veni e non remanera in silentio. Le igne devora toto ante ille, e un grande tempesta ragia circa ille. Ille advoca le celos de supra e le terra de subtus a testificar le judicio de su populo. “Congrega circa me, mi populo fidel, illes qui contraheva con me un pacto in offerente sacrificios”. Deinde que le celos proclama su justitia, quia Deo ipse essera le judice”.

II. 2 Reges 2:1-12 – Le assumption de Elia

Advenimentos mysteriose que nos non sape explicar es describite in iste texto. Le propheta Elia, eminente portavoce de Deo, es assumpte in celo al presentia de Deo. Le communion que ille habeva con Deo durante su vita, continuara in le beatitude eterne. Le propheta Eliseo prosequera su ministerio e essera equipate del mesme spirito prophetic de Elia. Nos volerea cognoscer le “quomodo” de evenimentos como istos, ma il non es accordate nos de saper lo. Il es futile facer speculationes a iste reguardo. Vamos reciper iste factos como veritate, mesmo si nos non los pote explicar, e vamos allegrar nos que le fidel servicio rendite a Deo essera amplemente recompensate: nihil e nemo potera subtraher nos le premio post haber absolvite le commission que Deo nos confideva. Deo es verace e nos ha fiducia in Ille e in su Parola.

“Justo ante que le Senior assumeva Elia al celo in un huracan, Elia con Eliseo veniva ab Gilgal. Elia diceva a Eliseo: “Remane hic, proque le Senior me inviava a Betel. Ma Eliseo diceva: “Quanto il es secur que le Senior vive, e tu vive, io non te abandonara”. Assi illes descendeva a Betel. Alcun membros del corporation del prophetas in Betel vadeva assi a incontrar Eliseo e le diceva: “Sape tu que hodie le Senior portara via tu maestro de te?”. Ille respondeva: “Si, io lo sape, tace vos!”. Elia le diceva: “Remane hic, proque le Senior me inviava a Jericho!” Ma ille replicava: “Quanto il es secur que le Senior vive, e tu vive, io non te abandonara”. Assi illes vadeva a Jericho. Alcun membros del corporation del prophetas in Jericho, approchava Eliseo e les diceva: “Sape tu que hodie le Senior portara via tu maestro de te?”. Ille respondeva: “Si, io lo sape, tace vos!” Elia le diceva: “Remane hic, proque le Senior me inviava al Jordan!” Ma ille replicava: “Quanto il es secur que le Senior vive, e tu vive, io non te abandonara”. Assi illes procedeva insimul. Le cinquanta membros del corporation del prophetas vadeva con illes e se poneva opposite a illes a un certe distantia, durante que Elia e Eliseo stava apud le Jordan. Elia alora prendeva su mantello, lo replicava e con illo colpava le aqua. Le aqua alora se divideva, e le duo transiva sur terra sic. Quando illes habeva transite, Elia diceva a Eliseo: “Que pote io facer pro te ante que io essera portate via de te?” Eliseo respondeva: “Pote io reciper un duple portion del spirito prophetic que te inspira?”. Elia replicava: “Isto es un requesta difficile! Si tu me vide quando io essera portate via, illo evenira, ma si tu non me vide, illo non evenira”. Durante que illes camminava insimul e parlava, tosto appareva un carro de foco trainate per cavallos de foco. Illos se disponeva inter Elia e Eliseo, e Elia ascendeva al celo como in un huracan. Durante que Eliseo guardava, ille critava: “Patre mie! Patre mie! Le carro e le cavalleros de Israel!”. Alora ille non plus poteva vider le, pois ille sasiva su vestimento e lo lacerava in duo pecias”.

III. 2 Corinthios 4:1-6

Le servicio rendite a Deo per le apostolo Paulo in annunciar le Evangelio de Christo, es coronate de ample successo e su scriptos inspirate continua hodie portar a Christo e instruer personas de omne sorta in tote le mundo. Tote isto, tamen, non eveniva sin le aspere contestationes de personas qui repulsa e deride iste Evangelio. Quomodo on pote explicar iste lor recusation? Le apostolo lo explica in le sequente fragmento de su secunde littera al christianos de Corintho.

“Dunque, pois que nos ha iste ministerio, secundo le misericordia que nos recipeva, nos non nos discoragia. Nos refusava de operar in maniera secrete como si nos faceva cosas vergoniose. Nos non nos comportava con deception, ni distorqueva le parola de Deo, ma per un aperte proclamation del veritate nos commenda nos mesme al conscientia de omnes coram Deo. Si totevia nostre evangelio pare velate, illo es velate solmente pro les qui vade in perdition, id es illes qui non crede, al quales le deo de iste mundo cecava lor mentes a que illes non vide le lumine del gloriose evangelio de Christo, le qual es le imagine de Deo. Pois que nos non proclama nos mesme, ma Jesus Christo como Senior. Nos es solmente vostre servitores pro amor de Jesus. Pois que Deo, qui diceva: ‘Que le lumine brilla in le tenebras!’ es le mesme Deo que refulgeva in nostre cordes pro dar nos le lumine del gloriose cognoscentia de Deo in le facie de Christo”.

IV. Marco 9:2-9 – Le transfiguration

Le gloriose identitate del Christo non es clar e obvie pro omnes, ma solmente pro illes al quales es date de facer experientia de illo, como le discipulos Petro, Jacobo e Johannes in le episodio del Transfiguration del Christo que nunc nos audira. Illes recipe le privilegio de contemplar in avantia “qui se cela” in le humanitate de Jesus de Nazareth, quia de isto, como alsi de su resurrection, illes debera esser testes. In ille vision illes habera alsi le confirmation que qui esseva fidel a Deo, como Moses e Elia, recipe le gratia de transcender mesmo le morte e remaner pro semper con le Christo. Isto vale etiam pro nos!

“Sex dies plus tarde, Jesus prendeva con se Petro, Jacobo e Johannes e les conduceva a parte, sol, sur un monte alte. Ibi, in lor presentia, ille esseva transfigurate. Su vestimentos deveniva brillantemente blanc, plus que qualcunque lavandero in le mundo haberea potite blanchir los. Alora Elia appareva ante illes, insimul a Moses, e illes parlava con Jesus. Assi Petro interloqueva e diceva a Jesus: “Rabbi, il es bon pro nos esser hic. Vamos facer tres cabanas, un pro te, un pro Moses e un pro Elia” (pois que ille non sapeva que dicer, durante que illes esseva espaventate). Alora un nube veniva e les adumbrava, e un voce veniva ab le nube e diceva: “Iste es mi amatissime Filio. Ascolta le!”. E subito, quando illes circum-spectava, illes non plus videva alicuno con ille, ma solmente Jesus. Post quando illes descendeva del monte, ille les ordinava de non contar a alicuno re lo que illes habeva vidite usque post le Filio del Homine haberea resurgite ex le mortos. Illes reteneva assi iste parolas pro se mesme, ben que, inter se, illes discuteva que poteva significar iste resurger ex le mortos”.

Oration

Patre misericordiose, cuje Filio benedicte Jesus Christo descendeva del celo pro esser le ver pan que da vita al mundo: da nos semper de iste pan, ut Ille vive in nos e nos con Ille; qui vive e regna con te e con le Spirito sancte, un sol Deo, nunc e semper. Amen.