Dominica 26-9-2021 – Lecturas biblic in Interlingua

Dominica, le 26 de septembre 2021 – al dece-octesime dominica post Pentecoste

Lecturas biblic: Psalmo 124; Esther 7:1-6, 9-10; 9:20-22; Jacobo 5:13-20; Marco 9:38-50. con le voces de Paolo Castellina, Simona Cantarella, Carmelo Serraino,  Bob McCartyPéter Kovács

Introduction al lecturas

Desde le tempores le plus antique illes essayava facer lo e continua facer lo in omne manieras imaginabile. Le fortias del mal non sparnia le ressources a lor disposition pro imponer e consolidar lor poter tyrannic: illes essaya neutralisar e eliminar le principal fortia de opposition a lor aspirationes totalitari: le populo fidel de Deo. Emarginate, submittite in servage e combattite sin scrupulos con le methodos le plus perverse, persecutate e massacrate, le populo fidel a Deo tamen resiste, vive e prospera. Imperios e aspirante dictatores non plus sape que excogitar, lor frustration es maxime: illes nunquam succedera destruer lo. Le superviventia del populo de Deo, trans seculos e millennios, es un miraculo del obra providential de Deo. Il non es accidental que hebreos e christianos participa in un destino commun: esser le objecto del odio homicidial del mundo rebelle a Deo. Le fortias del mal nunquam prevalera. Itero e itero Deo interveniva e causava que un populo fidel a ille, mesmo parve, esseva semper presente qua testimonio perenne a Ille, al veritate e al justitia. Iste action providential de Deo es celebrate de nostre prime duo lecturas biblic: le Psalmo 124 e le vicissitudes contate in le libro de Esther – ab le quales originava le festa hebraic de Purim, que celebra le providential preservation de Israel, mesmo durante su exilio in Babylonia. Pro le filios de Deo, un del ressources le plus preciose pro mitigar suffrentias de omne sortas es le communion con Deo per le medio del precaria personal e communitari: de isto parla le apostolo Jacobo in nostre tertie lectura. De facto: “Le precaria fervente de un persona juste es multo efficace” pro vincer le fortias spiritual del malvagitate, que non solmente vaga trans le mundo, ma alsi pote ager in nos. Isto es evidentiate in nostre lectura final trahite ex le evangelio secundo Marco, in le qual Jesus emphatisa quomodo le precaria debe semper accompaniar se al action. Isto es essential a fin que nos continua esser “le sal” que da sapor al vita. 

Prime lectura: Psalmo 124

“Si le Senior non habeva essite con nos,” que Israel lo dice nunc, “si le Senior non habeva essite con nos, quando homines surgeva contra nos, illes haberea ingurgitate nos vive, quando lor furor irasceva contra nos. Le aquas nos haberea inundate; le currentes nos haberea tosto submergite. Si, aquas rabiose haberea facite nos necar. Sia benedicite le Senior, que non permitteva a lor dentes de eveller nos. Nos escappava como un ave ab le rete del chassator. Le rete se lacerava e nos es libere nunc! Nostre adjuta veni del Senior, qui faceva Celo e Terra”.

Secunde lectura: Esther 7:1-6, 9-10; 9:20-22

“Ita, le rege e Haman vadeva al banchetto del Regina Esther. In iste secunde occasion, dum illes bibeva vino, le rege diceva ancora a Esther: “Que es tu requesta? Io te lo accordara, mesmo si illo esserea le medietate de mi regno!”. Le regina Esther replicava: “Si io trovava gratia al oculos del rege, e si le rege se complace de accordar me mi requesta, io pete que le vita mie e le vita de mi populo sia sparniate. Quia io e mi populo ha essite vendite a les qui vole occider, massacrar e annihilar nos. Si nos habeva essite simplemente destinate al sclavitude, io haberea remanite silente, quia con un tal question trivial io non haberea disturbate le rege”. Alora Rege Ahasuero respondeva: “Qui es le individuo qui cogitava isto? Ubi pote esser trovate le persona qui hardiva planar tote lo que tu diceva?”. Esther replicava: “Le oppressor e le inimico es Haman, un homine perverse”. Audiente isto, Haman esseva sasite de terror coram le rege e le regina. (…) Harbona, un del eunuchos que esseva al servicio del rege diceva: “Haman jam preparava un pertica acuminate cinquanta cubitos alte in su proprie corte. Ille intendeva emplear lo pro impalar Mordekai, le homine que salvava le rege del assassination”. Alora le rege ordinava: “Que sia impalate Haman super illo!” Assi illes impalava Haman sur le pertica que ille habeva preparate pro Mordekai, e le ira del rege quiesceva. (…) Mordekai registrava iste eventos in le memorias e mandava litteras a omne le judeos qui demorava dispergite in le provincias de Rege Ahasuero, proxime e procul. Iste litteras appellava le judeos a celebrar un festa in le dece-quarte e dece-quinte die del mense de Adar cata anno. Ille les diceva de celebrar iste dies con exultation e gaudio e dante donos de alimentos le unes al alteres e presente al pauperes. Isto haberea commemorate le tempore in le qual le judeos habeva essite relevate de lor inimicos, quando lor afflictiones esseva mutate in felicitate, e lor lucto in gaudio”.

