Parabola del seminator
4:1 Itero Jesus incipeva docer apud le laco. Un grande turba se congregava circum ille, assi ille montava sur un barca, sedeva sur illo, durante que tote le turba remaneva sur le ripa. 4:2 Ille les doceva per le medio de contos parabolic como le sequente: 4:3 “Audi! Un agricultor sortiva pro seminar. 4:4 Dum ille seminava, alcun semines cadeva sur le sentiero e aves veniva e los mangiava. 4:5 Altere semines cadeva sur un terreno petrose que non habeva multe terra. Le semines germinava rapidemente quia le solo esseva poco profunde. 4:6 Le planta tamen, tosto siccava sub le calor del sol e, proque illo non habeva bastante radices, illo siccava. 4:7 Altere semines cadeva inter spinas. Le spinas cresceva e suffocava le plantas tenere, assi illos non produceva grano. 4:8 Altere semines ancora cadeva in terra bon, illos germinava, cresceva e produceva un recolta que esseva trenta, sexanta, e mesmo cento vices de plus que illo que habeva essite seminate”. 4:9 Deinde Jesus diceva: “Que illes qui ha aures bon pro audir, audi e comprende!”.
Le proposito del parabolas
4:10 Plus tarde, quando Jesus esseva sol con le Deceduo e con le alteres qui esseva con illes, illes inquireva re le signification del parabolas. 4:11 Ille replicava: “A vos es permittite comprender le mysterio del Regno de Deo. Io tamen, emplea parabolas pro quecunque io dice a estranieros, 4:12 quo le Scripturas sia complite: ‘Quando illes vide lo que io face, illes apprendera nihil. Quando illes audi lo que io dice, illes non comprendera. Alteremente illes se repentirea e esserea pardonate’”.
4:13 Ergo Jesus les diceva: “Si vos non pote comprender le signification de iste parabola, quomodo poterea vos comprender tote le altere parabolas? 4:14 Le seminator representa qui diffunde le Parola de Deo. 4:15 Le semines que cadeva sur le sentiero representa illes qui audi le message, ma tosto veni Satana, qui lo sasi e porta via le Parola que habeva essite seminate in illes. 4:16 Le semines que cade sur un terreno petrose representa illes qui audi le message e immediatemente lo recipe con gaudio. 4:17 Ma pois que illes non ha radices profunde, isto non dura multo. Quando les adveni tribulationes o persecutiones propter lor fide in le Parola de Deo, illes tosto se retira. 4:18 Le semines que cade inter spinas representa alteres qui audi le Parola de Deo, 4:19 ma prevale in illes le preoccupationes mundan, le seduction del richessa e le desiro pro altere cosas, de sorta que nulle fructo se produce. 4:20 E le semine que cade in terra bon representa illes qui audi e recipe le Parola de Deo, e propter isto illes produce un recolta de trenta, sexanta o mesmo cento vices de plus que habeva essite seminate in illes!”.
Le parabola del lampada
4:21 Deinde Jesus les demandava: “Esque alicuno unquam accendeva un lampa e pois lo pone sub un situla o sub un lecto? Certo no! Un lampa se pone sur un supporto ubi su lumine pote diffunder se. 4:22 Quia il ha nihil de occultate que non sia finalmente manifestate. Omne secretos essera portate al lumine. 4:23 Que illes qui ha aures bon pro audir, audi e comprende!”.
4:24 Pois ille addeva: “Presta ben attention a lo que vos audi. Quanto melio vos ascolta, tanto plus comprension essera vos date. 4:25 A illes qui ascolta mi doctrina, major comprension essera date. A illes tamen qui non ascolta, mesmo le poc comprension que illes ha les essera portate via”.
Le parabola del semine que cresce
4:26 Jesus diceva alsi: “Le regno de Deo es simile a un agricultor qui jecta semines sur le terreno. 4:27 Nocte e die, durante que ille es vigile o dormi, le semines germina e cresce, benque ille non sape quomodo. 4:28 Per se ipse le terreno fructifica, primo le pedunculos, deinde le spicas, deinde le plen fructos in le spicas. 4:29 Quando pois le grano es matur, le agricultor veni con un falce e lo collige, quia le tempore del recolta veniva”.
Le parabola del semine de mustarda
4:30 Jesus ancora diceva: “A quo poterea on comparar le regno de Deo, o qual parabola poterea nos emplear pro explicar lo? 4:31 Illo es sicut un semine de mustarda que, quando illo es seminate in le terreno, mesmo si illo es le semine le plus parve que nos cognosce, 4:32 quando illo es seminate, illo cresce e deveni le planta le plus grande del verdiero e face brancas tanto extense que sub su umbra le aves del celo pote habitar.
4:33 Pro docer les le parola, Jesus soleva emplear multes de tal parabolas secundo quid illes poteva comprender. 4:34 Sin parabolas ille nunquam les parlava, ma a su proprie discipulos ille privatemente explicava toto.
Jesus seda le tempesta
4:35 In ille die, quando se faceva vespere, Jesus diceva a su discipulos: “Vamos transir al altere latere del laco”. 4:36 Assi, dimittite le turba, illes sumeva Jesus in le barca e partiva. Altere barcas les sequeva. 4:37 Ora un tempesta violente se developpava e le fluctos se infringeva in le barca, tanto que jam illo se impleva de aqua. 4:38 Jesus, tamen, se habeva addormite in le poppa del barca con le testa sur un cossino. Le discipulos le eveliava e le diceva: “Magistro, non te importa que nos es sur le puncto de perir?”. 4:39 Quando Jesus se eveliava, ille reprobava le vento e diceva al fluctos: “Tace! Mutesce!”, e subito le vento cessava e se faceva un grande tranquillitate. 4:40 E ille les diceva: “Quare es vos tanto timide? Ancora vos non ha fide?”. 4:41 Un grande timor les sasiva e le discipulos se diceva le unes le alteres: “Qui es iste homine? Mesmo le vento e le mar le obedi!”.
https://wikisource.org/wiki/Biblia/Nove_Testamento/Marco/Marco_4