Psalmo 25

Psalmos

25. A te, Senior, io eleva mi anima

Le Psalmista invoca le protection de Deo, su guida e su pardono dum ille affirma su loyalitate e fiducia in le Senior. Iste psalmo es un acrostico: cata verso comencia con un littera successive del alphabeto hebraic.

1A te, Senior, io eleva mi anima. 2Deo mie, in te io confide. Que io non sia humiliate[1] e que mi inimicos non exulta propter mi disfacta. 3Certo nemo qui se confide in te unquam essera humiliate, ma que le disgratia superveni a omnes qui essaya de deciper alteres. 4Face me comprender tu vias, oh Senior. Doce me tu semitas. 5Dirige me in tu veritate e doce me, quia tu es le Deo de mi salvation. Io me remitte a te per tote le die. 6Rememora, oh Senior, tu misericordia, quia tu semper ageva in iste maniera. 7Oblida le peccatos de rebellion a te que io committeva durante mi juventute. Rememora me in le lumine de tu inexhauribile amor, quia tu es misericordiose, oh Senior. 8Le Senior es dulce e recte: isto es le ration perque tu doce al peccatores le maniera juste de viver. 9Que ille monstra al humiles su vias. 10Le Senior semper se demonstra fidel e digne de fiducia pro illes qui seque lo que prescribe su pacto. 11Propter le honor de tu nomine, oh Senior, pardona[2] mi peccato, quia illo es grande. 12Le Senior monstra a illes que le seque fidelmente le maniera in le qua illes debe viver. 13Illes face le experientia de su favor; lor descendentes heredita le terra. 14Le Senior es amicabile a illes qui le time. Ille les monstra lo que le pacto require. 15Mi oculos es semper fixe al Senior, quia ille me salva del trappas de mi inimicos. 16Respice ad me e habe misericordia, quia io es sol e paupere. 17Libera mi corde del angustia, provide a mi necessitates. 18Vide mi dolores e suffrentia; pardona tote mi peccatos. 19Respice quante inimicos io ha, quia illes se multiplicava e me odia de un odio cruel. 20Custodia mi anima e salva me; que io non sia humiliate, quia io faceva de te mi refugio. 21Que le innocentia e le honestate me protege, quia in te io pone mi sperantia. 22Oh Deo, libera Israel ex omne su tribulationes.

Notas

  1. O “Que io non habe a erubescer”.
  2. O “propitia”.

https://wikisource.org/wiki/Biblia/Vetule_Testamento/Psalmos/Psalmos_25