Dominica, le 10 de Januario 2021 – Lecturas biblic in Interlingua

Dominica, le 10 de Januario 2021 – Prime dominica post le Epiphania

Lecturas biblic: Psalmo 29; Genesis 1:1-5; Actos 19:1-7; Marco 1:4-11 con le voces de Paolo Castellina, Simona Cantarella, Carmelo Serraino, Péter Kovács, Bob McCarthy.

Deo, le Deo ver e vivente qui se revelava trans tote le historia de Israel e suprememente in Jesus Christo, es un Deo “operante”. Deo realisa tote lo que ille se proponeva facer e ille lo face in modo maxime sapiente. Ille operava in crear le universo in le qual nos habita e, plus ancora de isto: nos lo vide in le lectura de hodie ab le Genesis. Deo opera soveranmente in lo que eveni in le mundo del natura: le Psalmo 29 lauda e exalta iste su activitates. Deo opera in le Persona e obra de Jesus Christo: isto es le annuncio prophetic de Johannes le baptisator. Deo continua operar con potentia per le medio de Su Sancte Spirito in renovar profundemente le vita de qui se confide in le Senior e Salvator Jesus Christo. Istos non es theorias, ma practica tangibile! Vamos audir le lecturas de hodie.

I. Psalmo 29

Le potente fortias discatenate de un huracan o de un tremor de terra adressa le mente del credente antique qui scribeva le poetic Psalmo 29 al multo plus grande potentia de Deo. Deo es le Creator qui iste fortias domina e emplea pro su propositos. A differentia del autores pagan antique, ille non adorava le natura e su fortias como idolos, ma Le qui los transcende.

“Ascribe al Senior, oh filios de Deo, ascribe al Senior gloria e potentia! Ascribe al Senior le gloria de su nomine, adora le Senior in le splendor de su sanctitate! Le voce del Senior reverbera super le aqua del mares. Le Deo del gloria tonitrua, le Senior tonitrua super le oceanos. Le voce del Senior es potente; le voce del Senior es majestose. Le voce del Senior frange le forte cedros; le Senior fracassa le cedros del Libano. Ille face saltar le montes del Libano como un vitello; ille face salir le Monte Hermon como un juvene bove salvage. Le voce del Senior sidera con flammas de foco. Le voce del Senior succute le deserto; le Senior face tremer le deserto de Kadesh. Le voce del Senior face flecter large arbores e denuda forestes. In su templo omnes crita: “Gloria!”. Le Senior domina le aquas del diluvios. Le Senior sede sur su throno regal pro semper. Le Senior da fortia a su populo. Le Senior benedice su populo con le pace”.

II. Genesis 1:1-5

Le populos antique satisfaceva le proprie desiro de cognoscer como iste mundo se formava, per le medio de fantasias mythologic. Non assi il eveniva con le fide de Israel, le q ual non adorava le natura e su fortias qua idolos, ni imaginava divinitates que es simile a esseres human. De facto, le fide de Israel adressava al Deo vivente, ver e operante. Ille, qui es un pur spirito personal, accendeva energias creative que le scientia moderne ancora non comprende. Un breve fragmento del prime capitulo del libro del Genesis nos rememora iste facto.

“Deo, in le principio, creava le celo e le Terra. Le terra esseva informe e vacue e le tenebras coperiva le superficie del oceano, e le Spirito de Deo planava super le aquas. Deo diceva: “Sia le lumine!” – e ecce le lumine! Deo videva que le lumine es bon, e Deo separava le lumine del tenebras. Deo appellava le lumine Die e le tenebras Nocte, Assi il habeva un vespere e un matino, le Die Un”.

III. Actos 19:1-7 – Le discipulos de Johannes le baptisator a Epheso

In le occasion de su prime viage missionari a Epheso, le apostolo Paulo incontra ibi un gruppo de personas, probabilemente israelitas, qui credeva que Jesus es le expectate Messia, le Salvator del mundo. Re Jesus, tamen, illes habeva un cognoscentia vage, imprecise, illo que les esseva originalmente communicate per Johannes le baptisator, del qual illes esseva discipulos. Illes esseva “preste” pro le Christo, ma nemo ancora habeva les parlate re ille in modo precise. Assi, Deo, in Su providentia, les conduce incontrar se con Paulo, le qual non solmente les instruera, ma essera alsi le instrumento a que illes face plenmente le experientia del obra del Spirito Sancte de Deo. Vamos audir le texto.

“Durante que Apollos esseva in Corintho, Paulo percurreva le territorio costal superior e perveniva a Epheso. Ibi ille trovava alicun discipulos de Johannes, le baptisator. Ille les diceva: “Esque vos recipeva le Spirito Sancte quando vos incipeva creder?”. Illes replicava: “Nos non mesmo audiva que il ha un Spirito Sancte”. Alora Paulo diceva: “Que sorta de baptismo vos recipeva? E illes replicava: “Le baptismo de Johannes, le baptisator”.  Alora Paulo les explicava: “Le baptismo de Johannes vocava al repententia. Johannes mesme, tamen, diceva al gente a creder in qui haberea venite plus tarde post ille, a saper, Jesus”. Quando illes audiva isto, illes esseva baptisate in le nomine de Jesus, le Senior. Alora Paulo les imponeva le manos, le Spirito Sancte descendeva super illes, e illes incipeva parlar miraculosemente in altere linguas, como face prophetas. Iste homines esseva circa dece-duo”.

IV. Marco 1:4-11

Le annuncio prophetic de Johannes le baptisator habeva le proposito de attraher le attention de su auditorio a Jesus qua le expectate Salvator del mundo e de preparar su reception. A differentia del false “salvatores” del mundo que aliquando appare durante le historia, Jesus non es un vacue confabulator, ma Ille qui, per le potentia del Spirito Sancte, factivemente transforma le vita de qui se confide in Ille. Nos non necessita alteres.

“In le deserto, Johannes, le baptisator comenciava predicar un baptismo de repententia pro le remission del peccatos. Multe personas del tote campania de Judea e de Jerusalem ipse accurreva a ille, e Johannes les baptisava in le fluvio Jordan post que illes le confessava lor peccatos. Johannes esseva vestite de un vestimento facite con pilos de camelo con un cinctura de corio circa su lumbos, e se nutriva de locustas e de melle salvage. Ille predicava: “Post me veni uno qui es plus forte de me, al qual io non es digne mesmo de inclinar me pro disnodar le corregia de su sandalias. Io baptisa in aqua, ma ille baptisara vos in Spirito Sancte”. Ora, il eveniva in ille dies que Jesus veniva ab Nazareth de Galilea, e ille mesme esseva baptisate in le fluvio Jordan per Johannes. E justo quando Jesus sortiva del aqua, ille videva que le celos se aperiva e le Spirito descendeva super ille como un columba. E un voce se audiva del celo, que diceva: “Tu es mi car Filio; in te io me complace”.

Oration

Patre nostre, qui es in le celos, qui al baptismo de Jesus in le fluvio Jordan ha proclamate tu Filio, in le qual tu te complace, e le ha consecrate con le Spirito Sancte: face que tote illes qui es baptisate in Su nomine, mantene le pacto al qual illes esseva submittite, e con corage le confessa qua Senior e Salvator; qui con te e le Spirito Sancte vive e regna, un sol Deo, in le gloria eterne.