Dominica le 14 de martio 2021 – Lecturas biblic in Interlingua

Dominica le 14 de martio 2021 – le quarte dominica del quaresima

Textos biblic: Psalmo 107:1-3, 17-22; Numeros 21:4-9; Ephesios 2:1-10; Johannes 3:14-21 con le voces de Paolo Castellina, Bob McCarthy, Péter Kovács, Carmelo Serraino.

Le symbolo del cruce – que memora como nostre Senior Jesus Christo ha morite, es ponite in grande evidentia in le major parte del edificios del ecclesias christian. Levar le cruce in alto, altiar lo al vista de omnes, sia physicamente sia in le proclamation public, remane hodie, al oculos del mundo, “scandalo e follia”. In le regimes dictatorial, le symbolos del cruce es frequentemente abattite del edificios: nemo e nihil debe defiar le pretendite supreme autoritate del Stato e de qui lo duce. Le christianos, tamen, insiste in levar in alto le Senior e Salvator Jesus Christo non solmente “in lor cordes” ma alsi publicamente. Pro illes, facer isto es un deber indiscutibile. Quare illes lo face? Quia “il es necesse”: le valor e le efficacia de quid Christo ha complite in morir sur le cruce debe esser proclamate apertemente, proque illo es le sol e authentic sperantia de salvation del humanitate. Isto es presentate in le lecturas biblic de iste septimana, ubi “le cura” de nostre peccatos es celebrate e proclamate sia in le Vetule, sia in le Nove Testamento.

1. Psalmo 107:1-3, 17-22

Le Deo ver e vivente redime e libera. Su populo constantemente face experientia de isto e propter isto illes le lauda e le regratia. Su actos de gratia misericordiose, tamen illes non del toto los meritarea. Deo es fidel al terminos del pacto que ille establiva con su populo, e le portion del Psalmo 107, que nos lege hodie, lo celebra.

“Regratia le Senior, quia ille es bon! Su amor fidel dura pro semper. Esque le Senior vos redimeva? Alora proclama lo! Dice a alteres que ille vos redimeva de vostre adversarios! Quia ille congregava le exiliatos ab multe nationes, ab oriente e ab occidente, ab nord e ab sud. (…) Illes se comportava stupidemente: illes se rebellava e suffreva a causa de lor iniquitates. Illes perdeva lor appetito pro tote alimentos e se approximava al portas del morte. In lor tribulationes, tamen, illes clamava al Senior e ille les liberava de tote lor afflictiones. Illes les mandava su parola de conforto e les resanava; ille les tirava foras ab le fossa in le qual illes habeva essite trappate. Que illes regratia le Senior propter su misericordia e propter le meravilias que ille faceva pro illes! Que illes le offere sacrificios de regratiamento e canta con gaudio re su actos gloriose!” (Psalmo 107:1-3, 17-22).

2. Numeros 21:4-9 – Le serpentes venenose

Le evenimentos del Vetule Testamento es semper lectiones que Deo imparti non solmente a lor protagonistas, ma alsi a nos, qui recipe lor conto qua Parola de Deo. In le evenimento del qual nos lege hodie, trahite ab le libro de Numeros, nos vide un figura del mal resultatos del manco de recognoscentia e fiducia in Deo, ma anque le signos de Su patiente misericordia – que, tamen, non es illimitate!

“Illes partiva del monte Hor apud le via del Mar Rubie pro circumferer le pais de Edom, ma le populo deveniva impatiente durante le cammino e parlava contra Deo e contra Moses: “Proque vos faceva nos montar de Egypto pro morir in le deserto? Nam il non ha pan e il non ha aqua, e nos es disgustate de iste alimento miserabile”. Alora le Senior inviava inter le populo serpentes venenose. Illos mordeva le gente e multes moriva. Assi le populo veniva a Moses e diceva: “Nos peccava parlante contra le Senior e contra te. Preca le Senior que ille nos libera del serpentes!”. Assi Moses precava pro le populo.  Alora le Senior diceva a Moses: “Face un serpente de cupro e monta lo super un standardo! E si alicuno que es mordite lo reguarda, ille vivera”. Moses faceva un serpente de cupro e lo montava super un standardo; e quando alicuno esseva mordite per un serpente, ille reguardava le serpente de cupro e viveva” (Numeros 21:4-9).

