Dominica, le 2 de maio 2021 – Lecturas biblic in interlingua

Dominica, le 2 de maio 2021 – le quinte dominica post Pascha

Lecturas biblic: Psalmo 22:23-30; Actos 8:26-40; 1 Johannes 4:7-21; Johannes 15:1-8 – con le voces de Paolo Castellina, Simona Cantarella, Bob McCarthy, Péter Kovács, Carmelo Serraino.

Le apostolo Paulo assere: “Proque mesmo si il ha si-dicite deos, tanto in celo quanto sur le terra, como indubitabilemente on adora multe deos e multe seniores, pro nos il ha solmente un Deo, le Patre, le qual creava omne cosas, e nos existe pro ille; e un sol Senior, Jesus Christo, per le qual tote le cosas existe e per le qual nos vive” (1 Corinthios 8:5-6). Le Deo ver e vivente, qui se revelava per le historia de Israel e in modo supreme in le Senior e Salvator Jesus Christo, es celebrate in le lecturas biblic de hodie qua Ille qui, non solmente es cercate, ma alsi es trovate de gente del mundo integre. Ille, de facto, es le fonte del ben e “bon fructos” pote esser producite in nostre vita quando nos es authenticamente in communion con Ille, sicut un planton produce uva quando illo es connectite al vite, ex le qual illo recipe lympha vital.

I. Psalmos 22:23-30

Le Deo celebrate in le Psalmos (e alsi in omne altere partes del Scripturas Sancte) non es solmente le Deo del populo de Israel, ma le Deo ver e vivente qui es cercate e trovate per tote le familias del nationes. Ille non es un idolo mute, ma Ille qui responde al affligite e al pauperes qui Le invoca.

“Lauda le Senior, oh vos omnes qui le time! Glorifica le, tote vos, descendentes de Jacobo! Monstra le reverentia, vos omnes, descendentes de Israel! Quia ille non ignorava, ni dispreciava le affliction del pauperes, ni ille se averteva ab illes, e quando illes clamava ad ille, ille les exaudiva. Io te laudara in le grande assemblea. Io complira mi votos al presentia de tote les qui te adora. Le pauperes mangiara e essera satisfacite. Tote illes qui quere le Senior le laudara. Lor cordes exultara con gaudio eterne. Le terra integre recognoscera le Senior e retornara a ille. Tote le familias del nationes se prosternara coram ille. Quia le poter regal pertine al senior. Ille domina super le gentes. Tote le populos prospere del terra se unira al celebration e te adorara; tote illes qui descende in le tumbas se prosternera coram ille, includite illes cuje vita terminara in pulvere. Nostre filios alsi le servira. Generationes futur audira re le meravilias del Senior”.

2. Actos 8:26-40 – Philippo e le eunucho ethiope

On poterea esser surprendite que, mesmo in ille tempores, un ethiope, un persona docte e influente, veniva a Jerusalem pro adorar Deo. On poterea demandar: “Proque facer isto? Esque il non habeva in Ethiopia jam multe deos a adorar e sanctuarios a visitar?”. In Jerusalem, tamen, ille non habeva venite pro ferias o tourismo… Ille habeva comprendite quanto false e frustranee esseva le paganismo de su proprie cultura e in Jerusalem ille quereva le Deo ver e vivente, Creator e Sustentor del integre universo. Ille voleva leger e comprender Su Parola. Ille haberea ibi alsi trovate le Christo, le Salvator del mundo, e le haberea confidite su vita integre. Nos sape del historia que justo iste homine, in tornar a domo habeva essite le instrumento pro portar le Christianismo pro le prime vice in Ethiopia. Le fide in Christo non es “un religion inter multe alteres”!

“Deinde, un angelo del Senior diceva a Philippo: “Leva te e vade verso sud sur le via que descende ab Jerusalem a Gaza. Illo es deserte. Assi ille se levava e partiva. Ibi ille incontrava un eunucho ethiope, un officiero del corte de Kandake, regina de Ethiopia. Ille esseva su tresorero e habeva venite a Jerusalem pro coler Deo. Ille esseva in su viage de retorno, sedeva sur su carro e legeva in alte voce un texto del propheta Isaia. Alora le Spirito diceva a Philippo: “Accede e adjunge te a iste carro”. Philippo, accurrente, le audiva durante que ille legeva ab le propheta Isaia e le demandava: “Esque tu comprende lo que tu lege?”.  Le homine replicava: “Quomodo poterea io comprender lo sin haber alcuno qui me lo explica?”. Assi ille invitava Philippo a montar e seder se apud ille. Ora, le passage del Scripturas que celle homine legeva esseva isto: “Ille esseva conducite al macello sicut un ove, e sicut un agno ante su tonsor es silente, ille non aperiva su bucca.  Ille esseva humiliate e recipeva nulle justitia. Qui poterea parlar re su descendentes? Quia su vita esseva subtrahite del terra”.  Igitur le eunucho diceva a Philippo: “Per favor, dice me super qui le propheta parla: se ipse o alicuno altere?”. Assi Philippo comenciava parlar e, incipiente ab iste passage del Scriptura, ille le proclamava le bon nova re Jesus. E dum illes procedeva per ille via, illes perveniva a in un loco ubi il habeva aqua. Le eunucho diceva: “Ecce aqua! Que me impedirea esser baptisate?”. Philippo le diceva: “Si tu crede de tote le corde, tu lo pote”. E le eunucho respondeva: “Io crede que Jesus es le Filio de Deo”. Alora ille ordinava al carro de haltar se, ambes descendeva in le aqua, e Philippo le baptisava. Quando illes ascendeva del aqua, le Spirito rapeva Philippo e le eunucho non le videva plus, ma ille prosequeva su cammino plen de gaudio. Philippo tamen se retrovava in Azoto e, in percurrer ille region, ille proclamava le bon nova a tote le urbes, donec ille perveniva a Cesarea”.

