Isaia, cap. 25

Isaia

24

Laude pro le judicio e le salvation

1Senior, tu es mi Deo; io te exaltara e laudara tu nomine, quia tu faceva meravilias! Tu los ha cogitate multe tempore retro e illos es fidel e verace. 2Quia tu rendeva ille citate[1] un cumulo de ruinas, ille urbe fortificate un monte de fragmentos. Le fortalessa del estranieros[2] nunquam plus essera reedificate. 3Proper isto nationes potente te glorificara, citates impietose te timera. 4Quia tu es le protector del pauperes, le protector del necessitoses in lor tribulationes, le asylo ab le tempestas, le umbra ab le calor del sol. De facto, le oppression[3] de tyrannos es sicut un tempesta hibernal. 5Sicut le calor in un terra aride, tu humilia le arrogantia de nationes estranie. Justo como le umbra de un nube face subsider le calor, ille face cessar le cantos vangloriose de tyrannos.

6Sur iste monte[4], le Senior del universo dara un banchetto pro omne populos. In iste banchetto il habera abundantia de carne a mangiar e de vino ben inveterate – carne tenere e vino selecte. 7Sur iste monte ille facera disparer[5] le sudario de melancholia[6] que inveloppa omne populos, le tela que coperi omne nationes. 8Ille inglutira[7] le morte permanentemente. Le Senior soveran essugara le lacrimas de omne facies, e levara le disgratia de su populo de tote le terra. Le Senior lo ha decretate. 9In ille tempore illes dicera: “Ecce, iste es nostre Deo. Nos le expectava e ille nos liberava. Iste es le Senior in le qual nos confide. Que nos exulta e allegra nos propter su actos de liberation!

10Il essera le potentia del Senior a render secur iste monte. Moab essera fullate justo ubi illo se trova sicut un cumulo de palea in un stercorario. 11Moab extendera su manos in su medio sicut un natator extende su manos pro natar. Le Senior humiliara su superbia justo quando illo extendera su manos. 12Le muralias de Moab, citate fortificate, essera abattite. Illos essera jectate in le pulvere del terreno.

Notas

  1.  Le citate de nostre inimicos, Moab.
  2.  O “del gentes superbe”.
  3.  Litt. “le sufflo”.
  4.  Le monte Sion, Jerusalem.
  5.  Litt. “ingurgitara”.
  6.  Atrabile, tristessa, depression,
  7.  O “destruera”.

https://wikisource.org/wiki/Biblia/Vetule_Testamento/Isaia/Isaia_25