Dominica, le 31 de Januario 2021 – Lecturas biblic in Interlingua

Dominica, le 31 de januario 2021 – le quarte dominica post Epiphania

Lecturas biblic: Psalmo 111; Deuteronomio 18:15-22; 1 Corinthios 8:1-13; Marco 1:21-28 con le voces de Paolo Castellina, Simona Cantarella, Carmelo Serraino, Péter Kovács, Bob McCarthy.

Le circumstantias in le quales nos vive hodie compelle nos al isolamento social. Il ha le risco, in alicun maniera, que nos nos accostuma al isolamento. Le poter exploita iste situation a proprie avantage pro melio controlar nostre vita. Pro nos christianos, reunir nos quam communitate es essential. Le surrogatos del incontros fraternal non es comparabile al ricchessa del incontro personal. Il es insimul a alteres que nos es instruite in le Parola de Deo e nos cresce in le fide. Il es in iste contexto que nos exerce le virtutes christian. Le lecturas biblic de hodie celebra e establi con autoritate le principios del dimension communitari del populo de Deo.

I. Salmo 111

Le assemblea del populo de Deo es fonte pro nos de grande gaudio. Insimul nos lauda e regratia le Senior, e insimul Deo nos instrue in Su Parola. Illo es nostre nutrimento spiritual. Le Psalmo 111 celebra e exalta le dimension communitari de nostre fide e su finalitates.

Alleluia! Lauda Deo! Io rendera gratias al Senior con tote mi corde in le consilio e congregation del justos. Le obras del Senior es magne. Illos es querite de omnes qui los desira ardentemente. Tote lo que ille face revela su gloria e majestate; su justitia permane in le seculos del seculos. Ille face cosas stupefaciente que essera rememorate; le Senior es misericordiose e pietose. Ille da nutrimento a les qui le time; ille se rememora semper de su pacto. Ille annunciava que haberea facite obras potente pro su populo e les dava le terra de altere nationes. Su actiones es characterisate de veritate e justitia; tote su commandamentos es digne de confidentia. Illos non cambia, es firme pro semper e debe esser executate fidelmente e con integritate. Ille pagava pro su populo lor complete precio de redemption; ille garantiva que su pacto essera valide pro semper. Su nomine es sancte e inspira respecto. Obedir al Senior es le principio fundamental del ver sapientia; tote illes qui obedi a su commandamentos cresce in sapientia. Ille recipera laudes pro semper.

II. Deuteronomio 18:15-22 – Ver e false prophetas

In le perspectiva biblic le prophetas non solmente (quando il es necessari) predice evenimentos futur, ma illes es super toto mediatores inter Deo e Su populo. Per lor medio, le populo de Deo es instruite viver secundo Su voluntate. Lor responsabilitate es tanto grande que non accomplir lo fidelmente o transmitter false messages, es un peccato extrememente grave. Iste texto parla re le responsabilitates del prophetas. Illo preannuncia, tamen, alsi le Propheta per excellentia, le Parola de Deo qui deveniva un homine: le Senior e Salvator Jesus Christo.

Moses continuava dicer: “Deo, le Senior, suscitara pro vos ab inter vostre fratres, vostre gente, un propheta como io. Vos le debe prestar attention. Isto es exactemente lo que vos requireva de Deo, vostre Senior, quando vos esseva congregate apud le Horeb. Vos diceva: Non plus face nos audir le voce del Senior, nostre deo o vider iste foco deflagrante, ne nos mori! Deinde le Senior me diceva: “Lo que illes diceva es bon. Io suscitara pro illes un propheta simile a te ab inter lor fratres, lor gente. Io ponera mi parolas in su bucca e ille les dicera quecunque io le habera commandate. Io considerara personalmente responsabile quicunque, qui non vole prestar attention al messages que le propheta proclamara in mi nomine. Le propheta, tamen, qui falsemente presume dicer in mi nomine quid io non le autorisava dicer, o parla in le nomine de altere deos, ille propheta debera esser condemnate a morte. Ora, si vos dice in vos mesme: “Quomodo potera nos comprender quando un propheta parla falsemente in le nomine del Senior?”. Quandocunque un propheta parla in mi nomine e le prediction non se accompli, alora io non le dava un tal message; ille propheta parlava sin mi autoritate e vos non le debe timer”.

