Dominica, le 18 de april 2021 – le tertie dominica post Pascha

Dominica,  le 18 de april 2021 – le tertie dominica post Paschacon le voces de Paolo Castellina, Simona Cantarella, Bob McCarthy, Péter Kovács, Carmelo Serraino.

Lecturas biblic: Psalmo 4; Actos 3:12-19; 1 Johannes 3:1-7; Luca 24:36-48

Le discipulos del Senior e Salvator Jesus Christo (tunc e nunc) es personas “in education continue”, permanente. In sequer le Christo, juste e sancte, illes es gradualmente transformate secundo su imagine moral e spiritual. Isto es evidentiate in le lecturas biblic que nos hodie va audir e que trova lor puncto culminante in le conto del apparition de Jesus resurrecte a Su discipulos. In illo nos trova que Jesus “aperi lor mente” pro comprender non solmente Su realitate, ma alsi le Scripturas que parla con autoritate re ille. Isto es alique essential pro nos hodie alsi, qui los lege e medita.

I. Psalmos 4

In iste psalmo, David (qui serviva Deo e, quando ille scribeva iste psalmo, esseva persecutate) representa propheticamente le Messia (le Christo), ultragiate per multes. Le Christo gloriose, juste e sancte, es Ille que Deo exaudi proque Ille es in perfecte communion con Deo, Su Patre. Su gaudio es in complir le voluntate de Deo. Il se tracta de qualitates transmittite a tote illes qui Le seque fidelmente e con fiducia.

“Quando io te invoca, exaudi me, oh Deo de mi justitia! Ligamines de tribulation me constringe, ma tu me portara libere in locos late e aperte. Habe compassion e exaudi mi oration! Vos, qui me persecuta, usque quando essayara ruinar mi reputation? Usque quando vos me accusara sin ration? Usque quando vos continuara mentir?  Comprende que le Senior manifesta su favor a les qui es fidel a ille! Quando io invoca le Senior, ille me exaudi. Non permitte al ira de inducer vos a peccar! Quando vos jace in vostre lectos, pensa re isto e remane silente! Offere sacrificios con un juste spirito; confide in le Senior! Multes dice: “Qui monstrara nos tempores melior?”. Oh Senior: que tu facie ante nos se illumina con un surriso! Tu me dava un gaudio plus grande que illes qui ha recoltas abundante de grano e de vino nove. In pace io me ponera a jacer e io dormira, quia tu, oh Senior, me rendera san e secur””.

II. Actos 3:11-19

Depost haber liberate miraculosemente un homine de su incapacitate in le nomine e con le potentia de Christo, le apostolo Petro explica a su auditorio stupefacite qual es le fonte de lo que ille compliva. Assi ille annuncia le Evangelio e voca al repententia e al fide in Jesus Christo.

“Durante que le homine se teneva prope a Petro e Johannes, tote le gente esseva stupite e concurreva ad illes in le portico que es appellate de Salomon. Quando Petro videva isto, ille se adressava al turba e diceva: “Homines de Israel! Quare es vos stupite de lo que occurreva? Quare reguarda vos fixemente ad nos, como si nos ipse faceva iste homine ambular gratias a nostre proprie potentia o pietate? Le Deo de Abraham, Isaac e Jacobo, le Deo de nostre ancestres glorificava su servitor Jesus, le qual vos traiva e rejectava in presentia de Pilato, post que ille ipse habeva decidite dimitter le. Vos, tamen rejectava le Sancte e le Juste, e peteva, in su loco, que un homicida esseva date a vos. Vos occideva le Originator del vita ipse, le qual Deo faceva resurger del mortos. De isto nos es testes! Il es per le fide in le nomine de Jesus que iste homine – qui vos cognosce e vide – esseva reinfortiate! Le fide que es per Jesus le ha restablite in su integritate al presentia de vos omnes. Ora, io sape ben que vos ageva per ignorantia, sicut vostre capites alsi. Le cosas, tamen, que Deo preannunciava per le bucca de omne prophetas – illo es que le Christo haberea patite – ille compliva in iste maniera. Igitur, repenti vos de vostre peccatos e reverte vos, ut vostre peccatos sia delite!“.

