Dominica 25-7-2021 – Lecturas biblic in Interlingua

Dominica, le 25 de julio 2021 – al novesime dominica post pentecoste

Lecturas biblic: Psalmo 14; 2 Samuel 11:1-15; Ephesios 3:14-21; Johannes 6:1-21 con le voces de Paolo Castellina, Simona Cantarella, Carmelo Serraino, Bob McCarthyPéter Kovács

Le insipientia human es depingite in le prime lectura biblic de iste septimana, le Psalmo 14, que describe qui vive como si Deo non existe quam un persona stupide qui de facto damnifica se ipse. Le stupiditate, tamen, non reguarda solmente le miscredentes, ma sovente es alsi presente in le credentes incaute e negligente quando illes, cedente al tentation del carnalitate, le concupiscentia, se retrova committer peccatos mesmo multo grave. Nos vide isto in le secunde lectura que conta del vicissitudes del rege David. Gratias a Deo, tamen, quando sia le primes, sia le secundes, se repenti sincermente, illes pote gauder del benedictiones describite in nostre tertie lectura. Iste benedictiones es sigillate per le potentia extraordinari del Salvator Jesus Christo – como nos vide in le quarte lectura. Un appello al repententia e al fide in Christo es hodie necessari plus que jammais.  

Prime lectura: Psalmo 14

Viver como si Deo non existe es un practica hodie plus tosto commun, ma non sin consequentias negative: illo es un insipientia que corrumpe moralmente e spiritualmente. E illo face alsi victimas! On poterea dicer que un persona impie pote esser respectabile e mesmo bon e decente, ma le verdicto de Deo a su reguardo “illes es malfactores” qui, mesmo si nos non ama audir isto, non escappara impunitemente a su juste judicio. Vamos, ergo querer le Senior e, trovante le, gauder de ille!

“Le insipiente dice a se ipse, “Il ha nulle Deo”. Illes es corrupte e committe actos abominabile, necuno de illes face lo que es bon. Le Senior prospice del celo super le filios del homines pro vider si il ha personas intelligente e qui quere Deo. No, omnes rejecta Deo e deveniva moralmente corrupte. Necuno de illes face lo que es bon, non mesmo un! Esque illes qui face iniquitates unquam apprendera? Illes devora mi populo sicut pan e non mesmo pensa invocar le Senior. Illes trepidara de timor, quia Deo es con illes qui es juste. Vos vole humiliar le opprimitos mesmo si le Senior es lor sperantia. Que le liberation de Israel veni de Sion! Que Jacobo se allegra e Israel exulta quando le Senior restablira le ben-esser de su populo!”.

Secunde lectura: 2 Samuel 11:1-15 – David committe adulterio con Bath-sheba

Le Biblia non es un libro celebrative, un libro que tende exaltar, laudar e glorificar le personages que presenta. Illo es honeste re le natura human e non cela le fallimentos moral de su heroes. Le eminente rege David se revela in iste conto un adultero e un homicida. Gratias a Deo, tamen, ille se repenti de su peccatos. Mesmo le plus grande inter le peccatores pote repentir se, trovar le pardono de Deo e un vita renovate. Ille certo non potera escappar al consequentias negative terren de su malfactos, ma Deo rehabilita David. David deveni hic un exemplo de repententia e de restablimento in le gratia de Deo. Deo, in ultra, face “que tote le cosas coopera al ben de illes qui ama Deo” (Romanos 8:28), mesmo nostre fallimentos.

In le primavera del anno sequente, le tempore in le qual reges soleva facer bellos, David faceva sortir Joab con su officieros e le armea integre de Israel. Illes batteva le ammonitas e assediava Rabba. David, tamen, habeva remanite in Jerusalem. Un vespere, David se levava de su lecto e deambulava sur le terrassa del palatio regal. Ab le terrassa ille videva un femina que se lavava. Iste femina esseva valde belle. Ergo le rege mandava alicuno a inquirer re iste femina. Le messagero diceva: “Illa es Bath-Sheba, le filia de Eliam e le uxor de Uria le hittita. Ita, David mandava alicun messageros a prender la. Illa veniva ad ille e David se jaceva con illa. Illa habeva justo complite le ritos de purification depost su periodo menstrual. Deinde, illa retornava a domo. Plus tarde, quando Bath-Sheba discoperiva esser gravide, illa mandava a David un message, dicente: “Io es gravide”.

Alora David mandava a Joab un message que diceva: “Face venir ad me Uria le hittita”. Assi Joab mandava Uria a David. Quando Uria arrivava, David le peteva re le situation de Joab e le armea israelita e quomodo le guerra progredeva. Pois David diceva a Uria: “Descende a in tu domo e reposa te”. Quando Uria quitava le palatio, le rege le mandava mesmo un dono. Uria, tamen, non vadeva a su domo. Ille nocte ille dormiva ante le entrata del palatio con le guardas del palatio regal. Quando David apprendeva que Uria non habeva vadite a domo, ille le convocava itero e le peteva: “Esque tu non ha justo arrivate de un viage? Quare tu non descendeva a tu domo?”. Uria replicava a David: “Le Arca e le armeas de Israel e Juda vive in tentas, e Joab e le homines de mi domino es campate in agros. Como poterea io vader a casa a biber e mangiar e a jacer con mi uxor? Io jura per le sanitate tue e de tu anima que io nunquam facera un tal cosa!”. Assi David diceva a Uria: “Remane hic ancora un altere die. Deman tu potera retornar al armea”. Alora Uria remaneva in Jerusalem ille die e le die sequente. Deinde, David le invitava a cena e le faceva inebriar. Mesmo assi David non succedeva facer retornar Uria a su domo con su uxor. Itero, Uria dormiva al entrata del palatio con le guardas del palatio regal. Mane David scribeva un epistola a Joab e lo mandava per le mano de Uria. In celle epistola David habeva scribite: “Pone Uria in le fronte del lineas ubi le battalia es le plus aspere e recede de ille, ut ille sia colpate per le inimicos!”. Igitur Joab assignava Uria a un loco juxta al muros del citate, in le qual ille sapeva que le homines le plus forte del inimico combatteva. E quando le soldatos del inimico sortiva del citate pro combatter, Uria le hittita esseva occidite insimul a plure altere soldatos israelita.

