Psalmo 99

Psalmos

99. Le Senior regna! Que le nationes treme!

Le psalmista celebra le juste dominio del Senior e rememora como ille revelava se ipse al capites de Israel. .

1Le Senior regna! Que le nationes treme! Ille sede super su throno inter le cherubim[1]. Que le terra freme! 2Le Senior sede majestose in Jerusalem, excelse super omne populos. 3Que illos lauda tu magne e terribile nomine, quia illo es sancte! 4Rege potente! Tu ama le justitia! Tu establiva lo que es recte. Tu ageva justemente e rectemente per tote Israel[2]5Exalta le Senior, nostre Deo e adora prosternate ante le scabello de su pedes, quia ille es sancte! 6Moses e Aaron esseva inter su sacerdotes. Samuel alsi invocava su nomine. Illes invocava le Senior e ille les exaudiva. 7In un columna de nebulas ille les parlava e illes custodiava le leges e le decretos que ille les habeva date. 8Senior, Deo nostre! Tu les exaudiva, tu esseva propitie a illes, ma tu puniva lor actos peccaminose.

9Exalta le Senior, nostre Deo e adora le super su sancte monte in Jerusalem, quia le Senior, nostre Deo, es sancte!

Notas

  1. Le cherubim es angelos alate. Como les representa le Vetule Testamento, illos ha characteristicas tanto human quanto animal (leon, bove, aquila) e servi como le throno de Deo o su vehiculo.
  2. Lett. “Jacobo”.

https://wikisource.org/wiki/Biblia/Vetule_Testamento/Psalmos/Psalmos_99