Tertie lectura: Jacobo 5:13-20

Si alicuno inter vos suffre, que ille preca! Si ille es allegre, que ille canta psalmos! Si alicuno inter vos es infirme, que ille manda vocar le ancianos del ecclesia, e que illes preca pro un tal persona, unguente le con oleo in le nomine del Senior! Iste precaria, facite con fide, salvara le infirmo e le Senior le facera levar de su lecto; e si ille committeva alicun peccato, illos le essera remittite. Confessa, ergo, vostre peccatos le unes al alteres a fin que vos sia resanate! Le precaria fervente de un persona juste es multo efficace. Elia esseva un homine como nos, e ille se poneva a precar con insistentia ut nulle pluvia cadeva, e nulle pluvia cadeva durante tres annos e sex menses. Deinde ille se poneva de novo a precar, e le celo dava le pluvia, e le terra vadeva producer su fructo. Fratres mie, si alicuno inter vos se disviava errante del veritate, e un altere le face retornar sur le recte via, ille debe saper que qui face retornar un errante peccator disviate, salvara su anima del morte e coperira un multitude de peccatos.

Quarte lectura: Marco 9:38-50

Johannes diceva a Jesus: “Magistro, nos videva alicuno ejectar demones in tu nomine, ma nos le lo prohibeva, quia ille non pertine a nostre circulo de discipulos”. Jesus, tamen diceva: “Non le lo prohibe, quia necuno qui face un miraculo in mi nomine poterea cito parlar mal de me! Quicunque non adversa nos, es pro nos. In veritate io vos dice, non perdera su recompensa quicunque vos da mesmo un cuppa de aqua propter vos porta le nomine de Christo. Si alicuno scandalisa un de iste parvos qui crede in me, il esserea melio pro ille que un grande mola esseva ligate circa su collo e jectate in le mar. Si un tu mano te scandalisa , abscinde lo! Il esserea melio pro te entrar in le vita eterne con un mano solmente plus tosto que vader con duo manos a in le inferno, ubi il ha un foco inextinguibile. E si tu pede te scandalisa, amputa lo! Il esserea melio pro te entrar claude in le vita eterne, plus tosto que vader con duo pedes a in le inferno. Si tu oculo te scandalisa, evelle lo! Il esserea melio entrar a in le regno de Deo con un oculo solmente que esser jectate con duo oculos in le inferno, ubi le verme nunquam mori e le foco nunquam se extingue. Quia omnes essera ponite a proba con le foco. Le sal es bon pro condir, ma si le sal perde su sapor, quomodo potera vos render lo de novo salate? Vos debe haber in vos le qualitate del sal e viver in pace le unes con alteres.

Oration

Oh Deo! Tu declara tu omnipotentia super toto in monstrar misericordia e compassion. Concede le plenitude de tu gratia, ut nos, currente pro obtener tu promissas, deveni participe de tu tresor celeste! Per Jesus Christo, nostre Senior, qui vive e regna con te e con le Spirito Sancte, un sol Deo, in le seculos del seculos. Amen.

Musicas empleate in le programma

  • Ciaccona di paradiso e inferno (anonymo) Ensamble Caprice
  • Geneva Psalm 124 · Miroslav Dvorsky · Yves Rechsteiner · Zoltán Kodály · Ensemble vocal
  • Salmo 124 (cantado) – Diel e Derly
  • Hava Nagila – Vamos allegrar nos – (The Jewish Starlight Orchestra)
  • A toi, louange e glorie (Emmanuel Music)
  • Join All the Glorious Name (The Coventry Singers)
  • A Gaelic Blessing (John Rutter) Wayne Marshall