119. BEATE ES ILLES CUJE VIA ES IMMACULATE
In iste Psalmo, le psalmista celebra le Lege de Deo e le guida que illo provide a su populo. Ille exprime su desiro de cognoscer le Lege de Deo tanto completemente que ille pote facer experientia del benedictiones que veni super qui lo observa. Le ossatura de iste Psalmo es acrostic, cata section comencia con un littera del alphabeto hebraic in su sequentia.
א (ALEF) 1-8
119:1 Beate es illes cuje via es immaculate, qui se comporta secundo le Lege del Senior. 119:2 Beate es illes qui observa su prescriptiones e le quere con tote lor corde, 119:3 qui non face alcun compromisso con le iniquitate e cammina in su vias. 119:4 Tu require que tu commandamentos sia diligentemente observate. 119:5 Que mi actiones reflecte constantemente tu statutos! 119:6 Alora io non esserea avergoniate quando io comparara mi vita con tu commandamentos. 119:7 Io te rendera gratias sincere con un recte corde quando io apprendera le judicios de tu justitia. 119.8 Io obedira a tu decretos. Non abandonar me completemente.
ב (BET) 9-16
119:9 Como pote un persona juvene servar le puressa de su conducta? Per le obedientia a tu parola. 119:10 Io te quere de tote corde: non permitte que io erra lontan de tu preceptos. 119:11 In mi corde io servava tu parolas de instruction pro non peccar contra te. 119:12 Io te benedice, oh mi Senior; doce me tu statutos. 119:13 Io recitava in alte voce tote le regulas que tu nos dava. 119:14 Io me allegra del stilo de vita prescribite in tu Lege sicut ricchessas de omne sortas. 119:15 Io meditara super tu commandamentos e reflectera super le conducta que tu require. 119:16 Tu statutos me delecta: io nunquam oblidera tu parolas de instruction.
ג (GIMEL) 17-24
119:17 Sia benevolente verso tu servitor ut io vive e observa tu parola. 119:18 Aperi mi oculos ut io vide le meraviliose veritates de tu Lege. 119:19 Io es solmente un estraniero in iste pais. Non cela ab me tu preceptos. 119:20 Mi anima desidera ardentemente cognoscer in omne tempores tu regulas de vita. 119:21 Tu reprimenda le personas arrogante. Qui erra ab tu preceptos es maledicite. 119:22 Sparnia me vergonia e contempto, quia io observa tu regulas de vita. 119:23 Memo si princes sederea e parlarea adverso me, io medita super tu parola. 119:24 Si, io me delecta de tu regulas de vita: illos es un guida pro me.
ד (DALET) 25-32
119:25 Io jace in le pulvere: vivifica me secundo tu parola. 119:26 Io te diceva quales es mi planos e tu me respondeva. Nunc doce me tu statutos. 119:27 Face me comprender le significato de tu commandamentos, ut io medita super tu meraviliose inseniamentos. 119:28 Mi anima afflicte plora amarmente: sustene me per tu parola. 119:29 Averte me ab le via del mendacios e gratiosemente da me tu Lege. 119:30 Io seligeva le via del veritate. Io me ingagiava sequer tu regulas de vita. 119:31 Io adhere strictemente a tu regulas de vita. Oh Senior, que io non sia avergoniate. 119:32 Io curre in le via de tu commandos, quia tu me habilita facer lo.
ה (HE) 33-40
119:33 Doce me tu statutos, oh Senior; io los observara pro sempre. 119:34 Da me intellecto e io observara tu leges de tote corde. 119:35 Duce me in le semitas de tu preceptos, quia in illos io trova mi gaudio. 119:36 inclina mi corde a appreciar tu regulas de vita, plus tosto que a ricchessas aquirite injustemente. 119:37 Averte mi oculos ut io non vide lo que es sin valor. Vivifica me con tu parola. 119:38 Confirma a tu servitor tu promissa, illo que tu faceva a qui te honora. 119:39 Adjuta me quitar omne comportamentos vergoniose, quia tu regulas de vita es bon. 119:40 Ecce, io compliva tu commandamentos; vivifica me in tu justitia.
