Jeremia, cap. 38 e 39

38

Jeremia es accusate de traition e jectate in un cisterna

38:1 Ora Shephatia, filio de Matten, Gedalia, filio de Pashhur, filio de Malkija, habeva audite lo que Jeremia diceva a tote le populo. Illes le audiva dicer: 38:2 “Quicunque remanera in iste citate morira per le gladio, le fame e le peste. Illes tamen, qui fugira ab le citate e se livrara al babylonianes vivera. Lor recompensa essera le vita. Illes vivera!”. 38:3 Le Senior dice alsi: “Le citate de Jerusalem certo essera livrate al armea del rege de Babylon, qui lo sasira”.

38:4 Assi iste officieros diceva al rege: “Nos roga que iste homine sia occidite. Quia ille dismoralisa le milites qui remaneva in le citate e tote le populo ibi per le cosas que ille dice. Un tal homine non adjuta ma damnifica nostre populo”. 38:5 Rege Zedekia, alora, les diceva: “Ecce, celle homine es in vostre manos. Io non pote stoppar vos”. 38:6 Ergo le officieros removeva Jeremia ab le prision ubi ille esseva relegate e le jectava in le cisterna de Malkija, uno del princes regal, que esseva in le corte del guardas. Il non habeva aqua in le cisterna, solmente fango. Assi illes per funes faceva descender Jeremia in le cisterna, in le qual ille esseva quasi submergite.

Un officiero ethiope salva Jeremia del cisterna

38:7 Un ethiope, Ebed Melech, un officiero del corte in le palatio regal, audiva que Jeremia habeva essite mittite in le cisterna. In ille tempore le rege teneva corte al Porta de Benjamin. 38:8 Ebed Melech, assi, quitava le palatio e vadeva parlar al rege. Ille le diceva: 38:9 “Vostre majestate regal, celle homines esseva multo vitiose in tote lo que illes faceva contra le propheta Jeremia. Illes le jectava in un cisterna, e il es certe que ille morira ibi de fame, quia in le citate il non ha plus viveres”. 38:10 Alora le rege dava a Ebed Melech, le ethiope, le sequente ordine: “Prende con te trenta homines e va levar le propheta Jeremia ex le cisterna ante que ille mori”. 38:11 Assi Ebed Melech prendeva homines con ille e vadeva a in un camera sub le camera del tresor in le palatio. Ille prendeva de ibi pannos ex vestimentos vetere e pannellos e los faceva descender con funes a Jeremia. 38:12 Ebed Melech le ethiope diceva a Jeremia: “Pone iste pannellos e vestimentos vetere sub tu scapulas pro borrar le funes. Jeremia ergo, faceva assi. 38:13 Alora illes extraheva Jeremia del cisterna con funes. Jeremia tamen, ancora remaneva confinate in le corte del guardas.

Zedechia interroga Jeremia

38:14 Alicun tempore postea, rege Zedekia mandava cercar le propheta Jeremia e le faceva venir al tertie entrata del Templo del Senior. Le rege diceva a Jeremia: “Io ha un cosa a demandar te: non me celar alco quando tu responde”. 38:15 Jeremia diceva: “Si io te dice le veritate, tu me occidera. E si io te da consilios, tu non me ascoltara”. 38:16 Assi rege Zedekia secretemente le faceva iste promissa: “Tanto certo quanto vive le Senior qui ha nos date vita e sufflo, io te promitte isto: io non te occidera ni io te livrara a celle homines qui vole occider te”. 38:17 Alora Jeremia diceva a Zedekia: “Le Senior Deo del universo, le Deo de Israel, dice: Tu debe livrar te al officieros del rege de Babylonia. Si tu lo face, tu vita essera sparniate e iste citate non essera incendiate. Sin dubita, tu e tu familia essera sparniate. 38:18 Si tu tamen, non te livra al officieros del rege de Babylonia, iste citate essera livrate al babylonianes e illes lo incendiara. Tu ipse non potera fugir de lor manos”.

38:19 Alora rege Zedekia diceva a Jeremia: “Ma io time le judeos qui jam se ha livrate al babylonianes. Le babylonianes poterea livrar me a illes, e qui sape quid illes poterea facer me!”. 38:20 Jeremia replicava: “No, tu non les essera livrate si tu selige de obedir al Senior. tu vita essera sparniate, e toto vadera ben pro te. 38:21 Ma si tu refusa livrar te, isto es lo que le Senior me ha revelate: 38:22 Tote le feminas qui remane in tu palatio essera facite sortir e date al officieros del armea babylonian. Alora celle feminas te dicera sarcasticamente: ‘Tu amicos te incitava e te vinceva; tu pedes se mergeva in le fango durante que illes dispareva’. 38:23 Omne tu uxores con tu filios essera conducite al babylonianes e tu non potera fugir de lor manos, ma tu essera capturate e date in le manos del rege de Babylonia, e iste citate essera incendiate”.