III. 1 Johannes 3:1-7

Qui se confide a Christo qua su proprie Senior e Salvator, apprende de Ille qua su discipulo. Isto significa esser transformate desde nunc, e gradualmente, a Su imagine e similitude de maniera moral e spiritual. Isto es simile al lo que eveni con le apprentisse que es instruite per le artisano ab le qual ille apprende su arte. Le discipulo de Christo apprende pensar e ager in un maniera que “le mundo” non comprende. De facto, como poterea “le mundo” comprender isto durante que illo subjace in servage a qui lo domina? Gratias a Deo, tamen, il ha illes que ab iste servage es liberate.

“Vide quomodo le Patre nos ama: ille nos appella “su filios”, e nos les es! Ma illes qui pertine a iste mundo non lo recognosce, quia illes non le cognosce. Car amicos, filios de Deo nos es nunc, ma como nos essera non es apparente, quia illo non ancora esseva revelate. Nos sape que quandocunque illo essera revelate nos essera simile a ille, proque nos le videra justo sicut ille es. E omnes qui ha iste sperantia in lor cordes se purifica, justo como Jesus es pur. Omnes qui committe peccato, committe un transgression del Lege de Deo, quia le peccato es un transgression del Lege de Deo. Vos sape que Jesus veniva pro remover nostre peccatos, e in ille il ha nulle peccato. Omnes qui permane in ille non pecca. Omnes qui pecca non le cognosce, ni comprende qui ille es. Car filios, non permitte que alicuno seduce vos  re isto: qui face lo que es juste monstra de esser juste, sicut le Christo es juste“.

 IV. Luca 24:36-48

Le evangelios nos conta como Jesus resurrecte appareva a Su discipulos in plure occasiones. Apparitiones de iste sorta es contate in le Actos del Apostolos e le apostolo Paulo parla in re su proprie experientia con Jesus resurrecte in su epistolas. Jesus resurrecte non es “un phantasma” o un hallucination que es le fructo de lor phantasia. Jesus es recognoscibile e tangibile pro illes, ma su “substantia” es nunc differente de lo que nos cognosce. Pro comprender isto il es necessari que Deo “aperi nostre mente”, non solmente a Su realitate, ma alsi pro comprender le Scripturas hebraic que propheticamente parla re ille.

“Justo durante que illes diceva iste cosas, Jesus ipse subito stava in lor medio e les diceva: “Pace a vos!”. Le integre gruppo se turbava e espaventava, e pensava vider un spectro. Tunc ille les diceva: “Quare es vos turbate, e quare vostre cordes es plen de dubitas? Reguarda mi manos e mi pedes, quia il es vermente io! Palpa me e sia certe: un spectro non ha carne e ossos como vos pote vider que io ha!”. Dicite isto, ille ostendeva verso illes su manos e su pedes. Nonobstante isto, plen de gaudio e stupefaction, illes ancora non lo poteva creder. Deinde Jesus les demandava: “Esque vos ha hic alco a mangiar?”. Assi illes le dava un pecia de pisce rostite, e ille lo prendeva e lo mangiava coram illes. Deinde ille les diceva: “Istos es le parolas que io vos diceva durante que io esseva ancora con vos, que tote lo que esseva scripte concernente me in le lege de Moses, in le Prophetas e in le Psalmos debe esser complite”. Tunc ille aperiva lor mente ut illes comprende le Scripturas, e ille les diceva: “Vero, il esseva scripte multe tempore retro que le Messia patira e resurgera del mortos le tertie die. Il esseva assi scribite que su message de repententia in remission del peccatos essera predicate in su nomine a omne gentes, a partir de Jerusalem”. Vos es testes de tote iste cosas. Ecce, io vos manda quid mi Patre promitteva a vos. Remane, tamen, in le citate usque vos essera revestite con le potentia ex alto!”.

Oration

Oh Deo, cuje Filio benedicte se faceva cognoscer a su discipulos in le fraction del pan: aperi le oculos de nostre fide, ut nos le vide in tote su obra de redemption; qui vive e regna con te, in le unitate del Spirito Sancte, un sol Deo, nunc e semper! Amen.