Dominica le 18 de octobre 2020 – Lecturas biblic

Dominica le 18 de octobre 2020 – le vintesime dominica post Pentecoste

Lecturas biblic: Psalmo 99; Exodo 33:12-23; 1 Thessalonicenses 1:1-10; Mattheo 22:15-22 con le voces de Paolo Castellina, Bob McCarthy, Péter Kovacs, Carmelo Serraino

“Le fortia de un bon exemplo” poterea esser un titulo appropriate pro conjunger como con un filo rubie le quatro lecturas de iste dominica. In le contexto de un humanitate rebelle a Deo, Ille se reservava un populo que le es fidel. Iste populo surgeva del consecration a ille de eminente personages como Abraham, Aaron, Moses e Samuel, qui le serviva e que Ille constitueva como su portavoces e modellos. Le carga que Moses recipeva de Deo non esseva facile a complir: guidar un populo sovente obstinate, recalcitrante e ingrate. Iste personages deveniva modellos de fidelitate a Deo e de determination a su servicio e, como tales, illes continua esser lo usque hodie. Nos vide isto in le lecturas biblic de hodie. Le efficace e exemplari character del “amicos de Deo” nos lo vide confirmate in le tertie lectura ab le Epistolas, ubi le coherentia e le fidelitate del apostolo Paulo gania un bon recolta in formar christianos que ab ille traheva beneficio e qui, a lor vice, deveni exemplos pro alteres. in le quarte lectura ab le Evangelios, Jesus face fronte victoriosemente a alcun su adversarios in mal fide e ille establi le principio del autoritate supreme de Deo super qualcunque autoritate human.

I.

Le grandor de Deo, Creator e Soveran del integre universo, deberea inspirar timor e tremor a omne persona sensate. Le arrogantia e le rebellion a ille de multe humanos, tamen, es aliquando tanto grande que illes prefererea esser jectate in le inferno plus tosto que submitter se a ille. Le timor del Senior, tamen, es le principio del sapientia e illes qui lo practica ha bon senso (Psalmo 111:10). Isto es le caso de Moses, Aaron e Samuel, mentionate in le Psalmo que nunc nos va audir, credentes que Deo rendeva su portavoces e mediatores, e que Ille se complaceva de appellar “su amicos” e parlar a illes facie a facie.

“Le Senior regna! Que le nationes treme! Ille sede super su throno inter le cherubim. Que le terra freme! Le Senior sede majestose in Jerusalem, excelse super omne populos. Que illos lauda tu magne e terribile nomine, quia illo es sancte! Rege potente! Tu ama le justitia! Tu establiva lo que es recte. Tu ageva justemente e rectemente per tote Israel. Exalta le Senior, nostre Deo e adora prosternate ante le scabello de su pedes, quia ille es sancte! Moses e Aaron esseva inter su sacerdotes. Samuel alsi invocava su nomine. Illes invocava le Senior e ille les exaudiva. In un columna de nebulas ille les parlava e illes custodiava le leges e le decretos que ille les habeva date. Senior, Deo nostre! Tu les exaudiva, tu esseva propitie a illes, ma tu puniva lor actos peccaminose. Exalta le Senior, nostre Deo e adora le super su sancte monte in Jerusalem, quia le Senior, nostre Deo, es sancte!” (Psalmo 99).

II.

Le carga que Deo confide a Moses non es facile e il es comprensibile que Moses demanda a Deo de dar le “garantias” que Ille les accompania  e les adjuta. Isto es lo que nos trova in le episodio de Exodo 33, ubi Moses pete a Deo de accordar le un special revelation de Se ipse que le assecura. Deo lo accordara a ille solmente in maniera limitate. Le grandor de Deo, su gloria, de facto, non es qualcosa que le creatura human pote sustener e comprender in toto. Nos necessita semper un “interfacie” pro reportar nos con Deo, un mediation – le mediation que ille mesme establiva.

Moses vide le gloria del Senior

“Un die, Moses diceva al Senior: “Tu semper me diceva: ‘Conduce iste populo in ante’, ma tu non me faceva saper qui tu haberea mandate con me. Tu me diceva solmente: ‘Io te seligeva personalmente e vero tu ha ganiate mi favor’. Si ergo io vero ganiava tu favor, ostende me tu vias, ut io pote melio comprender te e continuar a gauder de tu favor. E considera, in ultra, que iste nation es tu populo”. Le Senior replicava: “Io te conducera personalmente, Moses, e io alleviara tu fardello”. Alora Moses diceva: “Si tu non conduce nos personalmente, non face nos quitar iste loco. Quomodo pote nos saper – io e tu populo – que nos ganiava tu favor, nisi tu ambula con nos? Quia il es justo tu presentia inter nos que distingue me e tu populo de omne altere populo del terra”. Le Senior replicava a Moses: “Certo io alsi facera lo que tu requireva, quia tu vero ganiava mi favor e io te seligeva personalmente”. Moses respondeva: “Alora ostende me tu gloriose presentia!”. Le Senior replicava: “Io facera passar tote mi bontate ante te e io proclamera coram te mi nomine, Yahweh, e le gratia que io concede e le compassion que io monstra. Tu, tamen, non potera vider directemente mi facie, quia al homine non es permittite vider me e viver”. E itero: “Ecce, il ha un placia apud me. Sta super iste rocca. Quando mi gloriose presentia transira, io te ponera in un fissura del petra e te protegera con mi mano dextere donec io habera transite. Alora io removera mi mano e tu me videra ab retro. Mi facie, tamen, non debe esser vidite” (Exodo 33:12-23).

