Dominica, le 25 de april 2021 – Lecturas biblic in Interlingua

Dominica, le 25 de april 2021 – al quarte dominica post Pascha

Lecturas biblic: Psalmo 23; Actos 4:5-12; 1 Johannes 3:16-24; Johannes 10:11-18 – con le voces de Paolo Castellina, Simona Cantarella, Bob McCarthy, Péter Kovács, Carmelo Serraino.

Pro facer nos melio comprender un concepto o un lection, le Biblia (e, in particular Jesus) sovente emplea figuras rhetoric (similitudes, metaphoras, parabolas etc.) que es familial al contexto de su particular auditorio. Il non se tracta de correspondentias perfecte, quia il ha alsi differentias, ma illos servi pro ben communicar le idea intendite. Le lecturas biblic de hodie pone in evidentia le persona de Deo (e inde de Jesus) sicut un bon pastor. Le mundo del vita pastoral (le pastor e su oves), que esseva commun in ille tempores, es sovente empleate in le Scripturas pro facer comprender conceptos biblic clave. Qui non ha experientias de ille contexto, risca non comprender o equivocar. Pro comprender e appreciar le concepto intendite, le lector debera necessarimente approfundar le significato de iste figuras in examinar le vita que se faceva in ille tempores. Le prime e le ultime lectura biblic de hodie es simile al duo trenchos de pan que, in un sandwich, include le nutriente substantia de nostre fide.

I. Psalmo 23

Inter le psalmos del Biblia, le numero 23 (“Le Senior es mi pastor”) es certemente le plus mentionate, lecte e cantate. Le credente que se identifica con illo, se allegra grandemente, quia ille vide in Deo, e de illo face experientia, Ille qui provide a tote su necessitates. Il se tracta de nutrimento, reposo, relevamento, guida secur, conforto in afflictiones, reproche amorose, custodia ab periculos, benes e benignitate in abundantia. On poterea remarcar: qui unquam esserea tanto folle in voler se averter se de Ille? Nonobstante, il ha personas que lo face.

“Le Senior es mi pastor, e nihil me manca. Ille me porta a in pasturas verdeante; ille me conduce a aquas quiete. Ille restabli mi fortias; ille me conduce per semitas juste que da honor a su nomine. Mesmo quando io debe percurrer le valleas le plus obscur, io non time periculos, quia tu es con me; tu virga e tu baston me reassecura. Tu me prepara un banchetto justo in presentia de mi inimicos. Tu me honora per unguer mi capite con oleo e mi cuppa disborda de benedictiones. Certo benignitate e misericordia me subsequera tote le dies de mi vita, e io habitara in le domo del Senior pro le resto de mi vita”.

II. Actos 4:5-12

Le Senior e Salvator Jesus Christo non solmente es le nomine de un personage del passato (morte e interrate) que hodie on pote commemorar e possibilemente imitar, ma un realitate presente e operante, cuje tangibile effectos on non pote ignorar e que defia le mal stilo de vita e le dominatores de iste mundo. Con le hardimento e potentia que le Spirito de Christo infundeva in illes, le apostolos Petro e Johannes, in iste texto, defia le callositate e le mal fide del autoritates con un message efficace que transforma le realitate. “Le nomine” de Jesus esseva e remane potente. Le apostolos hardi vocar al repententia e al fide personas de omne sortas, mesmo lor adversarios.

“Le die sequente, le consilio de tote le prepositos de Israel, le ancianos e le expertos del lege se congregava in Jerusalem. Annas, le sacerdote summe, esseva ibi alsi, insimul con Caiphas, Johannes, Alexandro, e altere membros del familia del sacerdotes summe. Depost haber facite star coram illes Petro e Johannes, illes les interrogava: “Per qual poter o in cuje nomine vos faceva isto?”. Tunc Petro, replenate de Spirito Sancte, replicava: “Prepositos del populo e ancianos, si nos hodie es questionate a causa de un bon obra facite a un homine infirme – per qual medio iste homine esseva sanate – sia cognite a vos omnes e a tote le populo de Israel que iste homine qui hodie sta coram vos in plen sanitate, esseva sanate per le medio de Jesus Christo, le nazareno, que vos crucifigeva ma que Deo resuscitava del mortos. Iste Jesus es le lapide que vos edificatores reprobava ma que deveniva le petra angular. De facto, il ha salvation in necuno altere, quia il non existe altere nomines sub le celo que sia date al homines, per le qual nos necessita esser salvate”.