Tertie lectura: Ephesios 3:14-21 – Prece pro un amor forte

Isto es un exemplo del “substantia” del benedictiones de Deo. Illos non es solmente parolas, auspicios vacue, ma effectos concrete de Ille qui “secundo le potentia que opera in nos, pote operar in maniera multo plus grande mesmo de lo que nos pete o pensa”. Quando nos pone nos “in syntonia” con Deo, nos face le experientia de su effectos.

Pro iste ration io flecte mi geniculos ante le Patre per le qual omne familia in celo e sur le terra deriva su nomine. Io preca a que, secundo le ricchessas de su gloria, ille vos concede de esser corroborate con potentia per su Spirito in le homine interior e que Christo habita in vostre cordes per le medio del fide. Alora, radicate e fundate in le amor, vos essera in condition de comprender e assi cognoscer, con omne le sanctos, qual es le latitude, le longitude, le altor e le profunditate del amor de Christo, le qual superpassa omne cognoscentia. Assi vos essera reimplite per tote le ricchessas de Deo. Ora, a ille qui, secundo le potentia que opera in nos, pote operar in maniera multo plus grande mesmo de lo que nos pete o pensa, a ille sia le gloria in le ecclesia e in Christo Jesus in omne generation e in tote le etates! Amen.

Quarte lectura: Johannes 6:1-21 – Le multiplication del panes; Jesus ambula sur le aqua

Le poco que nos possede pote parer nos irrelevante pro le servicio del Senior e de nostre proximo. Isto poterea discoragiar nos e parer inutile. Si, tamen, mesmo celle poco nos lo pone in le manos de Jesus, lo confide a Ille, Ille potera multiplicar lo a gloria de Deo e pro le beneficio de multes. De illo remanera mesmo un surplus. Isto es lo que nos trova in le texto del evangelio pro iste dominica, associate al episodio in le qual nos trova Jesus qui ambula sur le acqua. Lo que Jesus poteva facer revela su identitate, e illo espaventa su discipulos. Ille tamen les assecura dicente: “Il es io, non time!”, un expression in le qual se cela le “Io es”, le nomine de Deo, qui vole esser pro nos amico e patre.

Post isto, Jesus vadeva a in le altere latere del Mar de Galilea (appellate alsi Mar de Tiberias). Un grande multitude le sequeva quia illes habeva vidite le signos miraculose que ille faceva sur personas infirme. Jesus ascendeva sur un monte, e ibi ille sedeva con su discipulos. Le Pascha, le celebration festive del judeos, esseva proxime. Levante su reguardo, Jesus videva celle grande multitude que veniva ad ille, e diceva a Philippo: “Unde poterea nos emer pan, ut iste gente sia alimentate?”. Pro dicer assi, Jesus habeva ponite Philippo a proba, quia ille sapeva quid ille esseva sur le puncto de facer. Philippo replicava: “Duo centos monetas de argento non esserea satis pro dar les mesmo un poco de pan!”. Un del discipulos de Jesus, Andreas, fratre de Simon Petro, le diceva: “Il ha hic un puero qui ha cinque panes de hordeo e duo pisces; ma quid isto es pro un tal numero de personas?”. Alora Jesus diceva: “Face seder tote iste gente sur le terra!”. In celle loco il habeva de facto multe herbas. Solmente le homines ibi esseva circa cinque milles. Ergo, Jesus prendeva celle panes e, rendite gratias a Deo, los distribueva a illes qui esseva sedite. Ille faceva le mesmo con le pisces, tanto quanto illes voleva. Quando omnes esseva satisfacite, Jesus diceva a su discipulos: “Collige le pecias frangite que resta, ut nihil se perde”. Alora illes los colligeva e reimpleva dece-duo corbes con le fragmentos lassate per le gente qui habeva mangiate ex le cinque panes de hordeo. Ora, quando le gente le videva facer iste signo miraculose, illes incipeva dicer le unes al alteres: “Iste-ci es certo le Propheta que nos expectava!”. Jesus, ergo, quando comprendeva que illes esseva sur le puncto de venir pro fortiar le a devenir rege, se retirava itero sur le monte per se ipse.

Quando veniva le vespera, le discipulos de Jesus descendeva al laco e le expectava. Jam se faceva tenebras e Jesus non habeva ancora retornate. Assi illes montava in le barca e incipeva transversar le laco verso Capernaum. Un forte vento sufflava e le aqua del laco deveniva multo agitate. Alora, post haber remate vinti-cinque o trenta stadios, illes videva Jesus ambulante sur le mar e se approximante al barca. A celle vista illes multo se espaventava. Ma Jesus les diceva: “Il es io, non time!”. Illes, ergo, le voleva prender in le barca, ma illo immediatemente arrivava al loco de destination!”.

Oration

Oh Deo! Protector de tote illes qui in te confide, sin le qual nihil es forte e nihil es sancte; augmenta e multiplica super nos tu misericordia, ut nos, con te como nostre capite e guida, passa trans le cosas temporal sin perder le cosas eterne; per Jesus Christo, nostre Senior, qui vive e regna con te e le Spirito Sancte, un sol Deo, in le seculos del seculos. Amen.