Dominica, le 21 de februario 2021 – Lecturas biblic in Interlingua

Dominica, le 21 de februario 2021 – le prime dominica de Quaresima

Lecturas biblic: Psalmo 25; Genesis 9:8-17; 1 Petro 3:18-22; Marco 1:9-15 con le voces de Paolo Castellina, Bob McCarthy, Péter Kovács, Carmelo Serraino, Alison Bailey Castellina.

Un cordial prisa de mano, un imbraciamento sincer, un basio intense, es pro nos expression de amicitate, de amor, de recognoscentia. Ancora alteres poterea esser le signos que porta con illos un signification que, per lor medio, es confirmate o reinfortiate. Alicun signos nos trova prescribite de Deo ipse in le Biblia, super toto illos que marca le establimento de un pacto o alliantia. Le iride, per exemplo, es le signo del pacto establite per Deo con Noe e su familia post haber les salvate del diluvio. Le Baptismo e le Cena del Senior es le signos e sigillos que le Senior Jesus institueva e que representa le obra complite de Ille pro le salvation del Sues ab le peccato e su consequentias. Tote isto nos trova in le lecturas biblic de iste septimana, sia ab le Vetule Testamento, sia ab le Nove Testamento, in perfecte harmonia.

I. Psalmo 25

Iste Psalmo exprime, in prime loco, le fiducia del credente in le Deo ver e vivente, qui nunquam delude qui in Ille confide su vita. In secunde loco, su desiro sincer e disponibilitate a cognoscer Su voluntate e de apprender ab le sapientia de Su Parola. In tertie loco, su laude e regratiamento pro su bontate, gratia, protection e fidelitate a su promissas, que semper se accompli. Nos trova in iste Psalmo alsi un pressante appello a Deo de esser salvate ab situationes difficile que le causa angustia e preoccupation. Vamos appropriar nos del expressiones de iste Psalmo ut illos deveni nostre precaria personal!

A te, Senior, io eleva mi anima. Deo mie, in te io confide. Que io non sia humiliate e que mi inimicos non exulta propter mi disfacta. Certo nemo qui se confide in te unquam essera humiliate, ma que le disgratia superveni a omnes qui essaya deciper alteres. Face me comprender tu vias, oh Senior! Doce me tu semitas! Dirige me in tu veritate e doce me, quia tu es le Deo de mi salvation! Io me remitte a te per tote le die. Rememora, oh Senior, tu misericordia, quia tu semper ageva in iste maniera! Oblida le peccatos de rebellion a te que io committeva durante mi juventute! Rememora me in le lumine de tu inexhauribile amor, quia tu es misericordiose, oh Senior! Le Senior es dulce e recte: isto es le ration perque tu doce al peccatores le maniera juste de viver. Que ille monstra al humiles su vias! Le Senior semper se demonstra fidel e digne de fiducia pro illes qui seque lo que prescribe su pacto. Propter le honor de tu nomine, oh Senior, pardona mi peccato, quia illo es grande! Le Senior monstra a illes que le seque fidelmente le maniera in le qual illes debe viver. Illes face le experientia de su favor; lor descendentes heredita le terra. Le Senior es amicabile a les qui le time. Ille les monstra lo que le pacto require. Mi oculos es semper fixe al Senior, quia ille me salva del trappas de mi inimicos. Respice ad me e habe misericordia, quia io es sol e paupere! Libera mi corde del angustia, provide a mi necessitates! Vide mi dolores e suffrentia; pardona tote mi peccatos! Respice quante inimicos io ha, quia illes se multiplicava e me odia de un odio cruel! Custodia mi anima e salva me; que io non sia humiliate, quia io faceva de te mi refugio! Que le innocentia e le honestate me protege, quia in te io pone mi sperantia! Oh Deo, libera Israel ex omne su tribulationes!

II. Genesis 9:8-17 – Le pacto de Deo con Noe e le esseres vivente del Terra

Desde millennios le iride, que sorti quando le nubes del tempesta dispare e le tempore seren retorna, es un signo que, gratias a Deo, le tenebras non durara pro semper. Le execution del juste judicio de Deo es un facto inevitabile, ma equalmente lo es le expression de Su gratia, del qual Noe e su familia habeva facite le experientia depost haber se confidite a ille e obedite a su instructiones concernente un arca.

