Dominica 28-11-2021 – Lecturas biblic in Interlingua

Dominica, le 28 de novembre 2021 – le prime dominica de Advento

Lecturas biblic: Psalmo 25:1-9; Jeremia 33:14-16; 1 Thessalonicenses 3:9-13; Luca 21:25-36  con le voces de Paolo Castellina, Simona Cantarella, Carmelo Serraino,  Bob McCarty, Péter Kovács

Introduction al lecturas

Qui es ille qui face nos rememorar le errores e peccatos que nos committeva in le passato, del quales nos nos repentiva e que Deo nos pardonava in Christo? Le adversario de Deo face isto ut tormentar nos e facer nos dubitar del gratia de Deo. De facto, Deo oblidava tal nostre peccatos e illos non debe plus turbar nos. Nos pote proceder, humilemente, sur le via del justitia que ille nos monstrava, secundo le expressiones del Psalmo 25, le prime nostre lectura de hodie. Le promissas de Deo, qui es “nostre justitia”, de facto, registrate in le Scripturas Sancte, es promissas ver e fidel. Illos es promissas de gratia e de vita renovate, e semper efficace. Iste promissas es confirmate per le propheta Jeremia in nostre secunde lectura. Illos concerne le venita del Christo, le juste descendente de David. Le apostolo Paulo in le tertie lectura, tamen, vade in ultra al promissa del prime advento del Christo. Illo reguarda a su certe e promittite retorno, pro le qual nos debe preparar nos, vivente ei sanctitate e amor. De facto, nos non pone nostre sperantia in fallace promissas human: isto nos protege e ingagia. Le lectura ab le evangelios nos presenta le discurso prophetic que Jesus face a su discipulos re le advenimentos inquietante in le quales illes haberea essite implicate in lor generation. Iste revelation non esseva intendite a turbar les, ma, realisticamente a reinfortiar les durante le veniente inevitabile probas. Reguardante in ante e perseverante in lor fide e obedientia, illes haberea essite salvate del desperation in le expectation del retorno gloriose del Senior Jesus. Mesmo etiam ante nos on poterea haber tempores difficile, ma nos reguarda in ante!

Prime lectura: Psalmo 25:1-9

A te, Senior, io eleva mi anima. Deo mie, in te io confide. Que io non sia humiliate e que mi inimicos non exulta propter mi disfacta! Certo nemo qui se confide in te unquam essera humiliate, ma que le disgratia superveni a omnes qui essaya deciper alteres! Face me comprender tu vias, oh Senior! Doce me tu semitas! Dirige me in tu veritate e doce me, quia tu es le Deo de mi salvation! Io me remitte a te durante tote le dies. Rememora, oh Senior, tu misericordia, quia tu semper ageva in iste maniera! Oblida le peccatos de rebellion a te que io committeva durante mi juventute! Rememora me in le lumine de tu inexhauribile amor, quia tu es misericordiose, oh Senior! Le Senior es dulce e recte: isto es le ration perque tu doce al peccatores le maniera juste de viver. Que ille monstra al humiles su vias!

Secunde lectura: Jeremia 33:14-16

Ecce, le tempore certo venira, dice le Senior, in le qual io complira le promissa de gratia que io faceva a Israel e Juda. In celle dies e in celle tempore io facera surger pro illes un juste descendente de David. Ille facera in tote le pais lo que es juste e recte. Sub su dominio Juda gaudera de securitate e Jerusalem vivera fiduciosemente. In celle tempore Jerusalem essera appellate: “Le Senior es nostre justitia”.

Tertie lectura: 1 Tessalonicenses 3:9-13 

Proque como poterea nos bastantemente regratiar Deo pro vos, pro tote le gaudio que nos senti a causa vostre, coram nostre Deo? Nos preca intensemente nocte e jorno a poter vider vos in persona e integrar lo que manca a vostre fide. Que Deo ipse, nostre Patre e nostre Senior Jesus Christo prepara le via pro venir a vos e que ille causa vos multiplicar e abundar vostre amor le unes pro le alteres, justo como nos ha pro vos, pro confirmar vostre cordes in sanctitate a fin de esser irreprochabile coram nostre Deo e Patre, quando le Senior, nostre Jesus retornara con tote su sanctos.

Quarte lectura: Luca 21:25-36

“E il habera estranie signos in le Sol, in le Luna e in le stellas, e sur le Terra nationes essera in tumulto, perplexe a causa del fremito del mares e de estranie alte mareas. Multe gente essera terrificate in le expectation anxiose de lo que essera sur le puncto de supervenir al mundo, quia le potestates del celos essera succutite. Alora illes videra le Filio del Homine veniente in un nube con potestate e gloria magne. Quando tamen, iste cosas incipera evenir, respice e leva vostre capites, quia vostre redemption se approximava!”.

Deinde, Jesus les contava un parabola: “Reguarda un fichiero o omne altere arbores: Quando jam illos pullula folios, vos sape sin que alcuno vos lo dice, que le estate es prope! In le mesme maniera, quando vos videra evenir tote iste cosas, vos sapera que le Regno de Deo es prope. In veritate io vos dice: Iste generation non passara donec tote iste cosas occurrera. Celo e Terra disparera, ma mi parola nunquam disparera”.

“Sia alerte! Non lassa que vostre cordes sia obtundite per dissipation, ebrietate o per le enoios de iste vita, tanto que celle die vos surprende inexpectatemente! Quia celle die surprendera omnes qui vive sur le facie del Terra. Ita, sia alerte in omne tempores! E preca que vos sia tanto forte a escappar de omne iste horrores e star ante le Filio del Homine!”.

Oration

Omnipotente Deo, tu, qui nos da le gratia de rejectar le obras del tenebras e vestir nos con le armas del lumine durante nostre vita mortal! Face que, quando ille retornara in su gloriose majestate pro judicar le viventes e le mortos nos resurge al vita immortal. Per le medio de Ille qui vive e regna con te e con le Spirito Sancte – un sol Deo, nunc e semper. Amen.

Musicas empleate in iste programma

  • Tochter Zion, Freue Dich (Ludwig Guttler)
  • Advents Musik (Bernsdorf Brass)
  • Intrada for Two Brass Choirs and Timpanis (Pietro Torri)
  • Nun Kommt der Heiden Heiland (Michael Pretorius) – Andreas Raselius
  • Ihr Lieben Christen, freut euch nun (Dietrich Buxtehude) – Hannes Leublin
  • Carol of the Bells (Anonymous)- Canadian Brass
  • Ecco il Signore viene (Coro dei fratelli e sorelle di Bose)