3. Ephesios 2:1-10

Le ricchessa del misericordia de Deo, que salva nos in Jesus Christo ab le consequentias fatal de nostre peccatos, es annunciate e celebrate in iste texto del apostolo Paulo. In illo il es clarmente in evidentia le principio que le gratia del salvation es exclusivemente le dono del initiativa soveran de Deo e que illo non del toto depende de qualcunque meritos que nos poterea pensar de haber o acquirer. Illo solmente es le causa efficiente in nos del obras que es agradabile a su oculos.

“Olim vos esseva morte propter vostre transgressiones e multe peccatos. Vos soleva viver in peccato justo como vive le resto del mundo e obediva al diabolo – le dominator del potestates del mundo invisibile. Illo es le spirito qui opera in le cordes de illes qui refusa obedir a Deo. Nos omnes viveva in tal maniera e indulgeva in le desiros appassionate e inclinationes de nostre natura peccaminose. De natura nos esseva destinate al ira de Deo, justo como quicunque altere. Deo, tamen, essente ric in misericordia, a causa del grande amor per le qual ille nos ha amate, mesmo quando nos esseva morte in nostre transgressiones, ille nos vivificava insimul a Christo – per gratia vos es salvate. Ille nos resuscitava con ille e faceva seder nos con ille in le sphera celeste con Christo Jesus, pro demonstrar in le etates futur le superabundante ricchessa de su gratia in manifestar bontate verso nos in Christo Jesus. Si, per gratia vos es salvate, per le medio del fide, e isto non depende de vos ma es le dono de Deo;  isto non es le resultato de nostre obras, assi que nemo poterea vantar se. Nos, de facto, es productos del obra de Deo, create in Christo Jesus pro realisar le bon actiones que Deo preparava previemente a fin que nos los face” (Ephesios 2:1-10).

4. Johannes 3:14-21

Le symbolismo del episodio del Vetule Testamento del serpente de cupro elevate de Moses in le deserto, es empleate per le evangelista Johannes sicut un illustration prophetic del elevation del Senior Jesus Christo a morir clavate a un cruce. Le Evangelio christian, de facto, proclama le sacrificio de expiation de Jesus in cruce como le contento e le fundamento ipse del salvation eterne de illes qui se confide in Ille. Le Evangelio consiste justo in isto, e su consequentias practic es extraordinarimente efficace in quicunque lo recipe hodie alsi.

“Sicut Moses levava le serpente in le deserto, ita il es necesse que le Filio del Homine sia levate in alto, ut omnes qui crede in ille habe vita eterne”. Quia isto es le maniera per le qual Deo amava le mundo: ille dava su Filio unigenite, ut omnes qui crede in ille non peri, ma habe le vita eterne. Quia Deo non mandava su Filio in le mundo pro condemnar le mundo, sed ut le mundo sia salvate per su medio. Qui crede in ille non va esser condemnate. Qui, tamen, non crede, jam ha essite condemnate, quia ille non ha credite in le nomine del unigenite Filio de Deo. Ora, isto es le base del judicio: que le lumine ha venite a in le mundo e le gente amava le tenebras plus que le lumine, quia lor mal obras esseva maligne. Omnes qui face mal obras odia le lumine e non veni sub le lumine, ut lor obras non sia exponite. Qui, tamen, practica le veritate veni sub le lumine, ut sia manifestate que lor obras es facite in Deo” (Johannes 3:14-21).

Oration

Patre misericordiose, cuje benedicte Filio Jesus Christo descendeva del celo pro esser le ver pan que da vita al mundo: dona nos pro semper de tal pan, ut ille vive in nos e nos in ille, qui vive e regna con te e con le Spirito Sancte, un sol Deo, nunc e semper. Amen.