Dominica 21-11-2021 – Lecturas biblic in Interlingua

Dominica, le 21 de novembre 2021, le ultime dominica post Pentecoste: Festa de Christo Rege

Lecturas biblic: Psalmo 132; 2 Samuel 23:1-7; Revelation 1:4-8; Johannes 18:33-37 con le voces de Paolo Castellina, Simona Cantarella, Carmelo Serraino,  Bob McCarty, Péter Kovács

Introduction al lecturas

Le lecturas biblic de iste dominica celebra le regalitate universal del Senior e Salvator Jesus Christo. Nostre tertie lectura, ex le libro de Revelation, nos lo proclama con terminos le plus clar e immediate. Illo pone in evidentia Su privilegios e dignitate, le substantia de Su obra de salvation e Su retorno gloriose, que ille mesme promitteva. Le regalitate del Christo tamen, non pote esser mesurate con le criterios que characterisa le autoritates de iste mundo. Illo de facto se pone sur un plano multo differente. Isto es evidentiate per nostre quarte lectura, que nos conta de quando Jesus esseva constringite presentar se coram Pilato, governator roman del Palestina. Insimul al capites del populo hebraic, illes pensava de haber sasite “un periculose concurrente”, un “subversivo” a eliminar le plus tosto, como possibile. Le sol subversion tamen, que Jesus representava, esseva del pseudo-valores in le quales illes credeva e practicava, e ab le quales illes haberea debite repentir se pro esser autoritates authentic. Nostre prime e secunde lecturas nos presenta le personage del rege David, prototypo del regalitate de Christo, e del qual Jesus descendeva secundo su familia natural. Le Psalmo nos parla del ingagiamento de David pro realisar in Jerusalem un templo digne de Deo, pro poter incontrar le regularmente in precaria, e demonstrar su recognoscentia a Deo pro haber eligite ille e su descendentes como instrumento del propositos de Deo pro iste mundo. Le promissa de Deo, tamen esseva conditionate del observantia del terminos del Pacto establite con Israel. Que altere, si non le relation con Deo e le obedientia a Su voluntate revelate de facto poterea melio dar senso e perspectiva al vita human? Isto es emphatisate in le ultime parolas de David sur su lecto de morte, reportate in nostre secunde lectura. Illos celebra le pacto eterne “arrangiate e garantite in omne su detalios”, establite con Israel. Il es solmente quando nos recognosce e submitte nos de bon grado al regalitate de Deo in Christo, ponente le sur le throno de nostre vitas, que nos potera trovar le complimento authentic de nostre vitas.

Prime lectura: Psalmo 132

Oh Senior, memora David e tote su travalios! Ille faceva un promissa solemne al Potente de Israel: “Io non entrara in mi proprie domo, io non jacera in mi lecto pro reposar, io non concedera le somno a mi oculos e torpor a mi palpebras, donec io trova un loco pro edificar un habitation pro le Potente de Israel”. Ecce, nos audiva que le Arca esseva in Ephrata; nos lo trovava in le territorio de Jaar. Vamos entrar in le sanctuario del Senior; vamos adorar le al scabello de su pedes! Surge, oh Senior e entra a in le loco de tu reposo, insimul al Arca, symbolo de tu fortitude! Que tu sacerdotes sia vestite de integritate e que tu sanctos exulta! Propter tu servitor David, non averte tu reguardo ab le rege qui tu seligeva! Le Senior faceva un juramento a David, con le promissa que ille nunquam habera recedite de illo. Ille diceva: “Io ponera un de tu descendentes sur tu throno. Si illes obedi al terminos de mi pacto e al leges que io les docera, alora anque lor filios sedera sur su throno pro semper”. Quia le Senior ha eligite Sion; ille decideva facer de illo su habitation. Ille diceva: “Isto essera mi loco de reposo pro semper; io habitara hic proque io lo seligeva. Io abundantemente providera a iste citate lo que illo necessita; io dara a su pauperes tote le nutrimento que illes besonia. Io protegera su sacerdotes, e su populo sancte cantara de gaudio. Ibi io rendera forte David. Mi uncto essera un lumine pro mi populo. Io humiliara su inimicos, e su corona resplendera.