ו (VAV) 41-48
119:41 Que tu misericordia veni super me, oh Senior, e tu salvation, secundo tu promissas. 119:42 Alora io potera responder a les qui me insulta, quia io confide in tu parola. 119:43 Non me disprovide de un testimonio verace, quia tu regulas de vita es mi sol sperantia. 119:44 Alora io continuemente observara tu Lege, nunc e semper. 119:45 Io essera secur, quia io quere tu preceptos. 119:46 Io non me avergoniara parlar re tu regulas de vita in le presentia de reges. 119:47 Io me delecta in tu commandamentos, quia io los ama. 119:48 Io honora e ama tu commandos. Io medita super tu statutos.
ז (ZAYIN) 48-56
119:49 Recorda tu parola a tu servitor, quia tu me dava sperantia. 119:50 Tu promissa me revivisce; illo me conforta in tote mi afflictiones. 119:51 Personas superbe me deride con vehementia, ma io non me vertera ab tu Lege. 119:52 Io medita super tu leges antique; oh Senior, illos me conforta. 119:53 Le indignation me sasi quando io considera le peccatores qui derelinque tu Lege. 119:54 Tu statutos esseva le thema de mi canticos ubicunque io ha vivite. 119:55 De nocte io reflecte super qui tu es, oh Senior; ergo io obedi a tu Lege. 119:56 Io ha practicate isto tote mi vita, quia io observava tu commandamentos.
ח (KHET) 57-64
119:57 Le Senior es le fonte de mi securitate. Io me determinava sequer tu parolas de instruction. 119:58 Io quere tu favor de tote corde. Sia misericordiose como tu promitteva. 119:59 Io ponderava le direction de mi vita e sequeva tu regulas. 119:60 Io me hastara sin retardo a obedir a tu commandos. 119:61 Le funes del peccatores se stringeva circum me, ma io non oblidava tu Lege. 119:62 Io me leva in le medio del nocte pro regratiar te pro le juste regulas del vita que tu nos dava. 119:63 Io es amico de quicunque te respecta, de quicunque observa tu commandamentos. 119:64 Oh Senior, le Terra es plen de tu misericordia; doce me tu statutos!
ט (TET) 65-72
119:65 Tu faceva multe bon cosas pro me, oh Senior, justo como tu promitteva. 119:66 Doce me un juste discernimento e intelligentia, quia io considera tu commandos digne de confidentia. 119:67 Ante que tu me disciplinava, io soleva errar, ma nunc io observa tu parolas de instruction. 119:68 Tu es bon e face le ben. Doce me tu statutos. 119:69 Gente arrogante me calumnia, ma io observa tu preceptos de tote corde. 119:70 Lor cordes es callose e stupide, ma io me delecta in tu Lege. 119:71 Mi suffrentias esseva bon pro me ut io apprendeva tu statutos. 119:72 Le Lege que tu nos revelava ha pro me un valor major que milles pecias de auro e de argento.
י (YOD) 73-80
119:73 Tu manos me faceva e me formava. Da me intellecto ut io apprende tu commandos. 119:74 Que tote illes qui te time me vide e se allegra, quia io poneva mi sperantia in tu parola. 119:75 Io sape, oh Senior, que tu regulas de vita es juste. Tu me disciplinava propter tu fidel devotion verso me. 119:76 Que tu misericordia me consola, secundo lo que tu ha promittite a tu servitor. 119:77 Que io face le experientia de tu compassion e vive, quia io me delecta de tu Lege. 119:78 Que le gente arrogante sia avergoniate quia illes me calumniava; ma io medita super tu preceptos. 119:79 Que io sia le companion de omnes qui te time, omnes qui cognosce tu regulas de vita. 119:80 Que io sia plenmente ingagiate in sequer tu statutos, ut io non sia unquam avergoniate.
כ (KAF) 81-88
119:81 Le expectation de tu intervention a liberar me me extenuava. Io trova sperantia in tu parola. 119:82 Mi oculos deveniva fatigate in attender le completion de tu promissa. 119:83 Io es corrugate sicut un utre exponite al fumo, ma io non oblidava obedir a tu statutos. 119:84 Quanto longemente ancora tu servitor debera sustener tote isto? Quando tu punira les qui me persecuta? 119:85 Personas arrogante qui violava tu Lege excava fossas pro trappar me. 119:86 Omne tu preceptos es digne de fide. Protege me ab les qui me persecuta sin causa. 119:87 Illes quasi me destrueva hic sur le Terra, ma io refusava derelinquer tu commandamentos. 119:88 Vivifica me secundo tu misericordia, ut io observa le regulas de vita que tu ha revelate.