III. 1 Corinthios 8:1-13

In le dominio del communitate christian, cata uno debe respicer attentivemente su fratres e sorores in le fide. Isto implica considerar le condition spiritual de cata uno, facente attention a non turbar qui es debile in le fide, ma a accompaniar les con patientia a crescer. Isto es le subjecto adressate del Apostolo in le sequente passage. Le contexto de ille tempores esseva differente del nostre, ma le principio que le texto establi remane valide hodie alsi.

“Concernente le alimentos sacrificate al idolos, nos sape que “nos omnes ha cognoscentia”. Un tal “cognoscentia”, tamen, rende arrogante, ma le amor edifica semper. Si alicuno reputa cognoscer qualcosa, ille ancora non cognosce como ille deberea cognoscer. Ma si alicuno ama Deo, ille es cognoscite per Deo. Concernente, alora, le mangiar alimentos sacrificate a idolos, nos sape que un idolo non ha alicun existentia real, e que il non existe plus que un sol Deo. Proque mesmo si il ha si-dicite deos, tanto in celo quanto sur le terra, como indubitabilemente on adora multe deos e multe seniores, pro nos il ha solmente un Deo, le Patre, le qual creava omne cosas, e nos existe pro ille; e un sol Senior, Jesus Christo, per le qual tote le cosas existe e per le qual nos vive. Non omnes, tamen, ha iste sorta de cognoscentia. Alcunes, habente essite accostumate al idolos in le passato, mangia iste alimentos como un sacrificio facite al idolos, e lor conscientia pro isto remane contaminate, proque illo es debile. Ora, il non essera alimentos que rendera nos acceptabile a Deo. Nos non deveni pejor si nos non mangia, e nos non deveni melior si nos lo face. Ma presta attention: iste tu libertate poterea scandalisar les qui son debile in le fide. Proque si alicuno debile in le fide vide te qui possede cognoscentia, prander in un templo de idolos, an non su conscientia esserea incoragiate mangiar alimentos offerite a idolos? Assi, a causa de tu cognoscentia le fratre o soror debile, pro le qual Christo moriva, es damnificate. Si tu pecca in iste maniera contra tu fratres o tu sorores, e vulnera lor conscientia, tu pecca contra Christo. Pro iste ration, si un alimento induce mi fratre o mi soror a peccar, io nunquam plus mangiara carne, de sorta que io non es le causa del peccato de mi fratre o de mi soror”.

IV. Marco 1:21-28

Le Senior e Salvator Jesus Christo reputava importante le reuniones septimanal del populo de Deo e los honorava semper con su presentia. Quando ille esseva presente in illos in le die de Sabbato, semper occurreva cosas remarcabile. Invitate ibi a docer, su inseniamento tangeva cordes e mentes, e ille operava liberationes. Nos vide isto in le sequente passage del evangelio. Pro nos illo es un appello a assecurar nos que in nostre reuniones de culto le parola de Jesus sia central.

Assi illes entrava in le citate de Capharnao. In le die del Sabbato, Jesus vadeva a in le synagoga e inseniava. Le gente ibi esseva meraviliate de su inseniamento, proque ille les inseniava como uno qui vermente ha autoritate, e non como faceva le expertos del lege de Moses. Justo alora, in le synagoga, esseva presente un homine affligite per un spirito immunde, e ille homine comenciava exclamar: “Lassa nos in pace, Jesus le Nazareno! Esque tu veniva hic pro destruer nos? Io sape qui tu es: le Sancto de Deo!”. Ma Jesus le reprimendava dicente: “Silentio! Sorti de ille!”. Assi, depost haber le jectate in convulsiones, le spirito immunde critava con alte voce e sortiva de ille homine. Omnes esseva grandemente surprendite e se demandava le un le alteres: “Que es isto? Un doctrina nove inseniate con grande autoritate! Ille mesmo commanda al spiritos immunde e illes le obedi!”. Assi, le nova re Jesus se dispergeva rapidemente in tote le region circumstante le Galilea.

Oration

Omnipotente e eterne Deo! Tu governa omne cosas, sia in celo, sia sur le terra: audi misericordemente le supplicas de tu populo, e in nostre tempore concede nos le pace: per Jesus Christo, nostre Senior, qui vive e regna con te e con le Spirito Sancte, un sol Deo, nunc e semper. Amen.