Secunde lectura: 2 Samuel 23:1-7

Istos es le ultime parolas de David: “David, le filio de Isai parla – David, qui esseva exaltate qua le homine que recipeva del Deo de Jacobo le unction regal, David, le suave cantor de Israel. Le Spirito del Senior parlava per mi medio; su parolas esseva sur mi lingua. Le Deo de Israel parlava, le Protector de Israel me diceva: ‘Ille qui domina justemente, qui domina in le timor de Deo, es sicut le luce del aurora quando le Sol se leva, sicut un mane sin nubes, sicut le splendor del Sol super herba nove surgite del terra post le pluvia. Esque non il es mi familia que Deo ha seligite? Si, ille ha facite un pacto eterne con me; ille lo arrangiava e garantiva in omne su detalios. Ille assecurava mi securitate e mi successo. Le prevaricatores tamen, es como spinas que debe esser totes jectate via, quia illos avelle le pelle del manos que los tange. Qui los vole tanger, debe emplear utensiles de ferro pro hachar lo; illos essera completemente consumite per le igne.

Tertie lectura: Revelation 1:4-8

De Johannes al septe ecclesias que es in le provincia de Asia.

Gratia e pace a vos ab “ille qui es”, esseva e ancora venira, e del septe spiritos que es coram su throno, e ab Jesus Christo, le teste fidel, le Primogenito de illes qui retorna ab inter le mortos e Domino super le reges del Terra. A ille qui ama nos e qui nos absolveva de nostre peccatos al precio de su proprie sanguine, e qui rendeva nos un casa regal e sacerdotes consecrate a Deo, su Patre – a ille ipse sia date gloria e le supreme autoritate nunc e semper! Amen. Ecce, ille retorna inter le nubes e omnes le videra con lor proprie oculos, mesmo illes qui le transfigeva; e tote le populos del terra lugera pro ille. Certo! Amen. “Io es le Alpha e le Omega”, dice le Senior Deo – ille qui es, esseva e ancora venira – le Omnipotente.

Quarte lectura: Johannes 18:33-37

Pilato, ergo, entrava itero in le pretorio, advocava Jesus e le diceva: “Es tu le rege del judeos?”. Jesus respondeva: “Esque isto es tu proprie question, o alteres te lo suggereva?”. Pilato replicava: “Io non es un judeo, nonne? Tu proprie gente e le principes de tu sacerdotes te livrava ad me pro esser judicate. Quid faceva tu?”. Jesus respondeva: “Mi regno non es de iste mundo. Si mi regno esseva de iste mundo, mi servitores haberea combattite ut io non esseva livrate al autoritates judee. Mi regno tamen, non es de hic”. Ita Pilato diceva: “Ergo tu es un rege!”. Jesus replicava: “Tu dice que io es un rege. De facto, io nasceva e veniva in iste mundo pro testificar del veritate. Omnes qui ama le veritate presta attention a mi parolas”. Pilato alora le diceva: “Quid es veritate?”. Post haber dicite isto, ille sortiva itero ante le judeos e les diceva: “Io non trovava ulle causa pro accusar le de haber committite crimines”.

Oration

Omnipotente e eterne Deo, cuje voluntate es restablir tote le cosas in Su amate Filio, Rege del reges, e Senior del seniores! Que tote le populos del Terra, dividite e sclavisate per le peccato sia liberate e congregate sub SU misericordiose governamento; de le qui vive e regna con te e con le Spirito Sancte – un sol Deo, nunc e semper. Amen.

Musicas empleate in iste programma:

  • Cantate Domino (K. Jenkins) – Polyphony
  • Psalm 132 (To Blaenwern) – The Psalms Sung
  • Viking Ghosts on Scottish Isles – Andrej Krylow
  • Lewis’s Hymn Orchestral (Craig Armstrong)
  • Gloria e lode a Te, Signore Gesù (Marco Frisina)
  • Miserere: Song of Mercy and Redemption, 8. Locus Iste (Karl Jenkins, Stephen Leyton), Polyphony
  • Benché sia notte (Marco Frisina)

Be the first to comment

Leave a Reply

Your email address will not be published.




This site uses Akismet to reduce spam. Learn how your comment data is processed.