Alora Deo diceva a Noe e a su filios: “Ecce, io nunc confirma mi pacto con te e tu descendentes post vos. E con omne creaturas vivente que es con vos, includite le aves, le animales domestic, e omne creaturas vivente del Terra con vos, tote los que sortiva del arca con te – omne creaturas vivente del Terra. Si, io confirma mi pacto con vos. Nunquam plus omne cosas vivente essera occidite per le aquas de un diluvio, nunquam plus un diluvio destruera le Terra”. Deinde Deo diceva: “Isto es le garantia del pacto que io establi con vos e omne creaturas vivente con vos, un pacto pro omne subsequente generationes. Io ponera mi iride in le nubes, e illo devenira un garantia del pacto inter me e le Terra. Quandocunque io porta nubes super le terra e le iride appare in le nubes, alora io me rememorara de mi pacto con vos e con tote le creaturas vivente de omne sorta. Nunquam plus le aquas devenira un diluvio e destruera omne cosas vivente. Quando le iride essera in le nubes, io lo videra e me rememorara del pacto eterne inter Deo e tote le creaturas vivente de omne sorta que es sur le Terra”. Pois Deo diceva a Noe: “Isto es le garantia del pacto que io confirma inter me e omne cosas vivente que il ha sur le Terra”.

III. 1 Petro 3:18-22

In iste texto, le apostolo Petro pone in relation le evenimentos del quales Noe e su familia habeva essite protagonistas (lor salvation ab le aquas de un diluvio destructive), e le aqua del baptismo christian, le qual “porta” nostre arca de salvation, illo es Jesus Christo. Vetule e Nove Testamento es in harmoniose relation: le prime contine prefigurationes del factos que le secunde annuncia.

Christo pativa pro nostre peccatos un vice pro semper, le justo pro le injustos. Ille moriva pro le peccatores pro portar vos in securitate apud Deo. Ille pativa le morte physic, ma esseva resuscitate al vita in le spirito. Assi ille vadeva predicar al spiritos que esseva in carcere – illes que esseva incredule ante multe tempore quando Deo expectava patientemente per tote le tempore que Noe fabricava su arca. Solmente octo personas esseva salvate del aqua per le aqua. Ille aqua es le figura del baptismo que nunc salva vos, non per remover le immunditia de vostre corpore, ma como le responsa de Deo pro un conscientia munde. Illo es efficace gratias al resurrection de Jesus Christo. Ora Christo ascendeva al celo. Ille es sedite in le placia de honor, le dextera de Deo, e tote le angelos, le potestates e le potentias es subjectate a ille.

IV. Marco 1:9-15

Le evangelista Marco conta in iste texto, in modo multo synthetic le baptismo al qual Jesus se submitteva, le proclamation de Su messianicitate e le annuncio que ille portava al mundo: que Deo es presente e regna. Repententia e fide in Ille solmente es le clave de nostre salvation ab le peccato e ab su consequentias negative.

Ora, il eveniva in ille dies que Jesus veniva ab Nazareth de Galilea, e ille mesme esseva baptisate in le fluvio Jordan per Johannes. E justo quando Jesus sortiva del aqua, ille videva que le celos se aperiva e le Spirito descendeva super ille como un columba. E un voce se audiva del celo, que diceva: “Tu es mi car Filio; in te io me complace”. Immediatemente le Spirito le impelleva vader in le deserto, Ille remaneva in le deserto durante quaranta dies e supportava tentationes que Satan le infligeva. Ille viveva inter bestias salvage, e angelos le ministrava. Ora, post le imprisionamento de Johannes, Jesus veniva in Galilea e proclamava le Evangelio de Deo. Ille diceva: “Le tempore es complite e le regno de Deo se approximava: repenti vos e crede al Evangelio”.

Oration

Omnipotente Deo, cuje Filio benedicte esseva conducite per le Spirito a suffrer le tentationes de Satan: veni tosto a adjuvar nos, qui es attaccate per multe tentationes; e, pois que tu cognosce le debilitate de cata uno de nos, que cata uno te trova potente a salvar; per Jesus Christo, tu Filio e nostre Senior, qui vive e regna con te e le Spirito Sancte, un sol Deo, nunc e semper. Amen.