ל (LAMED) 89-96
119:89 Oh Senior, tu parola dura firmemente in eterno. 119:90 Tu demonstra tu fidelitate de generation a generation. Tu establiva le Terra e illo remane firme. 119:91 Tu regulas permane hodie digne de fide, quia toto servi tu propositos. 119:92 Si io non habeva trovate incoragiamento in tu Lege, io haberea morite in mi affliction. 119:93 Io nunquam oblidara tu preceptos, quia per illos tu me revivisceva. 119:94 Io te pertine. Salva me! Quia io quere tu commandamentos. 119:95 Ben que le peccatores se occulta longe le strata pro occider me; nonobstante, io me concentra super tu regulas. 119:96 Mesmo le perfection ha su limites, ma tu commandamentos ha nulle limites.
מ (MEM) 97-104
119:97 Oh, quanto io ama tu Lege! Tote le die io medita super illo. 119:98 Tu commandamentos me rende plus sage que mi inimicos, quia illos es constantemente mi guida. 119:99 Io ha multo plus prudentia que tote mi docentes, quia io medita super tu regulas de vita. 119:100 Io ha major discernimento que mi seniores, quia io observa tu preceptos. 119:101 Io me tene lontan de omne vias mal, ut io observa tu parolas de instruction. 119:102 Io non me disvia de tu regulas de vita, quia tu me ha instruite ben. 119:103 Tu parolas de instruction es in mi bucca plus dulce que le melle! 119:104 Tu commandamentos me da discernimento; propter isto io odia omne vias de mendacio.
נ (NUN) 105-112
119:105 Tu parola es un lanterna pro guidar mi cammino e un lumine pro mi sentieros. 119:106 Io lo promitteva un vice e io va promitter lo de novo: io obedira a tu juste regulas de vita. 119:107 Io ha multo patite, oh Senior; restabli de novo mi vita, secundo tu promissas. 119:108 Oh Senior, accepta mi offerta de laude, e doce me tu regulas de vita. 119:109 Mi vita es in constante periculo, ma io non cessara obedir a tu leges. 119:110 Gente malefic poneva insidias pro attrappar me, ma de tu commandamentos io non errava. 119:111 Tu leges essera mi tresor in eterno, mi corde se allegra in illos. 119:112 Mi determination es de observar semper tu decretos, usque al fin.
ס (SAMEK) 113-120
119:113 Io odia le gente de duplice corde, ma io ama tu Lege. 119:114 Tu es mi refugio e mi scuto; io trova sperantia in tu parolas de instruction. 119:115 Allontana vos ab me, gente malefic: io observa le commandamentos de mi Deo! 119:116 Senior, sustine me como tu promitteva. Que mi sperantia non sia disappunctate! 119:117 Supporta me, e io essera liberate, alora io meditara continuemente super tu statutos. 119:118 Tu disprecia tote illes qui erra ab tu statutos, quia tal personas es mendace e inaffidabile. 119:119 Como scorias tu dele omne peccatores del Terra; propter isto io ama tu regulas de vita. 119:120 Mi corpore treme proque io te time; io ha pavor de tu judicios.
ע (AYIN) 121-128
119:121 Io face lo que es juste e recte, non me livra a les qui me calumnia. 119:122 Garanti un benediction pro me. Que gente superbe non me calumnia! 119:123 Mi oculos es fatigate in le expectation de tu salvation; io desira ardentemente vider complite le veritate de tu promissas. 119:124 Tracta tu servitor secundo tu misericordia; doce me tu statutos. 119:125 Io es tu servitor; da me intellecto ut io comprende tu leges. 119:126 Oh Senior: il es tempore que tu age, quia multe gente viola tu Lege. 119:127 Propter iste ration io ama tu preceptos plus que le auro, mesmo plus que le auro le plus fin. 119:128 Propter iste ration io observa diligentemente tu commandamentos: io odia omne vias mendace.
