Psalmo 90

Psalmos

90. Tu ha essite nostre protector de generation a generation

In iste lamentation communal, le director del adoration assere que le Deo eterne e creator del mundo ha semper essite le protector de Israel. Deo, tamen, alsi es le causa del morte del humanos, quia illes es transitori sicut herba. Deo, in su ira ardente, decima le communitate del Pacto, cuje breve vitas es plen de suffrentias e debilitate. Le communitate quere sapientia, le restauration del favor de Deo, un fresc revelation de su poter, e su benediction super lor labor.

1Precaria de Moses, le homine de Deo. Senior! Tu ha essite nostre protector[1] de generation a generation! 2Ante que le montes ipse nasceva, o ante que tu portava al existentia le orbe del mundo, de eternitate a eternitate tu es Deo.

3Tu reduce le homines in pulvere, dicente: “Retorna al pulvere, vos mortales!”. 4Quia mille annos ante tu oculos, es sicut un die que passa, tam breve quam poc horas[2] del nocte. 5Tu face terminar lor vita e illes se addormi; mane illes es sicut herba que pullula. 6Mane illo floresce e cresce, ma in le vespere illo decade e marcesce. 7Nos marcesce sub tu ira; nos es submergite per tu furia. 8Tu extende coram te nostre iniquitates – nostre peccatos occulte – e tu los vide in toto. 9Quia omne nostre dies evanesce sub tu ira; le annos de nostre vita passa rapidemente tam quam un suspiro.

10Le tempore de nostre vita es septanta annos o, si on es particularmente forte, octanta annos. Tamen, mesmo nostre annos melior es plen de labor e dolor, quia illos cito dispare e nos vola via. 11Qui pote comprender le fortia de tu ira? Tu indignation es tam terribile quanto le timor que tu merita. 12Doce nos a considerar nostre mortalitate[3] ut nos vive sagemente.

13Retorna ad nos, oh Senior! Usque a quando debera durar iste suffrentia? Habe pietate de tu servitores! 14Satisface nos mane con tu misericordia. Tunc nos exultata e essera gaudiose per tote nostre vita. 15Rende nos felice in proportion al dies in le quales tu humiliava nos, pro le annos in le quales nos pativa le mal. 16Que tu servitores vide tu obra! Que tu filios vide tu majestate[4]17Que le splendor del Senior Deo sia super nos! Que nostre interprisas ha successo! Si, face haber successo al obras de nostre manos!

Notas

  1. O “refugio”.
  2. O “le periodos in le quales le nocte se divide”.
  3. O “a enumerar nostre dies”, le brevitate de nostre vita.
  4. O “gloria”.

https://wikisource.org/wiki/Biblia/Vetule_Testamento/Psalmos/Psalmos_90