3. 1 Johannes 4:7-21 – Deo es amor

“Deo ha mandate su Filio unigenite in le mundo ut nos vive per su medio”: assi dice le evangelista Johannes in le texto que nos es sur le puncto de audir. Le Salvator Jesus Christo exprime le amor de Deo in un mundo plen de mentitas, de injustitias e de prepotentia. Docente amar, Ille habilita, pone in condition de amar celles qui se confide in Ille. Deo de facto es amor, e qui es authenticamente in communion con Ille, necessarimente exprime amor e communica amor. Que se intende tamen sub “amor”…? Secundo le doctrina biblic, amor es le resultato del application del stilo de vita exprimite per Su commandamentos. Tote le resto es un false o defectuose definition de amor.

“Car amicos, que nos ama le unes le alteres, quia le amor proveni de Deo, e quicunque ama ha essite generate de Deo ipse e cognosce Deo. Le persona qui non ama non cognosce Deo, quia Deo es amor. Nos recipeva un clar revelation in re lo que consiste le amor de Deo: Deo ha mandate su Filio unigenite in le mundo ut nos vive per su medio. Le amor consiste de isto: non que nos amava Deo, ma que ille amava nos e mandava su Filio pro devenir le propitiation de nostre peccatos. Car amicos, si Deo nos amava tanto, alora anque nos debe amar le unes le alteres. Nemo videva Deo unquam, ma si nos ama le unes le alteres, Deo demora in nos e su amor pervenira in nos a su consummation. Per isto nos cognosce que nos demora in Deo e ille in nos: in le facto que ille ha donate a nos de su Spirito. E nos videva e testifica que le Patre ha mandate le Filio pro esser le Salvator del mundo. Quicunque confessa que Jesus es le Filio de Deo, Deo demora in ille e ille in Deo. Nos perveniva cognoscer le amor que Deo ha pro nos e credeva a illo. Deo es amor e qui demora in le amor, demora in Deo, e Deo demora in ille. In isto le amor perveniva in nos a su consummation: pro isto nos non time le Die del Judicamento, quia justo sicut Jesus es, anque nos lo es in iste mundo. In le amor il ha nulle timor, quia le amor perfecte expelle omne timor. Iste timor de facto ha que a facer con le punition. Qui time le punition ha nullemente cognoscite per experientia le consummation de un tal amor. Nos ama quia ille amava nos primo. Si alicuno dice: “Io ama Deo”, ma odia su confratre, ille es un mentitor: qui non ama su confratre, que ille vide, non pote amar Deo, que ille non vide. Quia le commandamento que nos recipeva de Jesus es: Qui ama Deo, debe alsi amar su confratres”.

4. Johannes 15:1-8 – Jesus: le ver vite

Un planton pote producer uva solmente si, connectite al vite, illo recipe del vite lympha vital, alteremente illo es solmente un branca sic preste a esser jectate in le foco. Iste observation es obvie, ma multes non comprende como le mesme principio es valide pro nos alsi. Producer amor, gaudio, pace, patientia, benevolentia, bontate, fidelitate, gentilessa e auto-disciplina (Galatas 5:22) e altere qualitates como istos ancora, a gloria de Deo, es possibile solmente in communion con le Christo. Naturalmente, on trova qui es preste a denegar que isto es ver, ma, como dice le apostolo Jacobo: “Tote lo que nos recipe de bon, omne dono perfecte, veni ab alto e descende del Patre del lumines”, illo es ab Deo. Vamos audir lo que Jesus dice a iste reguardo.

“Io es le ver vite e mi Patre es le viticultor. Omne plantones que in me non fructifica ille rescinde e tote illos que produce fructos ille puta, ut illos produce magis fructos. Vos es jam munde propter le parola que io vos adressava. Remane in me e io remanera in vos! Sicut le plantones non pote fructificar si illos es distaccate del vite, vos non pote fructificar si vos non remane in me.  Io es le vite e vos le plantones. Qui remane in me e io in ille, produce multe fructos, quia sin me vos pote facer nihil. Si alicuno non remane in me, ille es jectate via sicut un planton e se sicca. Tal plantones es colligite, jectate in le foco e es ardite. Si vos remane in me e mi parolas remane in vos, pete quecunque vos vole e illo essera vos concedite. Mi Patre essera glorificate si vos produce multe fructos e monstra que vos es mi discipulos”.

Oration

Omnipotente Deo! Cognoscer Te vermente es vita eterne! Concede nos de pervenir a un cognoscentia semper plus grande de Tu filio Jesus Christo, via, veritate e vita ut nos seque firmemente su passos per le via que conduce al vita eterne; per Jesus Christo nostre senior, qui vive e regna con te, in le unitate del Spirito Sancte; un sol Deo, in le seculos del seculos. Amen.

 Musicas empleate in le podcast

  • Christ the Lord is Risen Today, Robert Williams, William Neil
  • Psalm 22, Genevan Psalter, stanzas in French and German
  • Brookfield, Our Daily Bread, Celtic hymns (2017).
  • Down in the River to Pray, Our Daily Bread, Celtic hymns (2017).
  • Jewels (When He Cometh), Our Daily Bread, Celtic hymns (2017).
  • Be Thou My Vision, Our Daily Bread, Celtic hymns (2017).
  • A Gaelig Blessing, John Rutter, Wayne Marshall (2020).