III.

In le sequente tertie lectura, trahite del parte initial del epistola al christianos de Thessalonica, le Apostolo les lauda pro “le obra de vostre fide, le travalio de amor e le constantia de vostre sperantia in nostre Senior Jesus Christo”, tanto de commendar les como un exemplo pro multe altere christianos. Isto proque illes esseva “imitatores” del conducta del apostolo Paulo ipse, assi como Paulo esseva “imitator” de Christo. Le potentia del bon exemplo!

“Paulo, Sylvano e Timotheo, al ecclesia del Thessalonicenses que es in Deo nostre Patre e in le Senior Jesus Christo. Gratia e pace a vos. Nos semper regratia Deo pro vos omnes quando nos mentiona vos semper in nostre preces. Pois que coram nostre Deo e Patre nos rememora le obra de vostre fide, le travalio de amor e le constantia de vostre sperantia in nostre Senior Jesus Christo. Nos sape, fratres e sorores, amate per Deo, que ille ha vos seligite, pois que nostre evangelio non esseva annunciate vos solmente con parolas, ma alsi con potentia, con le Sancte Spirito e con profunde persuasion (de facto, vos sape lo que nos ha facite inter vos pro vostre amor). E vos deveniva imitatores nostre e del Senior, quando vos recipeva le Parola con le gaudio que veni del Spirito Sancte, nonobstante multe afflictiones. Le resultato de isto es que vos deveniva un exemplo pro tote le credentes del Macedonia e del Achaia, pois que ab vos, le Parola del Senior echoava non solmente in Macedonia e in Achaia, ma le fama del fide que vos ha in Deo se diffundeva ubicunque, de maniera que nos non necessita plus de parlar in re isto. Pois que illes mesme reporta como vos dava nos le benvenita e como vos esseva convertite a Deo ab le idolos pro servir le Deo ver e vivente e pro attender Su Filio del celo, le qual ille resuscitava ab le mortos, Jesus, que libera nos ab le ira a venir” (1 Thessalonicenses 1:1-10).

IV.

Le adversarios de Jesus, jelose de su popularitate, le considerava un menacia pro lor injuste poter e sasiva omne occasion pro essayar trappar le, discreditar le, accusar le ante le autoritates. Jesus, tamen, cognosceva lor intentiones malefic e sapeva ben como responder les e avergoniar les, relevante lor hypocrisia e mal fide. Nos vide isto in le sequente episodio de Mattheo 22, ubi Jesus alsi establi le primatia de Deo super qualcunque autoritate human que a Ille debera render conto. Render a Cesar lo que pertine a Cesar non significa submitter se acriticamente a su autoritate.

“Tunc le Phariseos sortiva e se congregava ut trovar le maniera de trappar Jesus per su parolas ipse. Illes mandava alcunes de su discipulos con partisanos de Herodes e le diceva: “Magistro, nos sape que tu es verace e que tu doce le via de Deo in veritate, impartialmente e sin favorisar alicuno. Ergo dice a nos quid tu pensa super isto: ‘Esque es il licite pagar impostos a Cesar o no?”. Jesus, tamen, cognosceva lor intentiones malevolente e diceva: “Hypocritas! Quare me pone vos a proba? Monstra me le numisma empleate pro le imposto”. Assi illes le dava un denario. Jesus les diceva: “De qui es iste imagine e inscription?”. Illes le replicava: “De Cesar”. Ille les diceva: “Ergo retorna a Cesar quid pertine a Cesar, e a Deo quid pertine a Deo”. Su responsa les stupefaceva, e illes le quitava e iva via” (Mattheo 22:15-22).

Oration

Omnipotente e eterne Deo! In Christo tu revelava tu gloria inter le nationes: preserva le obras de tu misericordia, ut tu Ecclesia in tote le mundo persevera con firme fide in le confession de tu nomine; per Jesus Christo, nostre Senior, qui vive e regna con te e con le Spirito Sancte, un sol Deo, nunc e semper. Amen.