III. 1 Johannes 3:16-24

Le amor de Deo, incarnate in Jesus de Nazareth e vivite per qui Le seque, contradice e subverte le philosophias e le religiones de iste mundo, quia illo es radicalmente differente de illos. Como il esseva remarcate: “Le amor se revela justo in le facto que le nobile se inclina e descende verso ille qui non es nobile, le ric verso le povre, le belle verso le repulsive, le bon e le sancte verso le mal e le vulgar, le Messia verso le publicanos e le peccatores; e isto sin le angustia antique de perder se e de humiliar se, ma in le persuasion authenticamente religiose de obtener, per iste ‘inclinar se’, ‘lassar se ir’, e ‘perder se’ le maximo: devenir simile a Deo”. Nos vide isto magnificamente in iste texto del prime littera del apostolo Johannes.

“Nos perveniva cognoscer lo que es le ver amor: que Jesus relinqueva su vita pro nos. Ita nos debe esser preste a relinquer nostre vita pro nostre confratres. Si alicuno possede substantias de iste mundo e vide su confratre que care de su necessitate vital e non es preste misericordiosemente sublevar le de tal condition, como poterea le amor de Deo demorar in ille? Car filios, il non suffice asserer con parolas que nos ama, ma il es nostre actiones que demonstra si lo que nos dice es veritate. Nostre actiones va monstrar que nos pertine al veritate. Il es assi que nos potera esser confidente quando nos presentara nos coram Deo. Tunc, mesmo si nostre cordes poterea facer nos sentir culpabile, Deo es plus grande del sentimentos de nostre cordes, e ille cognosce toto. Car amicos, si nos non senti esser culpabile, nos potera venir a Deo con fiducia, e nos recipera de ille quecunque nos petera, quia nos le obedi e face le cosas que le place. E isto es su commandamento: nos debe creder in le nomine de su Filio, Jesus Christo, e amar le unes le alteres, sicut ille commandava a nos. Qui obedi al commandamentos de Deo permane in communion con ille, e ille con illes. Nos sape que Deo demora in nos per le Spirito que ille nos dava”.

IV. Johannes 10:11-18

Le bon pastor es qui demonstra complete e sacrifical dedication al ben del oves que le pertine. De ille illos pote haber complete fiducia. Iste es le concepto de base que, in ultra iste metaphora, Jesus vole communicar a nos. Qui alteres, in iste mundo, poterea unquam dicer de haber date se ipse completemente, usque le extreme sacrificio, pro su fideles? Il non existe altere leader religiose, passate o presente, que pote comparar se a Ille. Qui le cognosce vermente Le seque e miscognosce quicunque altere.

“Io es le bon pastor. Le bon pastor es preste a sacrificar su vita ipse pro su oves. Le mercenario, qui non es pastor e cuje oves non es le proprie, quando ille vide le lupo que veni, ille derelinque le oves e fugi – e le lupo los rape e los disperge. Isto eveni quia ille es un mercenario e non le pastor – ille oves non le concerne. Io es le bon pastor: io cognosce mi proprie oves e illos me cognosce – justo sicut le Patre me cognosce e io cognosce le Patre – assi io sacrifica mi vita pro le oves. Io ha altere oves, que non es ex iste oviario, e il es necesse que etiam illos io adduce. Illos va audir mi voce, e assi il habera un sol grege con un pastor. Il es propter isto que le Patre me ama – quia io sacrifica mi vita ut itero lo sume. Nemo pote privar me de mi vita, ma io lo sacrifica voluntarimente. Io ha le potestate de deponer lo quando io vole e etiam de sumer lo itero. Isto es lo que mi Patre ha commandate”.

Oration

Oh Deo, cuje Filio Jesus es le bon pastor de tu populo: que quando nos audi su voce nos recognosce qui voca nos per nomine e le seque a ubi ille nos conduce; qui con te e con le Spirito Sancte vive e regna – un sol Deo, in le seculos del seculos. Amen.

Le musicas empleate in iste programma

  • Ernst Stolz, Psalmo 23, Psalterio de Geneva, elaboration de Goudimel.
  • Junge Mitteldeutsches Barockansamble, Mon Dieu me paist sous sa puissance haute (Psalmo 23).
  • Michele d’Ambra, Certo beni e benignità (canto christian traditional italian, ab YouTube).
  • Ernst Stolz, “Christus Wir sollen Loben”.
  • Ernst Stolz, Easy Duos: (1) Now Should I True Love know, (2) Cortesia amorosa.
  • Grimethorpe Collery Band, Guide Me Oh Thou Great Redeemer.