Dominica, le 7 de martio 2021 – Lecturas biblic in interlingua

Dominica, le 7 de martio 2021 – le tertie dominica del quaresima

Textos biblic: Psalmo 19; Exodo 20:1-17; 1 Corinthios 1:18-25; Johannes 2:13-22 con le voces de Paolo Castellina, Bob McCarthyPéter KovácsCarmelo SerrainoSimona Cantarella.

Nos vive in le era del communication. In poc secundas messages scripte, audio e video circula in le mundo e pote esser recipite de quicunque qui ha solmente un parve telephono cellular in su tasca. On pote responder a tal messages e de illos producer alteres. Le technologia del communication se developpava e se developpara ancora justo proque nos humanos esseva create a imagine de Deo, le Communicator per excellentia. Le Psalmo 19, con le qual incipe nostre lecturas biblic hodie, indica le duo modos per le quales Deo revela Se ipse e Su voluntate: le observation del natura e Su Parola-Lege, semper evidente a nos omnes.  Illo es le Lege moral continente in le Decalogo, in observar le qual nostre vita es garantite. Isto nos lo trova in le secunde lectura. Nostre “apparato de reception” functiona, ma un grande parte del humanitate ignora Su messages e mesmo dice de non haber los recipite! Multe gente considera alsi insensate le message de gratia del Evangelio, e prefere religiones e philosophias que illo reputa plus convenibile. Isto es lo que le apostolo Paulo releva in nostre tertie lectura, e que nos vide alsi illustrate in le quarte lectura ab le evangelio secundo Johannes. In illo Jesus disembarassa le Templo del false religion, sicut lo habeva alsi denunciate le antique prophetas de Israel, messageros de Deo.

I. Psalmo 19

Il ha personas qui pensa que Deo serea absente e que su voce non se senti plus. Illes es in mal fide: Deo parla forte- e clarmente. Nos Le pote de facto audir quando nos medita super le meravilias del natura e pois per le medio de Su Lege moral – que reflecte su character e que es pro nostre bon. Le  psalmista hic celebra Deo qua le grande Communicator e se appella a Ille ut su vita de credente sia semper melio conforme a Su voluntate.

“Le celos declara le gloria de Deo, e le firmamento annuncia le obra de su manos. Die post die illos continua parlar; nocte post nocte illos face cognoscer lor creator. Illos parla, mesmo sin sonos o parolas; lor voce jammais se audi. Tamen, lor message echoa in omne partes del Terra; lor parolas se diffunde usque al horizonte le plus lontan. In le celos Deo poneva un habitation pro le sol. De illo illo sorti gloriose sicut un sponso de su lecto nuptial. Illo exulta sicut un athleta qui vince su cursa. Le sol surge ab un confinio del celos e procede in su curso usque al altere confinio. Nemo pote occultar se de su calor. Le lege del Senior es immaculate, illo revivisce le anima; le testimonio del Senior es digne de fiducia, illo rende sapiente personas naive Le commandamentos del Senior es juste, illos illumina le oculos. Le respecto pro le Senior imparti puritate, illo es un valor permanente. Le leges del Senior es ver, cata un de illos es juste. Illos es multo plus desirabile del auro, multo plus del petras preciose. Illos es plus dulce que le melle, del melle que stilla ab le favos. Illos servi de admonition pro me, tu servitor, e da grande recompensas a illes qui los obedi. Como poterea io deteger tote le peccatos que se occulta in mi corde? Munda me de iste celate faltas! Preserva me, tu servitor, del peccatos de superbia, que illos non me domina! Alora io essera immaculate e innocente de grave peccatos. Que le parolas de mi bucca e le meditation de mi corde te sia agradate, oh Senior, mi adjutor e mi redemptor!” (Psalmo 19).

II. Exodo 20:1-17

Le Dece Commandamentos, radicate in le conscientia human e pois proclamate de Moses al populo de Israel, resume le criterios de conducta optimal que garanti nostre vita. Illos es le Magna Charta del populo de Deo, appellate a testimoniar fidelitate in le contexto de un humanitate rebelle que los denega. Le Dece Commandamentos es le hereditage del civilisation hebraic e christian que alcunes hodie volerea deler, ma solmente a proprie damno.

“Deo proclamava tote iste parolas: “Io, le Senior, es vostre Deo, qui te faceva sortir del pais de Egypto, le terra del servitude. Que tu non habe ulle altere deo coram me! Non face te ulle imagine sculpite o ulle similitude de lo que es in le celo supra, que es in le terra subtus, o in le aquas que es infra le terra! Non adora, nec cole los; quia io, le Senior, tu Deo, es un deo jelose! Io responde al transgressiones del patres puniente lor filios usque al tertie e quarte generation de illes qui me repudia, ma impartiente mi amor loyal pro mille generationes de illes qui me ama e observa mi commandamentos. Non emplea impropriemente le nomine del Senior proque ille non lassara impunite quicunque face un uso improprie de Su nomine! Rememora te del die del Sabbato: considera lo como un die special! Tu pote laborar sex dies e facer tote tu occupationes in ille dies, ma le septime die es un die consecrate al Senior, tu deo. In ille die non face ulle labor; ni tu, ni tu filio, ni tu filia, ni tu servitor, ni tu servitrice, ni tu bestial, ni le estraniero qui habita in tu casa; pois que le Senior ha facite le celos e le terra, le mar e tote lo que il ha in illos, e ille se reposava in le septime die! Pro iste ration le Senior ha benedicite le Die del Sabbato e lo poneva a parte como un die sancte. Honora tu patre e tu matre, a fin que tu vive pro longe tempore in le terra que le Senior, tu Deo da a vos! Non assassina! Non committe adulterio! Non roba! Non rende false testimonio contra tu proximo! Non concupisce le casa de tu proximo! Non concupisce le uxor de tu proximo; ni su servitor, ni su servitrice, ni su bove, ni su asino, ni qualcunque cosa que pertine a tu proximo!” (Exodo 20:1-17).

