Dominica, le 9 de maio 2021 – Lecturas biblic

Dominica le 9 de maio 2021 –  le sexte dominica post Pascha

Lecturas biblic: Psalmo 98; Actos 10:44-48; 1 Johannes 5:1-6; Johannes 15:9-17 – voces de Paolo Castellina, Simona Cantarella, Péter Kovacs, Carmelo Serraino, Bob McCarthy.

Le Spirito Sancte de Deo es in action in iste mundo, non solmente pro conducer le historia al completion del propositos eterne que Deo establiva pro illo, ma alsi pro portar  gente de omne nationes al fide in Christo. Iste facto es celebrate in tote le lecturas biblic de iste dominica con diverse emphases. On releva ibi que le observantia del commandamentos que Deo nos dava pro nostre conducta, surge in nos del amor e recognoscentia que nos ha pro le meravilias que Deo compliva e compli pro nos in Christo. In ultra, il non se tracta solmente de nostre persuasion que le stilo de vita que le commandamentos promove es optime, ma illos es expression genuin de nostre communion con Christo.

I. Psalmo 98

Le psalmo 98 es un psalmo prophetic. Deo compliva su promissa: le Senior e Salvator Jesus Christo veniva in iste mundo, e gente de omne tempores e paises grandemente se allegra de isto, elevante verso Ille hymnos de laude e de regratiamento. Su advenimento es anque un judicio, proque, como dice Jesus ipse: “Qui crede in ille non va esser condemnate. Qui, tamen, non crede, jam ha essite condemnate, quia ille non ha credite in le nomine del unigenite Filio de Deo” (Johannes 3:18).

“Canta al Senior un cantico nove, quia ille faceva meravilias! Su mano dextere e su brachio sancte ha demonstrate su potentia de salvation. Le Senior demonstra su potentia de salvation, ille revelava su justitia coram omne nationes. Ille se recordava de su promissa de amar Israel esser fidel a ille. Omne terminos del terra videva le salvation que nostre Deo nos impartiva. Jubila e erumpe in laudes al Senior, exulta e canta con gaudio! Canta vostre laudes al Senior con le harpa e le voce del psalmos! Con trompas e le rugito del corno de ariete, jubila coram le rege, le Senior! Que le mar e toto lo que illo contine crita de gaudio, insimul al mundo e qui lo habita! Que le rivieras plaude e que le montes canta al unisono coram le Senior, quia ille veni a judicar le terra! Ille judicara le orbe del terras con justitia e le populos con equitate”.

II. Actos 10:44-48 – Paganos recipe le Spirito Sancte

Le Spirito Sancte de Deo es in action in iste mundo, non solmente pro conducer le historia verso le objectivo que Ille establiva, ma in portar gente de omne tempores e paises al repententia e al fide in le Senior e Salvator Jesus Christo. In ultra, Ille les sustene in lor processo de sanctification usque al complimento final de lor salvation. Le apostolo Paulo dice: “Io es secur de isto: que ille qui comenciava inter vos tal bon obra, lo portata al completion quando finalmente le Christo retornara” (Philippenses 1:6).

“Durante que Petro ancora diceva iste parolas, le Spirito Sancte cadeva sur omnes qui audiva su message. Le credentes hebree qui habeva accompaniate Petro esseva grandemente stupefacte que le gratia del Spirito Sancte habeva essite effundite mesmo sur gente pagan, quia illes les habeva audite parlar miraculosemente in altere linguas e laudar Deo. Alora Petro respondeva: ‘Nemo poterea prohiber que illes sia baptisate in aqua, nam illes recipeva le Spirito Sancte justo sicut nos, nonne?’. Assi ille les ordinava de baptisar les in le nomine de Jesus Christo. Deinde Cornelio le rogava de remaner con illes alicun dies”.

III. 1 Johannes 5:1-8 – Le fide in le Filio de Deo

Quicunque poneva su fide in Jesus Christo qua su Senior e Salvator, ama Deo, “Ille qui les generava” cordialmente. Ille ama alsi su fratres e sorores in le fide e observa de bon voluntate le commandamentos de Deo. In iste mundo ille certemente habera difficultates, ma finalmente ille prevalera super illes. Le Spirito de Deo de isto rende su testimonio.

“Omnes qui crede que Jesus es le Messia, ha essite generate de Deo, e omnes qui ama le Patre, ama alsi le filios que Ille generava. Per isto nos cognosce que nos ama le filios de Deo: quandocunque nos ama Deo e obedi a su commandamentos, nam le amor pro Deo se manifesta in le obedientia a su commandamentos. Obedir a su commandamentos non es onerose, proque tote illes qui ha essite generate de Deo surmonta le mundo. Isto es le potentia del victoria que surmonta le mundo: nostre fide. Ora, qui es le persona qui surmonta le mundo nisi qui crede que Jesus es le Filio de Deo? Jesus Christo es le qui veniva serviente se del aqua e del sanguine; non del aqua solmente, ma del aqua e del sanguine. Il es le Spirito qui rende nos iste testimonio, nam le Spirito es le veritate. Assi, tres es los que rende testimonio de isto: Spirito, aqua e sanguine, e le testimonio de iste tres concorda in toto”.

IV. Johannes 15:9-17

Nos observa de bon voluntate le commandamentos de Deo in le persuasion que illos es le melio pro nos ipse e nostre proximo. In ultra, illos es expression de nostre amor pro Deo que los dava a nos, e de Su Christo, qui los observava perfectemente. Tote isto es le resultato del obra regenerante del Spirito de Deo in nos. Isto es le presupposition del “bon fructos” que nostre vita es intendite portar.

“Sicut le Patre me ama, etiam io vos ama. Remane in mi amor! Quando vos obedi a mi preceptos, vos remane in mi amor, justo como io obedi al preceptos de mi Patre e remane in su amor. Io vos diceva iste cosas ut mi proprie gaudio sia in vos e vostre gaudio sia assi complete. Isto es mi precepto: Que vos ama le unes le alteres justo sicut io vos ama! Il non ha amor plus grande que dar su proprie vita pro su amicos. Vos es mi amicos quando vos face quid io vos prescribe. Io non plus appella vos servos, quia le servo non cognosce quid face su domino. Vos es nunc mi amicos, nam io vos faceva cognoscer toto lo que mi Patre me diceva. Vos non eligeva me, ma io eligeva vos. Io vos appunctava ut vos vade e produce fructos; fructos que permane, ut quecunque vos pete de mi Patre in mi nomine, ille lo da a vos. Isto io vos commanda: que vos ama le unes le alteres!”

Oration

Oh, Deo! Tu preparava pro qui te ama cosas tanto bon que illos vade ultra nostre comprension. Effunde in nostre cordes un tal amor pro Te, ut nos, in amar te in omne cosa e super omne cosa obtene tu promissas, que vade ultra a toto lo que nos poterea desirar; per Jesus Christo, nostre Senior, qui vive e regna con te e con le Spirito Sancte – un sol Deo, in le seculos del seculos! Amen.

Musicas empleate

  • Open Our Eyes, Chris Springer
  • My Hope is Built, Midwestern Lutheran
  • Psaume 98 – Psautier de Genève
  • God, Who Stretched the Spangled Heaven, Midwestern Lutheran
  • Blessed Love, Holy Communion Instrumental Duo
  • Canon in D, Country Piano Hymns
  • Christ the lord is risen, Country Piano Hymns