Dominica 22-8-2021 – Lecturas biblic in Interlingua

Dominica, le 22 de Augusto 2021 – Al dece-tertie dominica post Pentecoste

Lecturas biblic: Psalmo 84; 1 Reges 8:1,6,10-11, 22-30; Ephesios 6:10-20; Johannes 6:56-69 – con le voces de Paolo Castellina, Bob McCarty, Carmelo Serraino, Péter Kovacs

Introduction

Le grande cathedrales del nord Europa deveniva hodie un attraction pro ruitose touristas qui sovente non mesmo sape quod illes photographa. Gratias a Deo, in iste cathedrales es sovente alsi providite un cappella separate in le qual on pote entrar, seder se e, in le silentio e le penumbra, recolliger se in precaria pro querer le presentia de Deo. 

Le Templo de Jerusalem esseva vermente un loco special pro le populo de Deo. Illo esseva le loco per excellentia ubi Deo seligeva de incontrar se con le sues. Psalmo 84 exprime le sentimentos del credente qui, in un tal loco, se incontra con Deo. In le secunde lectura nos trova un parte del oration de inauguration pronunciate de Rege Salomon, qui finalmente assi vide le complimento del promissas que Deo faceva a su patre David.

Le templo, totevia, non pote garantir in se ipse le presentia de Deo. De facto illo esseva destruite per le inimicos de Israel. Le prophetas videva in celle evenimento le judicio de Deo propter le peccatos e le presumption del populo de Deo e de su leaders.

Il ha un guerra de character spiritual in le qual le populo de Deo es ingagiate contra le fortias del mal que age in nos e circa nos in iste mundo. Isto es le sol guerra que nos debe combatter: nostre inimicos ha un character spiritual. Pro combatter iste guerra, le Senior provide a nos le armas que nos necessita: nostre tertie lectura parla nos re illos. Illos es armas special e efficace.

Le quarte lectura, ab le evangelios mentiona primo le incomprension que plures inter le discipulos ipse habeva pro le parolas de Jesus quando illos deveniva “dur” e inacceptabile pro illes. Nos vide assi que iste discipulos relinque Jesus e le movimento christian. Tote isto monstra nos que il es essential acquirer un perspectiva completemente nove super le realitate, Su perspectiva. Iste transformation radical in nos pote evenir solmente per le conversion, repententia e fide in Jesus sin restrictiones mental. Le confession de fide que Petro exprime, e con le qual iste lectura termina, es pro nos le clar signal indicator. Solmente isto potera conducer nos a relativisar le rolo de templos de petra e vider in Ille, in Jesus, le sol “loco” ubi Deo se revela.

Prime lectura: Psalmo 84

Quanto agradabile es le loco ubi tu vive, oh Senior del universo! Mi anima concupisce languorosemente de entrar in le cortes del templo del Senior! Mi corde e mi integre esser exulta in le Deo vivente. Mesmo le passere trova ibi un domo e le hirundine face su nido e pone su pullos apud tu altares, oh Senior del universo, mi Rege e mi Deo! Beate es qui habita in tu domo e te lauda sin cessar. Beate es le homine, cuje auxilio veni de te e qui in su corde desira ardentemente ascender a tu templo. Quando illes transi per le vallea del affliction, Deo les provide fontes. Mesmo le pluvia matutin lo coperi con stagnos de aqua. Illes es sustenite passo a passo e cata un de illes se presenta coram Deo in Sion. Oh Deo del universo, exaudi mi oration! Audi, oh Deo de Jacobo! Oh Deo, reguarda con favor le rege, nostre protector! Manifesta tu favor a ille que tu consecrava! Un singule die in le cortes de tu templo es melior que mille passate in qualcunque altere loco. Io prefererea esser le portero del domo de mi Deo, plus tosto que habitar in le domos de peccatores. Quia le Senior Deo es nostre Sol e nostre scuto de protection. Ille da gratia e gloria. Le Senior non va privar de bon cosas qui face lo que es juste. Oh, Senior del universo, beate es le homine qui spera in te.