III. 1 Corinthios 1:18-25

Le predication del Evangelio, cuje centro se trova in le valor de salvation del patimentos, morte in cruce e resurrection de Jesus Christo, esseva e remane ancora hodie considerate como ridicule, insensate e folle. Illo, de facto, es multo lontan de lo que dice le philosophias e le religiones de iste mundo, de lor criterios e expectationes; plus que isto: de quid es considerate rationabile.  Iste reaction, tamen, rende solmente le testimonio de quanto le humanitate se averteva de tote lo que Deo establiva quando ille creava le mundo. A disrationar, de facto, es le humanitate cadite in peccato e que vade verso le perdition. Il es pro iste ration que le Evangelio voca nos a cambiar nostre modo de pensar e de vider le mundo, pro realinear lo a Deo. Nostre salvation parti justo de ibi.

“De facto, le message concernente le cruce pare insensate a illes qui vade in perdition, ma a nos qui es salvate, illo es le potentia de Deo. Pois que il es scribite: “Io destruera le sapientia del sapiente e io reprobara le intendimento del intelligente”. Ubi es le sapiente? Ubi es le experto in le lege mosaic? Ubi es le polemista de iste etate? An Deo non rendeva insensate le sapientia de iste mundo? Le mundo, con tote su sapientia, esseva incapace a recognoscer Deo in le terminos de Su proprie sapientia, assi Deo se complaceva de salvar le credentes per le insensatessa del predication. Pois que le judeos require signos miraculose e le grecos quere sapientia, ma nos predica re Christo crucifigite: isto pro le judeos es scandalose e pro le grecos es insensate. Ma pro illes qui es vocate, sia judeos, sia grecos, Christo es le potentia de Deo e le sapientia de Deo. Proque le insensatessa de Deo es plus sapiente que le sapientia human, e le debilitate de Deo es plus forte que le fortia human. Pensa al circumstantias de vostre vocation, fratres e sorores! Non multe de vos esseva sapiente secundo criterios human, non multe de vos esseva potente. Ma Deo seligeva lo que le mundo reputa insensate pro avergoniar le intelligente, e Deo seligeva lo que le mundo reputa debile pro avergoniar le forte. Deo seligeva lo que in le mundo es considerate basse e dispreciate, lo que es considerate nihil, pro reducer a nihil lo que es considerate importante, a que nemo pote vangloriar se coram ille. Il es a causa de Ille que vos es nunc in Christo Jesus, le qual deveniva pro nos sapientia de Deo, e justification, e sanctification e redemption, a que, como il es scribite, “Si tu vole vantar te, vanta te solmente del Senior!”.” (1 Corinthios 1:18-25).

IV. Johannes 2:13-22

Le antique prophetas de Israel esseva le plus importante interfacie de communication inter Deo e Su populo. Illes transmitteva Su prescriptiones, promissas e consolationes, ma alsi forte reproches e menacias quando le populo e su institutiones mancava absolver a su deberes coram Deo e se corrumpeva. Le Senior Jesus Christo esseva multo plus que un propheta: Ille esseva le Parola de Deo devenite un homine e venite “in le domo de Su Patre”. Quid habeva le trovate? Corruption e exploitation del religion. Ecce, assi, lo que Jesus, in le episodio del “Purification del Templo” lo disembarassa de tote lo que lo guasta e lo corrumpe, reportante lo a su functiones original. Le discipulos lo recognosce e crede al parolas del Biblia, a iste reguardo, e a illos de Jesus. Isto es un equation remarcabile!

“Le festa hebraic del Pascha esseva prope, e Jesus ascendeva a Jerusalem. In le cortes del templo ille trovava le venditores de boves, oves e columbas, insimul al cambiatores de moneta sedite a lor bancos. Assi Jesus faceva un flagello de funiculos e ejectava omnes del cortes del templo con le oves e le boves. Ille dispergeva le monetas del cambiatores e subverteva lor bancos. A illes qui vendeva le columbas, ille diceva: “Porta via iste cosas de hic! Non transforma in un mercato le domo de mi Patre!”. Su discipulos rememorava lo que dice le Scriptura: “Le zelo pro tu templo me consume”. Alora le autoritates del judeos reageva e diceva: “Qual autoritate ha tu pro facer tal cosas?”. Ma Jesus les respondeva: “Destrue iste templo, e in tres dies io lo edificara de novo”. Alora le autoritates del judeos le diceva: “Il occurreva quaranta sex annos pro construer iste templo, e tu lo volerea edificar de novo in tres dies?” Ma Jesus parlava del templo de su corpore. Depost su resurrection del mortos, su discipulos se memorava que ille habeva dicite isto, e illes credeva al Scripturas e a iste parola de Jesus” (Johannes 2:13-22).

Oration

Omnipotente Deo! Tu sape que nos ha in nos nulle fortia pro adjutar nos ipse. Sustene nos, sia exteriormente in nostre corpores, sia interiormente in nostre animas, ut nos sia defendite ab omne adversitates que poterea accider a nostre corpores, e ab omne pensamentos mal que poterea attaccar e damnificar nostre anima! Per Jesus Christo nostre Senior, qui vive e regna con te e con le Spirito Sancte, un sol Deo, nunc e semper. Amen.