פ (PE) 129-136
119:129 Tu regulas de conducta es meraviliose, propter isto io los observa! 119:130 Le inseniamento de tu parola illumina. Illo da intellecto al personas inexperte. 119:131 Io anhela con grande expectation, quia io desira ardentemente tu preceptos. 119:132 Verte te verso me e misera me como tu face verso omnes qui honora tu nomine. 119:133 Dirige mi passos secundo tu parola e non permitte que ulle iniquitates me domina. 119:134 Libera me ab le calumnias del homines ut io observa tu commandamentos. 119:135 Que tu facie surride a tu servitor. Doce me tu statutos. 119:136 Lacrimas flue de mi oculos quia multes non observa tu lege.
צ (TSADE) 138-144
119:137 Tu es juste, oh Senior, e tu judicios recte. 119:138 Tu leges es perfectemente juste e completemente digne de fide. 119:139 Mi zelo me consuma, quia mi inimicos oblida tu parolas de instruction. 119:140 Tu parolas de promissa esseva ponite a proba e se demonstrava fidel: ecce proque tu servitor los ama. 119:141 Io es insignificante e dispreciate, ma io non oblida tu commandamentos. 119:142 Tu justitia dura in eterno e tu Lege es digne de fide. 119:143 Io es confrontate de tribulation e angustia, ma io me delecta de tu preceptos. 119:144 Tu regulas de vita es semper juste: adjuva me comprender los, ut io vive.
ק (QOF) 145-152
119:145 De tote corde io te clamava e diceva: “Exaudi me, Senior! Io observara tu statutos. 119:146 Io te clamava e te diceva: “Salva me, ut io observa tu regulas de vita”. 119:147 Io me levava mane ante le alba clamante adjuta a te. Io trova sperantia in tu parola. 119:148 Io vigila durante le nocte e medita super tu parola. 119:149 Ascolta mi voce secundo tu misericordia, oh Senior; vivifica me secundo tu judicio. 119:150 Se approxima a me illes qui, in lor malitia, me perseque; illes es longe de tu Lege. 119:151 Tu, tamen, es proxime, oh Senior, e tote to preceptos es digne de fide. 119:152 Io ha cognoscite desde le dies de mi juventute que tu regulas de vita durara pro semper.
ר (RESH) 153-160
119:153 Vide mi humiliation e redime me, quia io non oblida tu Lege. 119:154 Sustene mi causa e redime me; vivifica me con tu parola. 119:155 Le peccatores ha nulle causa de esser salvate, quia ille non quere tu statutos. 119:156 Oh Senior, tu misericordia es grande. Vivifica me secundo tu regulas de vita. 119:157 Le inimicos qui me perseque e me causa tribulationes es multe. Nonobstante, io non quita sequer tu regulas de vita. 119:158 Solmente in vider le prevaricatores me face dispreciar les, quia illes non observa tu parola. 119:159 Vide quanto io ama tu commandamentos, oh Senior. Vivifica me secundo tu misericordia. 119:160 Le essentia mesme de tu parolas es veritate; omne tu juste regulas de vita durara in eterno.
שׂ/שׁ (SIN/SHIN) 161-168
119:161 Gente potente me perseque sin ration, ma lo que io plus time es disobedir a tu parolas de instruction. 119:162 Io me allegra de tu parolas de instruction sicut qui trova un ric butino. 119:163 Io odia e disprecia omne mendacios, ma io ama tu Lege. 119:164 Io te lauda septe vices pro die propter tu juste regulas de vita. 119:165 Illes qui ama tu Lege acquire multe pace e nihil les face trappar. 119:166 Io expecta tu salvation, oh Senior, e obedi a tu preceptos. 119:167 Io observa tu regulas de vita, io los ama grandemente. 119:168 Io observa tu commandamentos, quia tu vide como io me conduce.
ת (TAV) 169-176
119:169 Que mi deprecation se approxima a te, oh Senior. Da me intellecto per tu parola. 119:170 Que mi requestas entra in tu presentia. Libera me, secundo tu promissas. 119:171 Que ab mi labios se effunde hymnos de laude, quia tu me doce tu statutos. 119:172 Que mi lingua canta re tu parolas, quia omne tu commandamentos es juste. 119:173 Que tu mano me adjuta, quia io seligeva de obedir a tu commandamentos. 119:174 Io concupisce tu salvation, oh Senior, e tu Lege es mi delecto. 119:175 Que mi anima vive e te lauda; que tu regulas de vita me adjuva. 119:176 Io errava sicut un ove perdite; veni a cercar tu servitor, ut io non oblida tu preceptos.https://wikisource.org/…/Vetule…/Psalmos/Psalmos_119