Secunde lectura: ab le octave capitulo del prime libro del Reges

Alora Salomon congregava apud se omne le ancianos de Israel, tote le capites del tribos e del familias israelita, a que illes poteva testificar le transferimento del Arca del Alliantia del Senior ab le Citate de David (id es de Sion). […] Le sacerdotes portava le Arca del Alliantia del Senior in le loco establite in le sanctuario interne del Templo, in le Loco Sanctissime, sub le alas del Cherubim. […] Ora, il eveniva depost que le sacerdotes habeva sortite del sanctuario, que un nebula impleva de Domo del Senior. Le sacerdotes non poteva star ibi pro complir lor ministerio propter le nebula, quia le gloria del Senior habeva implite le Domo del Senior. […] Salomon se poneva stante ante le altar del Senior in presentia del integre assemblea de Israel e extendeva su manos verso le celo. Assi ille precava: “Oh Senior, Deo de Israel, il non ha un Deo simile a te supra in le celo o subtus super le terra! Secundo tu Pacto, tu remane misericordiosemente fidel a tu promissas verso tu servitores que te obedi de tote corde. Tu manteneva le parola date a tu servitor David, e lo que tu le habeva dicite con tu ore, tu lo compliva con tu mano, como iste die ipse proba. Nunc igitur, Senior, Deo de Israel, mantene le promissa que tu faceva a tu servitor, mi patre David, quando tu diceva: ‘Semper il habera un tu successor super le throno de Israel, proviste que tu descendentes vigila super lor passos e me servi como tu ha facite’. E nunc, Senior, Deo de Israel, que le promissa que tu faceva a tu servitor, mi patre David, sia realisate. Poterea Deo, tamen, habitar super le terra? Ecce, si le celos e le celos del celos non poterea continer te, quanto magis non lo poterea facer iste domo que io edificava! Responde, tamen, al oration de tu servo e a su preces, oh Senior, mi Deo. Audi le alte crito e le oration que tu servitor face hodie coram te, ut tu oculos sia aperte nocte e die verso iste Domo, verso le loco del qual tu ha promittite que tu haberea habitate. Que tu satisface al oration de tu servitor pro iste loco. Responde, ergo, al supplication de tu servitor e de tu populo Israel pro iste loco. Audi les del loco in le qual tu habita in le celo, e responde favorabilemente”.

Tertie lectura: Ephesios 6:10-20

Finalmente, sia fortificate in le Senior e in le potentia de su fortia. Vesti vos del integre armatura de Deo, a que vos pote star firme contra le insidias del diabolo. Nos es de facto ingagiate in un lucta non contra esseres human, ma contra le principatos, contra le potestates, contra le rectores del tenebras de iste mundo, contra le spiritos del iniquitate que il ha in le sphera celeste. Pro iste ration, revesti vos del integre armatura de Deo, a que vos pote resister in le die mal e, habente facite toto lo que es requirite, star firme. Sta, ergo, post haber cingite vostre lumbos con le cinctura del veritate, e vestite vos con le plastron del justitia, e calceate vostre pedes in le prestessa que da le evangelio del pace. Super toto, protege vos per le scuto del fide, con le qual vos potera extinguer tote le flechas infocate del maligno. Prende alsi le casco del salvation e le gladio del Spirito, le qual es le parola de Deo. Preca semper in le Spirito per omne orationes e supplication, vigilante con omne perseverantia e requesta in favor de tote le sanctos.Preca alsi pro me, a fin que, quando io parla, me sia date de exprimer me francamente pro facer cognoscer le mysterio del Evangelio, pro le qual io es ambassador in catenas. Preca a que io pote parlar tanto audacemente quanto il es necessari.

Quarte lectura: Johannes 6:56-69

Qui mangia mi carne e bibe mi sanguine, remane in me, e io in ille. Io vive propter le Patre vivente qui me mandava; in le mesme maniera, quicunque se nutri de me vivera propter me. Io es le ver pan descendite del celo. Quicunque mangia de iste pan non morira sicut vostre ancestres (mesmo si illes mangiava le manna) ma vivera in eterno. Jesus diceva iste cosas durante que ille doceva in le synagoga de Capernaum. Multes de su discipulos, ergo, quando illes audiva iste cosas, diceva: “Iste linguage es intolerabile: qui unquam poterea acceptar lo?”. Quando Jesus comprendeva que su discipulos murmurava de isto, ille les diceva: “Esque isto offende vos? Que dicerea vos si vos videva le Filio del Homine ascender ubi ille esseva precedentemente? Solmente le Spirito vivifica. Le effortio human non juva a nihil! Le parolas que io emplea es spirito e vita. Sed il ha alcunes inter vos qui non crede”. Quia Jesus sapeva ab initio qui non haberea credite e qui le haberea traite. Assi Jesus addeva: “Il es propter isto que io vos diceva que nemo pote venir a me nisi le Patre lo concede”. Post isto, multe de su discipulos quitava sequer le e non plus le accompaniava. Ergo Jesus diceva al Dece-duo: “Esque etiam vos vole deserer me?”. Simon Petro le respondeva: “Senior, a qui altere poterea nos vader? Tu solmente ha parolas de vita eterne. Nos crede in te e nos sape que tu es le Sancte de Deo!”.

Oration

Concede a nos, oh Deo misericorde, que tu Ecclesia, que tu congrega in unitate per tu Sancte Spirito, pote manifestar Tu fortia inter omne populos, pro le gloria de Tu Nomine; per Jesus Christo, nostre Senior, qui vive e regna con Te e con le Spirito Sancte, un sol Deo, in le seculos del seculos.

Musicas empleate in le podcast

  • I Sing the Mighty Power of God (Isaac Watts), The Coventry Singers.
  • Genevan Psalter Psalm 84 (Geneva 1562) – viols and organ, Ernst Stolz
  • 84. Zsoltár Óh, seregeknek Istene
  • The Day Thou Gavest (Grimethorpe Colliery Band)
  • Jerusalem (Kathrine Jenkins) BBC Concert Orchestra
  • Tu sei il rifugio mio (ADI Media)
  • May the Mind of Christ My Saviour, the Scottish Festival Singers
  • A Gaelic Blessing (John Rutter) Wayne Marshall