Jeremia, cap. 21

Jeremia

21

Le Senior ipse consignara Jerusalem al inimico

1Le Senior parlava a Jeremia quando le Rege Zedekia le habeva inviatee Pashhur, filio de Malkija e le sacerdote Zephania, filio de Maasela. Zedechia les inviava a Jeremia pro peter le: 2“Pete al Senior de venir adjutar nos, quia Rege Nebuchadnezzar attacca nos. Forsan le Senior executara un de su miraculos sicut ille faceva in le tempores passate e facera cessar iste attaccos e receder ab nos nostre inimicos”.

3Jeremia les respondeva: “Dice a Zedekia 4que le Senior, le Deo de Israel, dice: ‘Le fortias a vostre disposition se trova nunc extra le muros e combatte contra Rege Nebuchadnezzar de Babylonia e le Babyloneses que tene vos sub assedio. Io facera retraher e congregar ille fortias intra le citate. 5Con furor, indignation e grande ira, io ipse combattera contra vos con mi mano forte e potente brachio. 6Io percutera le habitantes de iste citate, homines e bestias, e illes morira de un grande pestilentia. 7Post illo, dice le Senior, io consignara al fame e al peste, Zedekia, rege de Juda, su officieros, e qualcunque altere persona qui supervivera al guerra. Io les consignara al rege de Babylonia e a lor inimicos, qui vole uccider les. Ille les macellara con le gladio. Ille non habera de illes alcun misericordia, compassion o pietate’”.

8Dice alsi al populo de Jerusalem que le Senior dice: ‘Io pone ante vos duo vias: le via del vita e le via del morte. 9Illes qui remane in iste citate morira per le gladio, per le fame o per le peste. Illes qui quita le citate e se rende al Babyloneses que assedia le citate, supervivera. Le vita essera lor recompensa. 10Quia io, le Senior, dice que io ha le determination non de liberar iste citate, ma de causar su disastro. Illo essera consignate al rege de Babylonia e ille lo destruera con le foco”.

Admonitiones al familia regal

11Dice al familia regal de Juda: “Audi le message del Senior: 12Oh familia regal descendite de David. Le Senior dice: ‘Rende justitia cata matino al gente que vos judica! Adjuta illes que ha essite robate; libera les ab lor oppressores. Alteremente mi ira se accendera sicut un foco inextinguibile propter tote vostre peccatos. 13Audi, vos omnes qui sede inthronate super le vallea sur un plateau roccose: io es adverso vos’, dice le Senior, ‘Vos vangloria vos dicente que nemo poterea piccar super vos; que nemo poterea penetrar in le locos ubi vos ha refugiate vos’. 14Ma io punira vos juxta le fructo de vostre operas’, dice le Senior, ‘io incendiara vostre palatio; le foco devorara toto lo que es circa illo’”.

https://wikisource.org/wiki/Biblia/Vetule_Testamento/Jeremia/Jeremia_21