38:24 Alora Zedekia diceva a Jeremia: “Que nemo sape re le conversation que nos faceva, alteremente tu morira. 38:25 Mi officieros poterea audir que io te ha parlate, e illes poterea dicer: ‘Dice nos de que tu e le rege parlava. Si tu non nos lo dice, nos te occidera’. 38:26 Si isto eveni, dice les solmente que tu te prosterneva coram le rege e me implorava non facer te vader retro al donjon de Jonathan, pro timor que tu ibi morirea”. 

38:27 De facto, tote le officieros veniva a Jeremia e le demandava proque le rege le habeva convocate. Jeremia tamen, sequeva le instructiones del rege, e illes quitava sin discoperir le veritate. Nemo habeva audite le conversation inter Jeremia e le rege. 38:28 Assi Jeremia remaneva prisonero in le corte del guardas usque al die in le qual Jerusalem esseva sasite.

https://wikisource.org/wiki/Biblia/Vetule_Testamento/Jeremia/Jeremia_38

39

Le cadita de Jerusalem

39:1 Rege Nebuchadnezzar de Babylonia arrivava con su armea integre e assediava Jerusalem. Le assedio comenciava in le decime mense del novesime anno que Zedekia regnava super Juda. 39:2 Illo durava usque le novesime die del quarte mense del dece-prime anno de Zedekia. In celle die illes penetrava trans le muralias del citate. 39:3 Alora omne officieros del armea babylonian entrava triumphalmente per le Porta Medie: Nergal-sharezer de Samgar, Nebo-sarsekim, le capite del officieros, Nergal-sharezer, le consiliero del rege, e tote le altere officieros del rege de Babylon.

39:4 Quando rege Zedekia de Juda e tote su milites les videva, illes essayava fugir. Illes quitava le citate durante le nocte. Illes passava per un sentiero trans le jardin del rege e per le porta inter le duo muralias. Illes se dirigeva verso le vallea del Jordan. 39:5 Le armea babylonian tamen, les persequeva e succedeva preceder rege Zedekia e attender le in le plana de Jericho e le capturava. Illes le portava a rege Nebuchadnezzar de Babylonia a Ribla, in le territorio de Hamath, e ibi le rege de Babylon pronunciava su judicio super Zedekia. 39:6 Ibi, in Ribla ille faceva occider le filios de Zedekia, durante que Zedekia esseva fortiate reguardar. Le rege de Babylonia faceva anque occider omne nobiles de Juda. 39:7 Deinde ille faceva cavar le oculos de Zedekia, le faceva incatenar e deportar a Babylonia.

39:8 Intertanto, le babylonianes incendiava Jerusalem, includite le palatio regal e le domos del gente, e illes dismantellava le muralias del citate. 39:9 Deinde Nebuzaradan, le capitano del guarda regal, rendeva prisoneros le resto del populo que habeva remanite in le citate. Ille les deportava a Babylon insimul al gente que se habeva livrate a ille. 39:10 Nebuzaradan, tamen, in celle tempore, permitteva a alicunes inter le plus paupere del populo de remaner in le pais de Juda pro coler le vinias e le agros.

Jeremia remane in Juda

39:11 Rege Nebuchadnezzar habeva dicite a Nebuzaradan, le capitano del guardas, de querer e trovar Jeremia. 39:12 Ille diceva: “Trova Jeremia e vigila super ille. Non facer le alcun mal, sed face a ille quecunque ille vole”. 39:13 Assi Nebuzaradan, le capitano del guardas regal, Nebushazban, le capite del officieros, Nergal-sharezer, le consiliero del rege, e le altere officieros del rege de Babylonia, 39:14 mandava messageros pro facer sortir Jeremia del prision ubi ille se trovava. Illes le poneva sub le cura de Gedalia, filio de Ahikam e granfilio de Shaphan, le quales le faceva retornar a su domo. Assi Jeremia remaneva in Juda inter su proprie gente.
39:15 Le Senior habeva date le sequente message a Jeremia durante que ancora ille esseva in prision: 39:16 “Dice a Ebed Melech, le ethiope: Isto es lo que le Senior del universo, le Deo de Israel, dice: Io facera a iste citate tote lo que io menaciava facer. Io mandara disastros, non prosperitate. Tu videra su destruction, 39:17 ma io liberara te in ille die – dice le Senior – e non te livrara in le manos del homines qui tanto tu time. 39:18 Io te liberara e non te facera cader sub le colpo de gladios. Tu remuneration essera tu vita ipse, quia in me tu habeva fiducia – assi dice le Senior”.

https://wikisource.org/wiki/Biblia/Vetule_Testamento/Jeremia/Jeremia_39